Titiraki ma Kaekaaia
“Tabeman aomata a tuangai bwa I riai ni karekeia raoraou ake aki ibuokanibwai ma au kainibaire bwa aonga ni kakorakora au kainibaire. E koaua aei?”
N te kabane, kakorakoran am kainibaire n rinanon riki reiakinan ao maiuakinan ana euangkerio Iesu Kristo, ao raoraom a kona ni buokiko ke n tukiko ni karaoan anne, Raoraom iai aia anainano iaom—man aron am iango, taetaem, ao am mwakuri nakon te aomata are ko a riki iai. Ibukin Kakorakorakiia Kairake e taekinaki, “Rineia raoraom ake a na ibuokanbwai ma kakawakim bwa ko aonga ni kakorakora ao ni kaunga temanna ma temanna ni maiuakinan kainibaire aika rietaata” ([2011], 16). Aekakin rao aikai a buokiko ni maiuakina ana euangkerio Iesu Kristo, ni kawakina am kainibaire, ao n riki bwa te aomata ae tamaroa.
E ngae n anne, tiaki ni kabane aomata ake ko reitaki ma ngaiia ti te arona aia kainibaire ma ngkoe ke ngaiia kaain te Ekaretia. E kakawaki te iraorao ma aomata ni kabane ni karineia n aron are e na karineia te Tia Kamaiu—ma te tangira ao te akoi. Ngkai ko reitinako n maiuakin am kainibaire, ko na riki bwa “te banna ni katooto ibukiia taan onimaki, n te taeka, n te aro ni maeka, n te tangira, n te onimaki, ao n te itiaki” (1 Timoteo 4:12). Rinanon am katooto, a na nooria bwa ko kanga ni kakabwaiaki man maiuakinan kainibaire aika rietaata, ao ko kona ni kaungaia bwa a na karaoa naba anne.
Ukora ana kairiiri te Tamnei ae Raoiroi—ao karekea te ninikoria ni mwakuri iaon Ana wirikiriki—ngkai ko rineia raoraom ao n nanomatoa ni kakorakora am kainibaire.
Rao aika Koaua
Au moan n ririki n te reirei ae te kauarinan e nako nanou bwa N nang aki kona ni kakaeia raoraou ake a na karinea au kainibaire. Imwiin te tai ae uarereke I a rena ma raorou ae kaain au kiraati, ao I tuangnga teuanne bwa Ngai kaain te Moomon. E titirakinai rongorongona, ngaia are I a anganna te boki ae uarerekeIbukin Kakorakorakiia Kairake. Ni moanaki man te bong anne, e a katoka ana taetae n titinaraa imatau. Ngkana raoraom bon rao raoi ni koaua, a na karinei am babaire ao ni buokiko ni kateimatoai am kainibaire.
Candela M., ana ririki 13, Buenos Aires, Argentina
Iriira ana Reirei te Burabeti
N tabetai e boni kaangaanga totokoan te kariiri ngkana ti kabanei ara tai ma raoraora ake a karaoi rinerine aika buakaka ke ni kataia ni kairiira bwa ti na karaoi rinerine aika buakaka. A tuangiira burabeti inanon te boki ae uarereke Ibukin Kakorakorakiia Kairake bwa raoraom “a na kaira am iango ao am mwakuri, ao ni buokiko naba ni karikiko bwa te aomata are ko na riki iai” ([2011], 16). I taku bwa ti riai ni karekeia raoraora ake a tauraoi ni karinei ara kainibaire ao ni kaotia bwa iai kukurein nanoia iroura ni kawakinan ara kainibaire.
Calvin W., ana ririki 6, Arizona, USA
Uringa Am Kainibaire
Raoraom ake akea aia kanibaire n ai arom a kona ni kamamaara ao n urui am kainibaire. Ngke I moan mwaing nakon au moan reirei ae boou, I kataia ni kaboraoai n taekin tabeua bwaai ake a na taekin aomata ake a mena irarikiu. I a kuri ni mwaninga tabeua au kainibaire ngke I a kataia n riki n aroia aomata ni kabane. I ataia ngkai bwa n te aro are ko na kanakoraoi iai am kainibaire, ko kainnanoiia raoraom ake a na boutokaiko ao n ibuokanibwai ma am kainibaire. I kakaitau n te kabane I a kuneiia raoraou n aron akanne ibukina a kauringai n au kainibaire.
Logan J., ana ririki 15, Utah, USA
Kateimatoa n Tabekarake Am Kainibaire
Raoraom ma aia kainibaire aika kakaokoro a aki riai n kakorakora am kainibaire, ma arom n riki bwa raoraoia, ko kona n anganiia te katooto ae tamaroa are a na iria. Ngkana iai raoraom ake a ibuokanibwai ma am koaua, e kona ni kakorakorako n ninikoria ni katana te bwai ae eti.
Warren S., ana ririki 14, Oregon, USA
Raoraom aika Tamaroa Bon te Kakabwaia
Ngkana a aki ibuokanibwai raoraom ma am kainibaire, e na taraa riki ni kaangaanga ni kakorakora oin am kainibaire. Ni wareka Ibukin kakorakorakiia Kairake e buokai n taainako n rineia raoraou aika tamaroa ake a karineai. Ngkai I a katauraoai n nako ni mitinare, ao I ataia bwa karenaakiu ma aomata ma au kainibaire a buokai n teimatoa ni kakaonimaki inanon te euangkerio.
Nair M., ana ririki 19, Buenos Aires, Argentina
Taua Kamatoa te Kai te Biti
Karekeaia raoraom ma aia kainibaire aika tamaroa bon te bwai raoi ae ko tangiria. Ko tangiria ni kan otabwaniniko ma raoraom ake a na buokiko ni kawakin tuua ao ni kaungako ni maiuakina ae raoiroi. Reitinako taua ni kamatoa te kai te biti, are e kairiiri nakon te kai ni kamaiu, tiaki nakon te kateitei are e bubura man mwaawawa. Ngkana ko otabwaniniko ma baika aki raoiroi a na kairiko nakon taian kariiri. Karekeia raoraom aika tamaroa ake a na anaa nanom nakon maiuakin te euangkerio.
Annie P., ana ririki 13, Utah, USA
Tataro ni Kakaeiia Raoraom
Imwiin mwaingiu ma au utu nakon te tabo ae kaokoro, I teimatoa n tataro ni kakaeiia raoraou ake N na kona ni maroroakina te euangkerio ma ngaiia. Ngke I tataro, I namakina bebeten nanou, ao tabeua namwakaina imwiina a reke tabeman raoraou aika kakateke. I katan iaan aia boutoka, ao a tia ni buokai ni karikirakea au tangira ae korakora ibukin te euangkerio. I ataia bwa raoraom a kakawaki ao a kona ni kabebetea nakoira maiuakinan te euangkerio.
Sarah P., ana ririki 16, Rio de Janeiro, Brazil