Te Mwaaka n Nanomatoa
E maeka te tia korokaraki i Utah, USA.
Ma rangau ae maoto ao nanou ae uruaki, I kainnanoa te kamarurungaki. Te kantaninga N na kona n rinanona.
Tao n te namwakaina imwaain koron au ka 16 n ririki, au utu a mwananga n te kaa n te kawai n rinanon te United States ni kawara ana tabo tabeua te Ekaretia ake iai rongorongoia. I aki tabe ngkana I tiku ni maan n te kaa ibukina bwa au utu a aki toki ni karekea aia tai ae tamaroa. I uringa riniu n te kaa n te bong are ti roko iai i Winter Quarters, Nebraska. E rang korakora bwakan te karau. I nako bukin te kaa, n anaa te burangketi, ao ni kamwengaraoai ao n ongora bwakabwakan te karau ngke I manionako ni matu.
Te bwai ae I uringnga imwiina namakinan ae kanga titebo e a bure minominou. Imwiina I ataia bwa ara kaa e a tia ni marannako ao ni kauntabaa te o te timanti iaan te buriiti (are e biri riaon te kawai are ti toka iai). I uringa teutana iai ae tuangai bwa rangau e maoto ao I a uotaki nakon te tabo ni korokoro.
N te tai ae waekoa imwiin anne ngke I marurung n te onaoraki, e kawarai tamau n au ruu. E tekateka irarikiu iaon au kainiwene ao e anai baiu. Kanga I a kaman namakinna ao n ataa te bwai ae e na taekinna.
“Honey,” e taku, “ko ataia bwa ko mena iaa?”
“Inanon te onaroaki” I kaeka.
“Ko ataia bwa tera ae e riki?”
“Ti kabuanibwai n te kaa.”
“Iai ae e a tia n tuangko taekaia ara utu?”
I toki ao ngkanne I kaeka akea.
E taku bwa ni kabane a na nakoraoi—tii ibukin tinau. E aki maiu.
N na kantaningaa rootakiu n te nanokawaki ngkekei naba, ma I aki. Rinanon moan kubanakou, kanga, ibukin nanona tabeua, I namakina te rau, te namakin ae torobakiraoi are I kona ni kakoaua te Atua bwa bwaai a na bane n nakoraoi.
Inanon weneu n te onaoraki, I uringa teuana rongorongon ngkoa ana tabo te Ekaretia are ti nooria uoua te bong n nako imwaain te kabuanibwai: Martins Cove, Wyoming. A mwaiti bwaeoniia ake a mate ikekei man te baki ao man korakoran te tino ao te kamwaitorotoro. I uringa nooran bwariko n atiibu ni katukaki iaon ruanimateia ao n iangoa aron mwaitin aia onimaki irouia nikiraia bwaeoniia n anai aia aenikaa ao ni waaki ni mwananga (mainiku, ni kaineta manokun te Salt Lake). Te karaki anne e kakukureiai. Ngke I iangoa taekan te taneiai anne, I ataia bwa te naan bwaeoniia a karaoa te bwai ae kaangaanga ao Ngai naba I riai, n ikota te korakora ibukiia tariu ake a uarereke.
Moan namakinan ae rau e teimatoa ma ngai inanon te wiiki ao te iterana. I tekateka n te wiira kaintekateka ni matakuakina te bwaea weeki man winton te onaoraki n Aua bongin Turai ngke I waekoa n uringa te bwai teuana—akea tinau. E aki konaa ni mena ikekei n ira au angabeeba n au reirei ae rietaata. E aki konaa ni mena ikekei ngkana I a karekea au entaumente n te tembora. E aki konaa ni mena ikekei n au tai ni mare. Ai akea ngaia.
Anne ngke a moanna n rikirake bwaai ni matoatoa. E korakora marakin rangau, ao akea kanau ae I kan kanna. I mataku n te TV n akea nanou iai, ao angiin te tai I matu. Au utu a raraoma irou ibukina I aki bati n taatang.
A mwaiti ranin matau riki ngke ti a bon roko ni mweengara ae akea kaaina i Oregon. I waekoa n taui ni karaoi katabean tinau, ao tariu ma mwaaneu a aki toki n taraai ibukin karauan nanoia. I kataia ni kakorakoraai ibukiia. Ma e aki bebete.
Manga okiran te reirei e a matoa. Ni kabane a tia n ongo taekan te kabuanibwai, ao ngkana a tuai, a ongo taekana ngkana au tia reirei e kabwarabwaraai are ngai te ataeinnaine are I reke n te kabuanibwai. I namakinna bwa I tiku n ti ngai.
E a bon matoa riki ngke tamau e a manga iein ruaiwa namwakaina imwin maten tinau. I ataia bwa tinau te kauaei e na taraa n tamaroa ibukiia ara utu ao bwa ti bon kainnanoia, ma e bon matoa nakon kaetana.
Tiaki e kabwaranano bwaai ni kabane e ngae inanon te tai aei. I namakina mwaitin te tangira mairoun Tamau are i Karawa, au utu, ao au tia kairiiri n te Ekaretia. Tera ae buokai ni kamarurungai ao ni waakirake imwiin te kabuanibwai ni karaoan bwaai aika bebete are e na kakorakora au onimaki. Ni katoa bong imwaain nakou nakon au kainiwene I kabanea te aoa ni wareki booki aika tabu, tataro, ao ni koroboki inanon au tienero n au kabwate ni kunnikai. Inanon au kabwate ni kunnikai ae rau, I aki kona ni karekea te korakora ibukiia tariu ma mwaneu. I kona n tang n ae korakora n aron ae I tangiria ao ni bunra nanou nakon te Atua. I tuangnga bwa tera raoi ae I namakinna ao mwaitira mitinakin tinau irou. I ataia E ongo irou ibukina I namakini mwaitin ana nanoanga. Mwaawan te kabwate ni kunnikai arei e moanna n tabu irou.
Karaoan bwaai aika a beebete akanne a buokai n reitaki ma te Atua n oneamwin are N na butuia ni kararoa ao ni moanna n aki iraorao. I aki kakoaua bwa te Atua e karawawataia au utu rinanon te kabuanibwai n te kaa. I namakina riki te mwaaka n tiku n rau ni kairaki nakon Ana kantaninga ao reitinako ni waakirake rinanon matoan au bong. Ao iai tabeua oin raoi matoan boong.
Imwiin manga ieinin tamau, I tangiria ni karekea te banna ni katooto ibukiia tariu, ao I kamatoa n aki tangira buakakan au namakin nakon tinau te kauaei, ngaia are I reitinako n onimakina te Atua. Teuana katabetabeara inanon au boki Rikirakeu I Bon Irou e katuruaki karaoan tamaroan maiu inanon mweengau man kakorakoraan te iraorao ma kaain au utu inanon uoua te wiiki. Moanakin te kouru bon kataakin te riki n aron Kristo ao ni kaota te tangira rinanon te mwakuri. I iangoia n kataia ao ni buoka neiere tinau te kauaei.
Ibukina bwa a ikotaki ana utu tamau ao ana utu tinau te kauaei, a rang mwaiti bwain amwarake ni kaitiakaki. Ngaia are I a moanna mai ikanne. Ngke I bubuokia inanon uoua te wiiki, I namakina te kona ni kan tangira tinau te kauaei ao tiku n rau riki e ngae ngke I tuai ni kan kukurei ibukin te aroaro. Bebeten kabanean au tai ni bubuokia e buokai rinanon matoan taai ibukina I namakinna iai te Tamnei irou.
I teimatoa n aki oota ni bwaai ni kabane ibukin tera te kabuanibwai e riki nakoia au utu, ao ikanne e teimatoa ni matoatoa boong. Ma ai aron are a karaoia bwaeoniia, I a tia ni katuka onimakinan te Atua ao n tia n anganaki (iroun te Atua), te mwaaka n reitinako ni kataia ni karaoi bwaai e ngae ngke e kaangaanga.