Elder Taylor G. Godoy

Hitu ’Ahuru Hui mana fa’atere rahi

E rave rahi matahiti, ’ua tae ’o Elder Taylor G. Godoy i te hō’ē ’āma’ara’a poromu i roto tōna tōro’a.

Tē ’ohipa ra ’oia ’ei taote niho, tē tere maita’i ra tāna ’ohipa ’e tē ’ōpua ra, ananahi, e ha’api’i i te fare ha’api’ira’a i te tōro’a tāpū niho. Terā rā ’ua ani mai te hō’ē ta’ata fa’atere here ’e te ti’aturi iāna ’ia ’ohipa nō te séminaire ’e te institut.

Te vaiihora’a i te hō’ē tōro’a e tere maita’i ra ’ua riro ïa ’ei mā’itira’a ta’a ’ē nō te hō’ē taote niho ’āpī, tei pāturuhia i te 1 nō ’ēperēra 2017, ’ei Hitu ’Ahuru Hui mana fa’atere rahi. E rave rahi o tōna mau hoa taote tei ui māere nō te aha ’oia i fa’aru’e i teie tōro’a.

« ’Ua ’ite rā vau ’o te mā’itira’a maita’i teie », tāna i parau. E fa’a’itera’a teie ti’aturira’a pāpū nō te ta’ata fa’afāriu i te ’Ēkālesia. ’Ua riro roa mai te tauturura’a ia vetahi ’ē ’ia ’ite ’e ’ia here i te ’evanelia ’ei taime taui orara’a ’e ’ei ha’amaita’ira’a.

I te roara’a o tōna tōro’a nō te ha’api’ira’a a te ’Ēkālesia, ’ua ’ohipa ’oia ’ei ’orometua institut, ’ei ti’a fa’atere fa’aau nō te institut, ’ei upo’o fa’atere institut, ’e ’ei upo’o fa’atere institut rahi o te fenua. ’Aita i maoro a’enei, ’ua riro ’oia ’ei upo’o fa’atere ārea nō te séminaire ’e te institut nō te pae apato’erau tō’o’a o te rā nō Amerika Apato’a.

’Ua fānauhia ’o Taylor Guillermo Godoy Atanacio i Lima, Pērū, i te matahiti 1968, e Taylor Godoy ’e e Adalzahinda Atanacio. ’Ua pohe tōna metua tāne e tamaiti ’āpī noa ā ’oia, ’e ’ua aupuru tōna metua tāne ’āpī ’o Elias Rebaza iāna. ’Ua tomo mai ’o Elder Godoy i roto i te ’Ēkālesia i te 17ra’a tōna matahiti.

I muri iho i tāna tāvinira’a i roto i te misiōni nō Pērū Lima Apato’erau, ’ua ho’i ’oia i tōna ’oire ’āi’a i Arequipa. ’Ua fa’atupu ’oia i te auhoara’a ’e te hō’ē vahine ’āpī ’o Carol Pacheco te i’oa. ’Ua fa’aipoipohia nā hoa fa’afāriu i te 31 nō me 1994 i roto i te hiero nō Lima Pērū. E metua rāua nō e piti tamari’i.

’Ua fāri’i ’o Elder Godoy i te parau tū’ite licence taote niho i te fare ha’api’ira’a teitei katorita nō Santa Maria i te matahiti 1993 ’e te parau tu’ite master fa’aterera’a i te fare ha’api’ira’a teitei Technical University nō Madrid i te matahiti 2006.

’Ua tāvini ’oia ’ei ’episekōpo, melo ’āpo’ora’a teitei, peresideni titi, upo’o fa’atere nō te ’ohipa ha’apararera’a parau ārea, ’e ’ei Hitu ’Ahuru ārea.