Bwanaaia Aika Itiaki ni Boong Aika Kaitira
Anera aika Araia Ten ao Nei Dunn
Kamataata iroun Wilson Ong
I mataku n te TV ngke e weteai tinau n tuangai bwa mwaanena, ai tamau ae Floyd ae 92 ana ririki, ao buuna, ai Tinau ae Millie, a rootaki n te aoraki ae te biua ao ai akea kanaia n aia auti. Aki naba marurung n nakon te titoa ni karekea te bwai teuana. Ai tamau ae Floyd ao ai Tinau ae Millie akea riki aia utu ae uakaan ma ngaia, ngaia are bon akea ae e na kona ni buokiia.
E kan ataia tinau ngkana I kona n ibuobuoki. Bon tii ngai kain te Ekaretia ni mwakoron te utu anne, ao I a tia ni weteaki n bwa N na ibuobuoki n aekakin aikai mai imwaaina. Te kaangaanga bwa I maeka i Utah, USA, ao ai tinau ao ai tamau a mena i Hemet, California, USA.
I tuanga tinau bwa e na anganai tabeua te miniti bwa N na iangoa te bwai ae N na karaoia. Iai raoraou ae e maeka n uakaan ma Hemet, ngaia are I a tareboniia n ongora ngkana iai ae e kina i Hemet. E tuangai taekan te aine ae e beku n te Tembora n te Redlands i California ae arana Titita Dunn are bon te beretitenti n te Bootaki n Aine ikekei.
Ngke e kaeka Titita Dunn iaon te tareboon, I kaeka, “Mauri, Titita Dunn. Ko aki kinaai, ma arau bon Nancy Little, ao I maeka i Utah. Ngai kaain te Ekaretia, ma ai tamau ao ai tinau ake a maeka i Hemet tiaki kaaina. A rang aoraki ao akea kanaia n aia auti.” I tuangnga te tabo are a maeka iai, are e raroa man te tabo are e mena iai, ao ni kabwarabwara bwa I tii kan karekea rongorongon te tabo n amwarake ae uakaan ma ngaiia are e na kona n nikira te amwarake.
Ibukin buokan te kanganga aio, Titita Dunn e anga nanona bwa ngaia ma kainnabana a na uota te amwarake nakoia ai tinau ao ai tamau. N te tai ae karina ao iai aia tuubu ao aia kariki, ao tinana e a tibwa tia ni karaoi taian kuukii. I totoko aei bwa e na aki karaoia ma ngaia e teimatoa ni kan karaoia.
Tabeua te aoa imwiina, e tareboon Titita Dunn ao e kamatoa nakoiu bwa a nakoraoi bwaai ni kabane. Tinau e tareboon imwiina ao e tuangai te bwai are e taekinna ai tamau ae Floyd ni kawarakia . E taku, “Anera a roko ni mweengau ao araia bon Ten ao Nei Dunn. A roko ma uotaia te amwarake ae mwaiti: uanikai, kainamwarake, tuubu ake a bon karaoi, kariki, ao kukii. Bon kukii aika moan te kangkang ae I a bon tibwa kanna.” Rokoia taangan Dunn irouia ai tamau, a buokiia ni kainnanoia, ao imwiina te Tari Dun e uota ai tinau ae Millie, are e rootaki n te kaikeike, man ana kainiwene nakon te kaintekateka n te umwanikuuka bwa e aonga ni kamwarakeaki iroun Titita Dunn.
Ngke e tareboniia tinau ai tamau Floyd n tuanga taekan kawarakina, e tang. E taku bwa e tuai man kaitibo ma aekaki n aomata aikai aika a rang akoi man mwamwannano. E tuanga tinau bwa I tekeraoi ngkai I maeka i Utah ao n otabwaniniaki irouia “ni kabane kaain te Moomon.”
Aua te bong imwiin kawarakiia, ai tamau Floyd e otinako nakon ana bwaoki ni meeri ao e marannanko ao ni bwaka. E boo atuna ao e mate aua te bong imwiina. N aki wareka te neeti n tararua ni mweengaia, te Tari ao Titita Dunn bon ngaiia kabanea n aomata ake a noora ai tamau imwaain matena.
I rang ni kakaitau n ai aron ana banna ni katooto Kristo iroun temanna tariu n te Bootaki n Aine ae maeka bubua ni maire raroana, te aomata are I bon tuai ni kaitibo ma ngaia, are e buokiia ai tinau ao tamau.