Riiki bwa Taan Kakoaua iroun te Atua
Mairoun Beretitenti Russell M. Nelson
Beretitenti n te Kooram n Abotoro ake Tengaun ma Uoman
Man te taromauri ni kabutaa te aonaaba ibukiia kairake n ikawai, “N Riki Bwa Taan Kakoaua iroun te Atua,” ae kanakoaki n te Brigham Young Iuniwetiri–Hawaii n Tianuare 10, 2016. Ibukin bwaninin te marooro, nako nakonbroadcast.lds.org.
Ao ngkami bon ”te roro ae rineaki,“ aika a kaman rineaki iroun te Atua bwa kam na karaoa te mwakuri ae kamimi—ni buoka katauraoaia aomata n te aonaaba aei ibukin te Kauaoki.
Kamatata n te tamnei iroun Scotty Reifsnyder
A mwaiti aomata aika a atong ngkami bwa taan kakoaua iroun te Atua. N na kakoaua anne ngkana a araniko taan kakaae n te taeka anne ao ni kabwarabwara mwiin aia kamatebwai aika reke iaon bwaai ni kabane, n aki ti kaineti nakon te aomata anne ke te kurubu—bwaai aika ko tatangiri ao aika ko riribai, am namakin ao bwaai aika ko aki toki ni kakaraoi, korakoram ao mamaaram—I aki tangiria. Iai te bwai n aron kabonganakin te taeka ae te tia kakoaua iroun te Atua ae katabetabea nanou. Ma ae koaua riki, e aki rangin n anaaki nanou n aron te bwai ae a na taekinna taan rabakau ibukim nakon are e a tia te Uea n tuangai ibukim.
Ngke I tataro ibukimi ao n tuanga te Uea bwa E kanga ana namakin ibukimi, I namakina te bwai ae rangin ni kaokoro man are a taekinna taan kakaae. Te namakin n tamnei ae I a tia ni karekea ibukimi e kairai ni kakoaua bwa te taeka ae te tia kakoaua iroun te Atua e kona n ae e tau ibukimi—ma bon ibukin nanona ae rangin ni kaokoro are e na kona n ataia te tia rabakau.
Te taeka ae te tia kakoaua iroun te Atua e tau ibukim ngkana te taeka anne e kauringko bwa antai raoi ngkoe ao tera am kantaninga n te maiu raoi aei. Te tia kakoaua raoi iroun te Atua bon te aomata ae e reirei ao e reiakina a na euangkerio Iesu Kristo imwain rokona n te aonaaba aei ao are e karaoi berita aika tabu ikekei ma Tamara are i Karawa iaon bwaai aika kaunganano—n raonaki ma bwaai aika riai—are teuanne ke neienne e na karaoi ikai iaon te aba.
Te tia kakoaua raoi iroun te Atua bon te mwaane ke te aine are e onimakinna raoi te Atua ae na kanakoa nakon te aonaaba n tain te kabanea ni kakawaki ni bong n rongorongon te aonaaba aei. Te tia kakoaua raoi iroun te Atua bon te mwaane ke te aine ae maiu ngkai ni buokiia ni katauraoiia kaain te aonaaba aei ibukin Kauaokin Iesu Kristo ao Ana tai ni kaota koauan uean te Atua. Ko riai ni koaua bwa—ko bungiaki ma te kantaninga are ko na riki bwa te tia kakoaua raoi iroun te Atua.
Te titiraki e kangai “Ko na kanga ni kona n tei ao n riki bwa te tia iriira raoi te Atua ngkoe?” Iai aua au iango iaona.
1. Reirei Bwa Antai Raoi Ngkoe
Karekea am tai n iangoia ma te tataro mwaaka taekan koaua aikai:
-
Ngkoe natin te Atua te mwaane ao te aine aika kamwa tia n rineaki.
-
Kam karikaki ni Katotongana.
-
Ko reireinaki n te aonaaba n tamnei ni katauraoiko ibukin bwaai ni kabane aika ko na kaitaraaki ma ngaai ni mwakoron taai aikai ni boong aika kaitira (taraa D&C 138:56). Tera ae ko a tia n reiakinna e a tia n tiku iroum!
Ko taratara imwain rokon te Uean, te kabanea n tai are e na tia iai ana mwakuri te Uea nakon kabanean auan te mwakuri. E a tia te Uea ni katanoata bwa aio te kabanea n tai ae E na weteia ana tia mwakuri nakon Ana nne ni kurebe n ikotiia ake a rineaki man maninganingan te aonaaba ake aua. (Taraa D&C 33:3–6.) Ao ko kanakoaki bwa ko na ibuobuoki ni karaoan te ikoikotaki aei. A mwaiti taai ae i a tia n nooria imatau ana kairooro te tia kakoaua raoi iroun te Atua ae mwaaka ngke a uotiia aomata tabeman (aika tiaki kaain te ekaretia) nakon taekan te koaua. Aio mwakoron kinakimi ao ami kantaninga ngkai ngkami ana kariki Aberaam (taraa I-Karatia 3:26–29)!
Tabeua namwakaina n nako kainabau, Wendy, ao Ngai ti karekea te atatai ae moan te kamiimi n aban Tiberia ae raroa nako. Ibuakoia ake raora ni mwananga n ara bong n ni katauraoi i Irkutsk bon te beretitenti n te mition, Gregory S. Brinton; kainabana, Sally; ao natiia te mwaane ae a oki ni mitinare, Sam, are e mitinare i Russia. Ti kawara Lake Baikal ae moan te tikiraoi ao te tabo ni mwakete i mataniwiin te nei anne.
Ngke ti a oki nakon ara kaa te waen, ti kunea bwa e a bua Sam. Tabeua te tai imwiina ao e kaoti, n raonaki iroun te aine ae taraa n ae abwi ana ririki ae arana Valentina. N ana katei n Rutia, e takarua Valentina ma nanona ae korakora, “I tangiria ni kaitibo ma tinan te ataeinimwaane aei. E rangin ni karinerine, wanawana, ao n akoi! I tangiria ni kaitibo ma tinana!” E katikaki ana iango Valentina nakon te ota ae kaona matan Sam.
Sam e kabwarabwara Valentina nakon tinana ao tamana, e anganna rongorongon te Tia Kamaiu n te koroboki, ao e baireia ma mitinare bwa a na kawaraia. Ngke a kawara te aine arei mitinare imwiina ma katotoon Ana Boki Moomon, e berita bwa e na warekia. Tabeman naba aine aika a mwakuri n te tabo ni mwakete a rangin n ingainga nanoia n te boki ae boou are e a tia ni karekea Valentina. Ti tuai n ataia bwa tera ae riki imwiin taai aikai, ma ibukin te aro n tamnei ae onoti ae a kona aomata n namakinna iroun Sam, e a tia Valentina ao tabeman raoraona ni kabwarabwaraaki nakoia te euangkerio.
Taan kakoaua raoi iroun te Atua n aron Sam a ataia bwa antai raoi ngaia. Bon ana reirei ni koaua Iesu Kristo aika aki toki ni kabonganai aia tai ni buokiia ao tabeman ni katauraoia ibukin te Mireniam, ngkana e tautaeka te Tia Kamaiu (ni kabuta te aonaaba).
Ngaia ae, au moan ni baire bwa ko na ataia bon iroum bwa antai raoi ngkoe. Tuanga Tamam are i Karawa n aran Iesu Kristo bwa E kanga Ana namakin ibukim ao am mwakuri ikai iaon te aba. Bwa ngkana kam bubuti ma nanomi raoi, ao e na wirikirikiniko te Tamnei ni koaua (ae kona ni bita maium). Koroi mwiin naano aikanne, rinanoi n tainako, ao iri raoi naanoia.
I berita nakoim bwa ngkana ko oota teutana n ana iango te Tama are i Karawa ao tera ae E kantaningaia bwa ko na karaoia Ibukina, e na aki tiku maium n arona!
2. Kantaninga—ao Katauraoi—ni Kakoroinanon bwaai aika a kaangaanga karaoaia
E a tia n tainako te Atua n titirakiniia natina aika a tia ni karaoi berita aika tabu ma Ngaia ni karaoi bwaai aika a kangaanga. Bukina bwa ngkami natin te Atua mwaane ao aine aika kam kawakin ami berita aika tabu aika kam maeka ni mwakoron boong aika kaitira, te Uea e na tuangkami bwa kam na karaoi bwaai aika a kaangaanga. Ko kona ni kakoaua bwa e na bon riki te bwai anne—A tia n taainako aomata n teimatoa ni kataaki n aron kataakin Aberaam (taraa D&C 101:4–5).
I ata aron te kai un ae kona n reke n tuangaki bwa ko na karaoa te bwai teuana ae ko taraa n aki kona ni karaoia. I a tia n riki bwa kaain te Kooram n Abotoro n te Tengaun ma uoman ti ibukin te 19 namwakaina ngke e mate Beretitenti Spencer W. Kimball (1895–1985). N aia moan boowi te Moan Beretitentii ao te Kooram n Abotoro n te Tengaun ma uoman n rimwiaki ma katabuana (bwa te Beretitenti n te Ekaretia) Beretitenti Ezra Taft Benson (1899–1994), e anga mwakuri aika onoti nakoia te Tengaun ma Uoman. Ana kaetieti nakoiu a raonaki ma taeka aikai: “Unimwane Nelson, tabem bwa ko na kanakoraoa tataekinan te euangkerio iaon aban Eurobe Maiaki.”
Anne n te 1985. N tain ririkin te ikatikitiki ae ti aranna bwa te bobuaka imarenan te U.S ao U.S.S.R. are e moanaki n te tai ae aki maan imwiin te Kauoua ni Buaka n te Aonaaba, e aki ti tibwaua oon Berlin, ma ni kabane Eurobe Maiaki a mena naba iaan ana kairoro te tautaeka ni komuniti. A bane n aki waaki ekaretia, ao te nebonebo irouia aaro a tiatianaki iroun te tautaeka.
I a tia ni kabanea angiin au mwakuri (bwa te tia korokoro iaon te buroo) e nanonaki n aei, bukina bwa Beretitenti Nelson bon te tia korokoro iaon te buroo ni karaoi korokoro ni kamaiu, ma akea au atatai ae e na kairai ni kakoaua ae N na kona ni kauki aaba ibukin tataekinan te euangkerio. Ma, e a tia n anganai te burabeti tabeu, ngaia ae I a waaki (ni kataia) ni karaoa te bwai ae taraa n rang ni kaangaanga.
Ma n te moa n tai (ni mwakuri iaon te beku anne) I rinanoi kaangaanga aika mwaiti. I roko n angiin aaba ao n aki ataia bwa N na nakea. E ngae ngke I kona ni kunea aran te tia mwakuri n te tautaeka, e bon aki riai bwa e na kamaunaaki te bowi n te kabanea n tai ke ni manga taonaki. N te aba teuana, ngkana e taonaki te bontaeka ibukin uoua te bong, tabeua kabwakabwaka a katukaki inanon kawaiu bwa ana kataai—n raonaki ma kamwane ibukin kabobwai aika aki eti iaan te tua ao waaki ni kakukurei riki tabeua aika a bure iaan te tua. N te tai teuana, e kaukaki te bootaki ma te kairoro are N na kitana te aba n te tai naba anne!
Ma te Uea e kona ni karaoa oin Ana mwakuri (taraa 2 Nibwaai 27:20–21), ao e reke au tai ni matakuakin aekan kakai aika riki—n taainako, ao ti, imwiin ae I a tia n anga au iango ae te kabanea n tamaroa, au mwakuri korakora, ao au tataro mwaaka nakon te mwakuri.
Tabeua mai ibuakon aaba (iaon Eurobe Maiaki) a tia n anga kinakin te Ekaretia iaan te tua imwain ae urubekeaki ni kabwakaaki te oo are i Berlin. Kinaakiia mairouia tabeman a roko imwiina. N te 1992, I a kona n ribooti nakon Beretitenti Benson ae a tia te Ekaretia ni kateaki ni kaawa ni kabane iaon Eurobe Maiaki!
N tabem ae te tia kakoaua iroun te Atua are e a tia te Uea ni katuka ana onimaki iaom, ko karekea naba te rongorongo! Ko na tuangaki bwa ko na butimwaai mwakuri aika kaangaanga ao n riki bwa tabonibain te Atua. Ao E na anganiko to kona ni kakoroi nanon mwakuri aika a kaangaanga.
Ko na kanga ni kakoroi nanon mwakuri aika a kaangaanga. Man karaoan te bwai ae na kona ni kakorakora iai am onimaki iroun Iesu Kristo, man karikirakean ootam n te reirei ae reireinaki inanon ana Ekaretia ae kaokaki, ao man n teimatoa ni ukoukora te koaua. Ngkana ko tuangaki bwa ko na karaoi bwaai aika a kaangaanga, ngkoe—ae te tia kakoaua iroun te Atua ma te aa (n tamnei) ae matoatoa ae kateaki iaon reirei aika itiaki—e na kona ni butimwaea te mwakuri ma te onimaki ao te nano ae teimatoa ao ni kukurei ni karaoi ni kabane ake a mena inanon mwaakam ni kakoroa ana kantaninga te Uea (taraa D&C 123:17).
E na iai boong aika ko na bon aki kukurei iai. Ngaia ae tataro ibukin te kekeiaki ma tiaki te bwarannano! Ko na kainnanoa te korakora anne ibukina bwa e na kekerikaaki kinakim bwa te aomata ngkoe ae Itiaki ni Boong Aika Kaitira. Te kananokawaki, bwa tabeman aika ko taku bwa raoraom ana kabwara nanom. Ao tabeua bwaai ana taraa n aki raoiroi.
E ngae n anne, I berita nakoim bwa ngkana ko iriira Iesu Kristo, ko na karekea te rau ae teimatoa ao te kukurei ni koaua. Ngkana ko kawakin am berita aika tabu ma te nano ae rikirake, ao ngkana ko kamanoa te Ekaretia ao abanuean te Atua iaon te aba n te bong aei, ao e na kakabwaiako te Uea ma te korakora ao te wanawana ni kakoroi nanon aika a kaangaanga.
3. Reirei Bwa Ko na Kanga ni Karekea Mwaakan Karawa
Ngaira n tatabemaniira iai ara titiraki. Te kakaae n reirei, oota, ao kinakin te koaua bon mwakoron ara atatai n te maiu aei ae kakawaki. Angiin maeiu e a tia ni bane iaon karaoan te ukeuke. Ngkoe naba ko na reiakina ae moan te tamaroa ngkana ko titiraki iaon titiraki aika kairaki iroun te tamnei.
N te tai aei tabeman mai ibuakomi aika a kekeiaki ni kan ataia bwa tera ae ko riai ni karaoia ma maium. Tabeman mai ibuakomi ana titiraki ngkana a tia ni kabwaraaki ami bure. Angiia mai ibuakomi a na titiraki bwa antai ae a na mareaki ma ngaia ibukin te maiu ae akea tokina, ao e mena ia te aomata anne—ao a riai naake aki iangoia bwa a na karaoia.
Tabeman a na miimi bwa bukin tera te Ekaretia e karaoi tabeua bwaai aika e karaoi. Tao angiia mairoumi aki koaua bwa a na kanga ni karekei kaekaan ami tataro.
Tamara are i Karawa ao Natina a tei n tauraoi n tainako ni kaeka nakon am titiraki rinanon ana mwakuri n ibuobuoki te Tamnei ae Raoiroi. Ma bon tabem bwa ko na reiakina arom n tau ibukina ao ni karekei titiraki aikanne.
N aanga ra ae ko kona ni moanna mai iai (n reirei bwa ko na kanga n tau ibukin ao ni karekei kaeka aikanne)? Moanna man kabanean riki am tai iaon taabo aika tabu. Te tembora bon te tabo ae tau. Ma man te umwantabu, ike ko kabowi iai am berita aika tabu ni katoa Tabati man tauan te toa. I kaoko naba bwa ko na karaoa am tabo ni maeka, am toom, ke am kainiwene te tabo ike ko kona iai ni kaokoro man buakakan te aonaaba.
Te tataro bon te mwakuri ae riai ni karaoaki (bwa ko aonga ni karekei kaekaan am tataro). Tataro bwa ko na ata te bwai ae ko na katoka karaoana ao tera te bwai ae ko na moana karaoana. Tataro bwa tera ae ko na karinna n am otabwanin ao tera ae ko na kanakoa bwa e aonga te tamnei ni memena iroum n tainako.
Tataro nakon te Uea ibukin te bwaintituaraoi n te motiraoi Ngaia ae maiuakina te maiu ae tau bwa ko aonga ni karekea te bwaintituaraoi anne bwa ngkana a riki kamangaongao n te aonaaba, ko na ata raoi te bwai ae koaua ao ae aki (taraa 2 Nibwaai 31:13).
Beeku ma te tangira. Karekean te mwakuri ma te tangira nakoia ake a tia ni bua kawaia ke a ikuaki n tamneia e katauraoiko ni karekea am kaotioti.
Kabanea riki am tai—te tai ae mwaiti riki—n taabo aika iai te Tamnei iai. E nanonaki n te tai ae bati riki ma raoraom aika a ukeukera reken te Tamnei irouia. Kabanea riki am tai ni katorobubua n tataro, te tai ae bati riki ni wareki booki aika tabu, te tai ae bati riki ni ukoukoriia am utu, te tai ae bati riki n te tembora. I berita nakoim bwa ngkana ko teimatoa n anga am tai ae tau nakon te Uea, E na kariaia bwa ko na kakoroi nanon aika bati riki ma nikiran am tai.
Ti kamatoaia 15 mwaane aika a katabuaki bwa burabeti, taan mamata ao taan kaotioti. Ngkana e reke te kaangaanga ae moan te kaaangaanga—ao a na taraa n ti karekea te kaangaanga ni katoa bong—mwaane aika 15 aikai a kekeiaki ma te kaangaanga, ni kataia n noori mwiin mwakuri aika a kakaokoro, ao a ukoukoria ma te wanawana n ongo bwanaan te Uea. Imwiin au aki mamatam, tataro, kamatebwai, iango, ao n reirei ma Tariu iaon bwaai aika a kaangaanga, bon te bwai ae I aki taneiai iai ni kautaki n te tairiki ma iangoan kaangaanga aika ti tabeaianga iai. Ao ti tebo naba te atatai are anne ae reke iroun Tariu.
Te Moan ni Beretitentii n te Kooram n Abotoro n te Tengaun ma Uoman a uaia n reirei ao tibwauai(imarenaia) bwaai ni kabane ake e a tia te Uea n tuangiira bwa ti na kona ngaira n tatabemaniira n ataia ao n namakinna. Ao ti na taraa mwaakan te Uea iaon te Beretitenti n te Ekaretia ni kamaataata ana kantaninga te Uea.
Te kawai ni burabeti aei e karaoaki n 2012 ma te bitaki n te ririki mai inano irouia mitinare ao riki ma karinakina n te tai ae aki maan n nako inanon ana Aeniboki te Ekaretia, imwiin kariaiakan te mare ni mwaaine iaan te tua n aaba tabeua. Ni kaonaki ma te nanoanga ibukiia aomata ni kabane, ao riki ibukiia ataei, ti kekeiaki n te tai ae maan n ataa ana kantaninga te Uea n te bwai aei.
N ururingnga n tainako ana baire ni kamaiu te Atua ao Ana kantaninga ibukin te maiu are akea tokina ibukiia Natina ni kabane, ti iangoi kakaokoro aika aki reke warekaia ao ikotakin kaangaanga aika kona n riki. Ti kaitibo ni kabane n te tembora n taai aika mwaiti n aki mamatam ao n tataro ao n ukoukori riki kaetieti ao kairi mai ieta. Ao ngkanne, ngkana e kaira Ana burabeti, Beretitenti Thomas S. Monson te Uea, ni katanoata ana iango ao ana kantaninga te Uea, ngaira n tatabemaniira n te tai ae tabu anne ti namakina te kamatoa n tamnei. Bon tibwangara n tabera n Abotoro ni kamatoa te bwai are e a tia ni kaokaki nakon Beretitenti Monson. Te kaotioti mairoun te Uea nakoia Ana toro bon te mwakuri ae tabu, ao bon tibwangam naba ni karekei kaotioti bon iroum.
Tariu ao mwaneu aika tangiraki, iai ami tai ae rawata ni kabonganai ana iango ao ana kantaninga te Uea bon ibukin maium ngkai ngaira Abotoro ti karaoi ibukin Ana Ekaretia. N aron te kawai are e tangiria Abotoro te Uea bwa ti na karaoia n ukoukori (kaeka) ao n iango, n aki mamatam ao n tataro, ao ni kamatebwai ao ni keiaki ma titiraki aika a kaangaanga, E tangiriko bwa ko na karaoa ae ti tebo ma anne ngkana ko ukoukori kaeka nakon oin am titiraki.
Ko kona n reirei ni kakauongo nakon bwanaan te Uea rinanon ana wirikiriki te Tamnei ae Raoiroi.1 N rangin n ibuobuoki n aron Google, Twitter, ao Facebook, ma aki katauraoi kaeka nakon am titiraki aika rangin ni kakawaki!
Raoraou kairake aika tangiraki, ko kona n ata ana iango ao ana kantaninga te Uea bon ibukin maium. Ko na aki tiotio nako ngkana ko mena n te tabo are e kainnanoiko te Uea bwa ko na mena iai ke ngkana ko karaoa te bwai ae E kainnanoiko bwa ko na karaoia. Ko kona n ataia! Te Tamnei ae Raoiroi “a na tuangko ana taeka Kristo bwaai aika ko riai ni karaoi” (2 Nibwaai 32:3).
4. Iriia Taian Burabeti
N te 1979, ngke i riki ngai bwa te beretitenti ni kabuta n te Reirei n Tabati, I kaoaki bwa n na ira te tiemina n te Regional Representatives n te tai are e anga iai ana taeka Beretitenti Kimball ae kairaki mai ieta iaoia aaba aika a tia n aki kariaia rokon te Ekaretia iaan te tua, ao imwiina a manga kariaia rinin te Ekaretia, n aron Tiaina. E kaoia aomata ni kabane n te tiemina anne bwa ana reirei te taetae ni Mandarin bwa ti aonga n anga ara konabwai n rabakaura (mwakuri) ni buokiia kaain Tiaina.
Irou, ana kakao Beretitenti Kimball e taraa n ae te kaetieti mairoun te burabeti. Ngaia ae n ni bwakanako n tai n te tairiki anne (imwiin te tiemina) I tuanga kaain abau (ae a tia ni mate) , Dantzel, ngkana e kona ni kamatebwaia te taetae ni Mandarin ma ngai. E kariaia, ao ti kakaea te tia raeirei ae na buokiira. Eng tiaki reirei raoi te taetae ni Mandarin, ma ti reiakina ae tau n te aro are ngkana I kaoaki n te ririki are imwiina (rinanon mwakuri aika rietaata aika aki kantaningaaki) n nako Tiaina n tabeu ae te brobetia ni kakawari n reirei te korokoro inanon te buroo ae kaukaki, I rangin n tauraoi raoi (n aron are n na kaman tia ni karekea) ni kariaia te kakao.
Nimaua te ririki imwiin1985, te ririki are I a tia ni weteaki nakon te Kooram n te Tengaun ma Uoaman. N te bong teuana I karekea te bubuti ae rangin ni kawaekoaki bwa n na nako Tiaina ni karaoa te korokoro iaon te buroo iaon te tia anene n te obera, ae atongaki bwa ana ninikoria Tiaina. I kabwarabwara bwa au mwakuri n te Ekaretia e totokoa nakou, ma taokita i Tiaina a rangin ni bubutiai bwa n na roko n te tai ae waekoa ni karaoa te korokoro ni kamaiu.
I maroroakina te kaangaanga anne ma au beretitenti n te kooram ao te Moan Beretitentii. A namakina te kawaekoaki bwa, ngkai kainnanoia aomata i Tiaina, I riai ni karaoa te mwananga ao ni karaoa te korokoro.
Ao I (nako Tiaina ao ni karaoa te korokoro). Ma te kakaitau, e nakoraoi te korokoro! Ni bon arona, anne te kabanea ni korokoro ni kaukan te buroo ae I tibwa karaoia. Bon i Jinan, Tiaina, ni Maati 4, 1985.
E waaki te karaki imwiina riki, te tai aei n Okitobwa 2015. Wendy ao Ngai ti kaoaki bwa ti na oki nako Shandong Iuniwetiri Reirein ni Bwainaoraki i Jinan. Ti rangi ni miimi ngke I butimwaeaki ma te akoaki kanga te “rao ngkoa” i Tiaina ao ni manga reitaki ma taan korokoro ae I a kaman iangoia 65 te ririki imwaina. Kakukurein ara mwananga bon kaitiboora ma natin ao tibun te tia katangitang n te obera ae rangin ni kinaaki. Ni kabane atatai aika kamiimi aikai a bane n nakoraoi ma bukina ae ti teuana: I ongo nakon ana reirei te burabeti are ti na reirei te taetae n Mandarin!
Burabeti a noori bwaai aika a na riki n taai aika ana roko. A noori bwaai aika a kakamaaku aika a kaangaanga aika e a tia te tia kakaitara ni katikui ke aika ana katikui ni kawaira. Burabeti a kaman noori naba bwaai aika ana riki ao kabwaia aika tikiraoi aika a tataningaia naake a kakauongo ma te nano ni kan ongotaeka. I ataia bwa e koaua aei! I a tia ni kakoaua aei irou n te tai ae maan.
E a tia te Uea ni berita nakoira bwa E na aki kona ni kariaia te burabeti bwa e na katiotionakoira. Beretitenti Harold B. Lee (1899–1973) e katanoata: “Ko na bae n aki tangira te bwai ae taekinna mataniwiin te Ekaretia. E kona n aki boraoi ma am koaua n te bootaki. E kona n aki boraoi ma am koaua n aomata. E kona n urua aron maium n aomata tabeua. Ma ngkana ko ongo nakon bwaai aikai, ae kanga e roko mai win Iehova, ma te taotaonaki n nano ao te onimaki, te berita e kangai bwa a bon aki kataea ana kai mataroani neia tamneia maate, ao te Uea te Atua e na ka uamaea mwaakan te roo mai imwaimi, ao ni karika karawa bwa e na ruru ibukin ara raoiroi ao mimitongin arana’ (taraa D&C 21:6).”2
Ko na aki ota n rongorongo ni kabane ake a taekinaki iroun te burabeti ae maiu. Ma ngkana ko kinaa te burabeti bwa bon te burabeti, ko kona n tataro nakon te Uea n te nanorinano ma te onimaki ao n tuangnga ibukin oin am kakoaua n aron te bwai are e a tia n taekinna Ana burabeti.
Inanon 40 I.K. a mwaiti Nibwaite aika a kaina te Ekaretia, ao te Ekaretia e rikirake (ni mwaiti kaaina). Ma a rikirake bootaki ni karaba ni mwaitiia ao ni korakoraia, ao a mwaiti aia taan kairiiri aika a bwanga ni kewe aika a karabaia ibuakoia aomata ao ni kaangaanga aron kuneakiia. Ngke a moanna n rikirake aomata ni kamoamoa, a mwaiti Nibwaite aika a “bwainingarei bwaai ake a tabu, a kakewea tamnein te taetae ni burabeti ao ni kaotioti” (Ereman 4:12).
Aekan ni kakamaaku aikanne iai ibuakora n te bong aei. Koauana ae kakamaaku e kangai “ana toro Tatan” (taraa D&C 10:5) a karabaaki rinanoia te botanaomata. Ngaia ae rangin ni karaurau iaon ae antai ana reirei ae ko iria (taraa Ereman 12:23).
Tariu ao mwaneu aika tangiraki, kam bungiaki bwa taan kakoaua iroun te Atua. Ao ngkami ”bon te roro ae rineaki”(1 Betero 2:9), aika a kaman rineaki iroun te Atua bwa kam na karaoa te mwakuri ae kamimi—ni buokiia aomata n te aonaaba aei ibukin Kauaokin te Uea!