Galue e ala i Tofotofoga o Lou Aiga
Ata na tusia e Melissa Manwill
Ina ua mavae ona tetea ou matua, o se taimi faigata tele i lou olaga. E masani lava ona ou maua se lagona sili atu i le alu i le lotu, ae ou te lagonaina le tiga pe a faalogo i lauga e uiga i aiga aua ou te lei talitonu sa i ai sou aiga.
Sa le toaga lou tina i le lotu ma na toe faaipoipo. Sa le talitonu lou tamā i se atua ma na nonofo faatasi ma se isi tamaitai. Na tofu i laua uma ma ni fanau i a la paaga fou, ma sa ou lagonaina le pei o se avega mamafa—o se mea sese—e peiseai ou te le faitaulia mo soo se mea.
O lea sa ou amata ai ona tatalo, faitau i tusitusiga paia, mafaufau loloto, ma taumafai e faaauau pea ona alu i le lotu. Ae sa ou le manofo ai ae mafaufau: o le a se mea o le a ou faia i le olaga a sau e aunoa ma le faamauina o lou aiga i le malumalu?
Sa lei oo vave mai ni tali, ae sa oo mai lava. Sa ou sueina le faauigaga o le aiga ma faitau fuaiupu o mau e faatatau i le mataupu, ma sa amata ona ou vaai atu i le itu e sili atu ona lelei o mea. Nai lo le mafaufau, sa leai sou aiga, sa ou aoaoina e mafai ona ou fesoasoani e aumai fanau a le Atua i le Ekalesia o se faifeautalai. Sa ou aoaoina e faaaoga le onosai ma ia avea ma se malamalama. Sa ou taumafai e faalelei atili au lava. Sa ou iloaina foi a aunoa ma se aiga e pei o lou aiga, semanu ou te le atiina ae le faatuatua ua ia te au, ma semanu ou te le faatauaina le tulafono o le ola mama ma le ata o le faaolataga e pei ona ou faia nei.
Ua ou oo ina malamalama o loo i ai sou aiga, ma ou te faafetai mo lou aiga fou ma ua toatele atu. Sa faigata tele, ae ou te le popole e uiga i le mea o le a tupu i lou aiga pe a mavae le oti. Ou te faalagolago i le Atua, ma ua Ia silafia pe aisea ua le faamauina ai i matou. Na te silafia le tele o lou alofa ia i latou ma le mea e sili ona lelei mo au. E le mafai ona tatou malamalama i mea uma, ma e taua ai le maua o le faatuatua i le Atua e lagolagoina i tatou ma fesoasoani ia i tatou ia iloa o le a iu ina lelei mea uma.