Elder John C. Pingree Jr.

Hitu ’Ahuru Hui mana fa’atere rahi

’Ua parau ’o Elder John C. Pingree Jr., tei pāturuhia i te 1 nō ’ēperēra 2017, ’ei Hitu ’Ahuru Hui mana fa’atere rahi, « ’ua patuhia tō’u ’ītera’a pāpū i te roara’a o te tau, te tahi ma’a vāhi iti te tahi ma’a vāhi iti, nā roto i te fāri’ira’a i te pāhonora’a i te mau pure, te ’ītera’a te Vārua ’a tai’o ai te mau pāpa’ira’a mo’a, te tātarahapara’a ’e te tāvinira’a i te Fatu ».

Fānauhia i te matahiti 1966 i Roto Miti, Utah, Marite, e Carmen ’e e John C. Pingree Sr., ’ua parau ’oia i te itoito o tōna nā metua i te tauturura’a i te arata’ira’a i tōna orara’a.

« I te mahana i muri mai tō’u fānaura’a, ’ua pāpa’i tō’u metua tāne i te hō’ē rata nā’u », tē parau ra ’o Elder Pingree. « ’Ua tāpe’a noa ’oia i taua rata ra, ’e i muri iho, i tō’u haerera’a e tāvini i te hō’ē misiōni rave tāmau, ’ua hāpono mai ’oia i te reira iā’u. E rave rahi ’api nō taua rata ra nō tōna ’itera’a pāpū ’e te mau ha’api’ira’a o tāna i hina’aro iā’u ’ia ha’api’i mai i te roara’a o tō’u orara’a. ’A tai’o ai au i te reira, ’ua fa’a’ite mai te Vārua iā’u ē, te mea tā’u i ha’api’i mai nō ni’a i te ’evanelia a Iesu Mesia tei fa’aho’ihia mai, e tō’u nā metua, e parau mau ïa ».

’Ua tāvini ’o Elder Pingree i roto i te misiōni nō Massachusetts Boston, nā roto i te reo Pāniora.

’Ua roa’a iāna te parau tū’ite reo peretāne ’e te ’ihi poritita i te fare ha’api’ira’a teitei nō Utaha, ’e te parau tū’ite master fa’aterera’a faufa’a nō te fare ha’api’ira’a Harvard. ’Ua fa’aipoipohia ’oia ia Anne Pugsley i te ’āva’e māti 1990, ’e e metua rāua nō e pae tamari’i.

’Ua fa’atumu-rahi-hia tōna tōro’a i ni’a i te tauturura’a ia vetahi ’ē. ’Ua riro na ’oia ’ei peresideni nō te hō’ē fa’anahora’a tauturura’a i te ao nei i te pae ’utuutura’a ’e ’ei mono peresideni nō e piti tāiete nō te pae o te ea.

’Ua riro na ’oia ’ei peresideni nō te misiōni nō Texas (Houston) mai te matahiti 2011 ē tae atu i te matahiti 2014, ’e ’ua tāvini ’ei Hitu ’Ahuru ārea, peresideni titi, ’episekōpo, peresideni nō pupu peresibutero ’e ’ei ’orometua nō te séminaire ’e te institut.

« ’Ua parau te Fatu, ‘mai te mea tē hina’aro ra ’oe, e riro ’oe ’ei rāve’a nō te rave-rahi-ra’a i te ’ohipa maita’i i roto i teie nei u’i’ (PH&PF 11:8) », tē parau ra Elder Pingree. « Nō’u, tē parau ra te Fatu, ‘E nehenehe au e fa’a’ohipa ia ’oe nō te rave i te mau maita’i i roto i te orara’a o te tahi mau ta’ata, ’ia vaiiho ’oe iā’u ’ia nā reira’. Mai te mea e ’imi tātou i te mau rāve’a au, e fa’a’ohipa te Metua i te Ao ra ia tātou nō te ha’amaita’i i te tahi ta’ata ».