Nanglimbasug Paglatas sa mga Pagsulay sa Akong Pamilya
Paghulagway pinaagi ni Melissa Manwill
Human nagdiborsyo ang akong mga ginikanan, lisud kadto nga panahon sa akong kinabuhi. Ang pag-adto sa simbahan kasagaran mopabati kanako og mas maayo, apan sakitan ko nga makabati og mga pakigpulong bahin sa mga pamilya tungod kay wala ko motuo nga duna ko niini.
Ang akong mama dili na aktibo ug naminyo og usab. Ang akong papa ateista [dili motuo og Ginoo] ug nakig-ipon og laing babaye. Silang duha dunay mga anak sa bag-o nilang mga pares, ug akong gibati nga sama ko sa usa ka pabug-at—usa ka sayop—sama og wala koy silbi.
Mao nga nagsugod ko sa pag-ampo, pagbasa sa mga kasulatan, ug naningkamot sa pagpadayon og simba. Apan dili ko kapugong sa paghunahuna: Unsa may akong buhaton sa sunod nga kinabuhi kon wala koy pamilya nga ma-seal sa templo?
Ang mga tubag wala moabut diha-diha dayon, apan miabut ra kini. Gitan-aw nako ang depinisyon sa pamilya ug gibasa ang mga bersikulo sa kasulatan bahin niana, ug nagsugod ko sa pagkakita sa mas hayag nga talan-awon. Imbis maghunahuna nga wala koy usa ka pamilya, akong nakat-unan nga makatabang diay ko sa pagdala sa mga anak sa Dios ngadto sa Simbahan isip usa ka misyonaryo. Akong nakat-unan ang pagpailub ug pagkahimong kahayag. Naningkamot kong mas mamaayo ang akong kaugalingon. Nakaamgo sab ko nga kon walay pamilya sama nako, tingali dili ko makapalambo sa pagtuo nga akong gibatunan, ug dili nako mahatagan og bili ang balaod sa kaputli ug ang plano sa kaluwasan sama sa akong gihimo karon.
Nasabtan nako nga ako gayud adunay pamilya, ug mapasalamaton ko sa akong bag-o ug mas dako nga pamilya. Lisud kadto, apan dili ko mabalaka kon unsay mahitabo sa akong pamilya human sa kamatayon. Misalig ko sa Dios, ug nasayud Siya nganong wala kami ma-seal. Nasayud Siya unsa kadako ang akong gugma kanila ug unsay pinakamaayo para kanako. Dili nato masabtan ang tanan, mao nga importante ang pagbaton og hugot nga pagtuo sa Dios aron sa pagsuporta ug pagtabang kanato nga ma-OK ra ang tanan.