Tamneina
Ana Kabanea n Amwarake Melva
E maeka te tia korokaraki i Utah, USA.
“Ko tangiria ni kataia ni kana te toa?” I tuanga tinau ae e nang mate.
Kamaataata n te tamnei iroun Christopher Thornock
Tinau e maiu nakon ana ka-92 n ririki ao e a tibwa tia ni mate. E mena n te o n aoraki ngke a iangoia taokita bwa akea te bwai ae kona ni karaoaki ma e na ti kawakinaki ni ka-mweengaraoaki ni karokoa e mate.
Ngke e a tia te katauraoi ibukin uotakina nakon mweengana, uoman taari man te uoote a roko nakon te ruu ao n tuangai ngkana e tangira tinau te toa. N te moantai I tuangiia, “E aki, kam rabwa.” E a kan aki kona n ongnga tinau. Ngkanne I taku, “N te kauoua n iango, N na tuangnga.” I kaniai nakon taningana ao n taku, “Iai uoman kaain te nakoanibonga ikai. Ko tangiria n taua te toa?” N te bwanaa ae maaraara man itiaki e kaeka, “Eng.”
Imwiin kakabwaiaan te kariki, I ana mwakoron te kariki man te turee, urua mwakorona ae uarereke, ao ni karaurau ni katikua inanon wiina. E kataia n tenaia teutana, ao I karaurau ni karautaeka nakoia mwaane bukina bwa e na maan teutana. A kakoaua nakoiu bwa ana akea te kaangaanga. Imwiin kakabwaiakan ranin te toa, I ana te mwangko te buraetitiki ae uarereke ao n angan riana. E ana teutana te tim, ma I rangin ni miimi bwa e rangin n nakoraoi ongakina.
I kaitauiia taari, ao a nako nakon te ruu are teuana. E mate tinau ma te rau tao teuana te aoa imwiina.
N te bong are imwiina, I namakina te tai ae rangin n tabu ae I a tia ni kariaiakaki n tibwauaia ma tinau. Te kabanea ni bwai ae karaoia n te maiu aei bon kanakin te toa. Te kabanea n taeka ae e taekinna bon”—eng ni karekea te toa, eng n anga ana karea n “te nano ae uruaki ao te tamnei ae raraoma” (3 Nibwaai 9:20), eng ni katoka iaona aran Iesu Kristo ao ni berita n aki toki n ururingnga, eng ni karekea Tamneina. Kabanean bwaai ake a rinanon riana bon kanikina n te toa.
Ana aekakira aron kukureina n ana kabanea n amwarake! E ngae ngke e rangin ni mamaara ni kakamwakuri ke n taetae, e kanga ana namakin n aron kamaiuakina inanon Kristo! Aekakira kukureina ae a tia n namakinna ibukin Mwaakana ni kamaiu ao ni konabwai, are e na buokia n rinanon ana kabanea n tai ni mwanangana n te maiu ae mamate ao ni karekeaki nakoina te kantaninga ibukin te maiu are akea tokina.
Ni katoa wiiki ngkana ti taua te toa, au kantaninga bwa ti na bane ni kukurei ibukin te tai are ti na kaboua iai ara berita aika tabu ao n namakina kabwaraan ara bure ao te nanoanga man ara kekeiaki n riki n ai aron Tamara are i Karawa ao Natina, Iesu Kristo. Ngkanne te kariki ao te ran a kona n tei ibukira, n aron are e riai n tia n riki ibukin tinau, “e karewerewe riki nakon bwaai aika a karewerewe, … ao n itiaki riki iaon bwaai ni kabane aika a itiaki” (Aramwa 32:42).