Rongorongo ni Kakawari n Reirei
Te Utu E Katabuaki iroun te Atua
Tataromwaaka ni kamatebwaia te bwai n reirei aei ao n ukoria bwa ko aonga n ataia bwa tera ae ko na tibwaia. E kanga ataakin “Te Utu: Te Katanoata nakon te Aonaaba” ni karikirakea am onimaki iroun te Atua ao ni kakabwaiaiia naake ko tararuaiia rinanon te reirei ni kakawari? Ibukin rongorongona riki tabeua, nakon reliefsociety.lds.org.
Onimaki, Utu, Buoka
Tamnei i matan te Buenos Aires Argentina Tembora
“N taekan [kunaia kaain te Buraimwarii], ‘Te Utu Bon mairoun te Atua,’ … ti kauringaki n itiakin te reirei,” e taku Carole M. Stephens, Moan Kauntira n te Beretitentii n te Bootaki n Aine. “Ti reiakinna bwa tiaki tii te utu ae kakaawaki iroun te Atua ma ngaia ngaira naba bon mwakoron ana utu te Atua. …
“… Ana baire te Tama ibukiia Natina bon te baire n tangira. Bon te baire n ikotiia Natina—Ana Utu—ma Ngaia.”1
Unimwaane L. Tom Perry (1922–2015) man te Kooram n Abotoro are Tengaun ma Uoman e taku: “Ti kakoaua naba katein te utu ae matoatoa bon tiaki te bwai ae teimatoa irouia te botanaomata, kaubwain te aba ae teimatoa, ao kakaawakin te katei ae teimatoa—ma akanne ake bon aan te mwakoro ae akea tokina ao abanuean ao ana tautaeka te Atua.
“Ti kakoaua bwa te bootaki ao te tautaeka i karawa e na kateaki man te utu ao utu aika mwaiti kaaia.”2
“Aomata n tatabemaniia nako, e aki kakawaki bwa tera ae a rinanona n aia mare ke mwaitiia natiia, a kona n riki bwa taan katana ana babaire te Uea are e kabwarabwaraaki n ana katanoata te utu,” e taku Bonnie L. Oscarson, te Beretitenti ni Kabuta n te Bootaki n Ataeinnaine. “Ngkana ana babaire te Uea, e riai naba n riki bwa ara babaire!”3
Rakan riki Booki aika Tabu
Reirei n te Utu
Titita Julie B. Beck, te Beretitenti ngkoa n te Bootaki n Aine ni Kabuta, e reirei bwa kamatebwaian ao ana reirei te aro n te utu e boboto iaon te Karikibwai, te Bwaka, ao Ana Mwakuri ni Kamaiu Iesu Kristo:
“Karikan te aonaaba e karekea te tabo are a na kona ni maeka iai utu. Te Atua e karika te mwaane ao te aine ake ni kauoman a kakaawaki n iteran te utu. Bon mwakoron ana baire Tamara are i Karawa are Atam ao Ewa a na kabaeaki ao a na katea te utu ae akea tokina.
“… Te Bwaka e karekea nakoia bwa a na karikiia natiia mwaane ao aine.
“Ana Mwakuri ni Kamaiu[Kristo] e karekea te kona ni kabaeakiia utu n akea tokina. E karekea nakon te utu bwa a na kona n rikirake nakon ae akea tokina ao ni kakororaoaki. Te baire ni kakukurei, e aranaki naba bwa te baire ni kamaiu, bon te baire are e karaoaki ibukiia utu. …
“… Aio ana reirei Kristo. … N akean te utu, akea te baire; akea nanon te maiu ae mamate.”4