Te Rongorongo man te Moan Beretitentii
Kakabwaia n Te Ongotaeka
Iroun Beretitenti Thomas S. Monson
Kamatataaki n te Korotamnei Iroun Jim Madsen
“Te reirei ae te kabanea ni korakora are ti kona n reiakinna man te maiu n rabwata,”e reirei Beretitenti Thomas S. Monson, “ngkana e taetae te Atua ao ti na ongotaeka, ti na etieti n tainako.”1
Ti na kakabwaiaki naba. Ngke e taekinna Beretitenti Monson n tain te maungatabu ni kabuta ae e a tibwa nako: “Ngkana ti kawakin tuua, ti na rang kukurei ni maiura, e na kaonrakeira, ao e na aki rang kaangaanga. Kakaewenakoara ma ara kaangaanga a bon bebete uotakiia, ao ti na karekei Ana berita [te Atua] n taian kakabwaia.”2
Man reirei aikai mairoun Beretitenti Monson ngkai e Beretitenti n te Ekaretia, e kauringiira bwa taian tua bon ngaiia kairi ni koaua nakon te kukurei ao te rau.
Kairi ibukin te Mwananga
“Ti aki anganaki ana tua te Atua bwa a na karawawataira ke n riki bwa bwaai aika a na tuuka kukureira. Kaitaraana e boni koaua. Teuare e karikiira ao are e tangiriira ma te kororaoi e ataia bwa e na kanga arora ao tera ae ti na karaoia bwa e aonga n reke iroura te kukurei ae korakora ngkana e riai. E a tia ni katauraoi kairan kawaira are, ngkana ti toui mwiia, e na kairiira ni kamanoira rinanon te mwananga n rabwata ae kakamaaku. Ti uringa mwanewen te anene ae kinaaki: ‘Kawakin tuua! Inanon arei iai te kamanoaki; inanon arei iai te rau’ [taraa “Keep the Commandments,” Anene n Taromauri, nambwa. 303].”3
Te Korakora ao te Rabakau
“Te ongotaeka bon te kanikina ae okoro irouia burabeti; e a tia n katauraoa te korakora ao te rabakau nakoia rinanon rooro ma rooro. E kakaawaki iroura bwa ti na ataia bwa ngaira, naba, ti katauaki nakon te korakora ao te wanawana aei. E tatauraoi nakoira n tatabemaniira nako n te bong aei ngkai ti ongotaeka nakon ana tua te Atua. …
“Te rabakau are ti ukoukouria, te kaeka are ti rang tangiria ni karekea, ao te korakora are ti tangiria n te bong aei ni kaitarai kakaewenako n te aonaaba ae kaminonano man bibitaki e kona n riki bwa ara bwai ngkai ti anganano ma te tauraoi n ongotaeka nakon ana tua te Uea.”4
Rinea te Ongotaeka
“Te anua n ara tai e tatao riki nakon te anua ae bure. Maekatiin ao kamataku n te terewition e kaota tamneia aekita aika a rang kinaaki n te tamnei, taan takakaro aika a rang mwaatai—naake a rang kan katotongiia aomata aika kairake—ngkai a aki butimwaea ana tua te Atua ao a karaoi mwakuri aika a bure, are e na kareke mwiina ae aki tamaroa. Tai kakoaua! Iai te tai ae e na motikaki iai taekara—n aron kabaerantan te akaunti. Ngaira nikabane kanga ai aron Tinterera ae iai ana nuukanibong—ngkana tiaki n te maiu aei, ngkanne n te maiu ae e na roko. E na roko te Bong ni Motikitaeka nakoira ni kabane. … I bubuti ngkami bwa kam na rinea te ongotaeka.”5
Te Kimwareirei ao te Rau
“E kona n ae tarakia iroum naake a mena i tinanikun te aonaaba a karekea riki te kukurei ae bati nakoim. Tabeman mai i buakomi a kona n namakina te kabaeaki man tuan te aroaro are ti iria ngaira n te Ekaretia. Tariu ao mwaaneu, I kaotia nakoimi, n aron anne, bwa akea te bwai ae kona ni uota te kimwareirei nakon maiura ke te rau riki nakon rabwatara nakon te Tamnei ae kona n reke iroura ngkana ti ira te Tia Kamaiu ao ni kawakin tuua.”6
Nakonako n te Aro ae Riai
“I kakoaua nakoimi bwa ara berita ibukin kakabwaia a koro mwaitiia. E ngae ngke rinanon waaki ake ti mena inanona a kona n taraa ni kakamaaku ao rinanon kataaki ake a roko inanon maiura, ara atatai n te euangkerio ao tangiran Tamara are i Karawa ao ara Tia Kamaiu e na karaui nanora ao e na kamatoaira ao n uota te kukurei inanora ngkai ti nakonako n te aro ae riai ao ni kawakin tuua. Akea te bwai teuana n te aonaaba aei ae e na kona ni konaira.”7
Iriirakin te Tia Kamaiu
“Antai te Aomata ae taonaki n te rawawata, man ataa te korakai? Antai te Uea ae ana bwai te neboaki, Iehova Tabaota? Bon Ngaia ara Mataniwi. Bon Ngaia ara Tia Kamaiu. Bon Ngaia Natin te Atua. Bon Ngaia te Tia korea taekan Kamaiuakira. Bon Ngaia are e anganiira te kanikina, ‘Ko na irai.’ E anganiira kaetieti, ‘Ko na nako, ao kakairi irouna.’ E bubuti, ‘Kawakin au tua.’
“Ti a bane n Iria. Ti na kataia n ira ana banna ni katooto. Ti a ongotaeka nakon Ana taeka. Man karaoan anne, ti na anganna bwaintangira mai eta n te kakaitau.”8