I te mau hoa ’e te ta’ata tītorotoro i te ’Ēkālesia

Nā Elder Joaquin E. Costa

Nō te Hitu ’Ahuru

Mai te mea e ’aufau ’outou i te ho’o o te heheura’a, e fa’aha’eha’a ia ’outou iho, e tai’o, e pure ’e e tātarahapa, e matara te mau ra’i ’e e ’ite ’outou mai tā’u i ’ite, ’o Iesu te Mesia.

I te hō’ē mahana pae avate’a, i te 16 nō setepa 1988, i te fare pure a te pāroita nō Vicente Lopez i Buenos Aires (Rāparata), ’ua bāpetizohia vau ’ei melo nō te ’Ēkālesia a Iesu Mesia i te Feiā Mo’a i te mau Mahana Hope’a Nei. Nā te hō’ē hoa rahi roa i bāpetizo iā’u i te reira mahana, ’e ’ua ’oa’oa roa vau, e au ra ē, ’ua matara te hō’ē teimaha i ni’a iā’u ’e ’ua ’ana’anatae roa vau ’ia ha’api’i fa’ahou.

I teie mahana, tē hina’aro nei au e fa’a’ite atu i te tahi ha’api’ira’a tā’u i tāmau i ni’a i tō’u ’ē’a nō te bāpetizora’a—ha’api’ira’a ’o tā’u e ti’aturi nei e tauturu ia ’outou ’o tē fa’aro’o mai nei ’e e ’ere i te melo nō te ’Ēkalesia. Tē pure nei au ’ia putapū tō ’outou ’ā’au i te Vārua tei nā reira ho’i iā’u.

’A tahi, fārerei i te mau misiōnare

Nō te aha te hō’ē ta’ata ’aita tōna e tāfifira’a, e hina’aro, ’aore e uira’a e ’ana’anatae ai ’ia fārerei i te mau misiōnare ’e ’ia fa’aro’o i tā rātou mau ha’api’ira’a ? ’Ia ’ite ’outou, nō’u nei, nō te here ïa—te here i te hō’ē tamāhine, ’o Renee tōna i’oa. ’Ua fa’ahina’aro vau iāna, ’e ’ua hina’aro vau e fa’aipoipo iāna. E mea ta’a ’ē ’oia, ’e ’ua mau i te tahi mau ’ite ta’a ’ē i te rahira’a o te mau tamāhine ’āpī tā’u i mātaro. Terā rā, ’ua hina’aro mau vau iāna ’e ’ua ani atu vau ’ia fa’aipoipo mai iā’u—’e ’ua pāhono mai ’oia, ’aita !

’Ua ha’amā vau. ’Ua mana’o vau ē, e fāna’o te ta’ata tei fa’aipoipo iā’u ! E mea hāviti au, e 24 matahiti tō’u, e parau tū’ite teitei ’e e ’ohipa maita’i. ’Ua parau mai ’oia nō tāna mau ’ōpuara’a—te fa’aipoipora’a i te hō’ē noa ta’ata e ’āfa’i iāna i te hiero, ’e te rirora’a ’ei ’utuāfare mure ’ore—’e ’ua pāto’i i tā’u nei anira’a. ’Ua hina’aro vau ’ia fa’ahaere fa’ahou ā i teie fa’ahoara’a i mua, nō reira ’ua fāri’i au e fa’aro’o i te mau misiōnare. E rāve’a maita’i ānei te reira nō te fārerei i te mau misiōnare ? Nō’u nei, ’ē.

I tō’u fārerei-mātāmua-ra’a i te mau misiōnare, ’aita vau i ta’a maita’i i te mau mea o tā rātou e parau ra, ’e nō te fa’a’ite atu i te parau mau, ’aita vau i tau’a rahi roa ia rātou. ’Ua piri tō’u māfatu i te hō’ē ha’apa’ora’a ’āpī. Tā’u noa i hina’aro, ’o te fa’a’itera’a atu ia rātou i tō rātou hape ’e ’ia taimehia vau nō te fa’ataui i te mana’o o Renee ’ia fa’aipoipo iho ā iā’u.

I teie nei mahana, ’ua tāvini ’e tē tāvini nei tā’u mau tamari’i i te misiōni, ’e tē ’ite pāpū nei au i te fa’atusiara’a a teie mau taure’are’a tāne ’e vahine nō te ha’api’i i te ta’ata i te ’evanelia a Iesu Mesia. I teienei e tae mai te mana’o ē ’āhani pa’i ’ua ha’apa’o hau atu vau ia Elder Richardson, Elder Farrell, ’e Elder Hyland, te mau misiōnare fa’ahiahia tei ha’api’i iā’u.

Nō reira, teie tā’u ha’api’ira’a mātāmua, tē parau nei au ia ’outou te mau hoa ’e te ta’ata tītorotoro i te ’Ēkālesia : ’ia fārerei ana’e ’outou i te mau misiōnare, ’a ha’apa’o māite ia rātou, ’ua ha’apae rātou i te tahi mau matahiti faufa’a o tō rātou orara’a nō ’outou.

Te piti, haere i te purera’a

I te taime mātāmua ’ua haere au i te hō’ē purera’a a te ’Ēkālesia, ’ua fa’aro’o vau i te mau ta’o ’aita tō rātou e aura’a nō’u. ’O vai te mau Debure ? E aha te autahu’ara’a a Aarona ? Te Sōtaiete Tauturu ?

Mai te mea ’o te taime mātāmua ’outou ’a haere mai ai i te hō’ē purera’a a te ’Ēkālesia, ’e ’ua huru ’ē ’outou nō te mea ’aita ’outou e ta’a ra, ’eiaha e ha’ape’ape’a ! ’Aita ato’a vau i ’ite a’e i te hō’ē mea. ’Āre’a rā te ha’amana’o noa ra vau i te mau mana’o, te mau putapūra’a ’āpi nō te hau ’e te ’oa’oa tā’u i fāri’i. ’Aita vau i ’ite i te reira taime, ’āre’a rā ’ua muhumuhu te Vārua Maita’i i tō’u nei tari’a ’e i tō’u nei māfatu ē, « e mea tano ».

Teie ïa te ha’apotora’a nō teie ha’api’ira’a : mai te mea ’ua ta’a ’ore ri’i ’outou, ’eiaha e ha’ape’ape’a—’a ha’amana’o i te mau putapūra’a i roto i tō ’outou māfatu tā ’outou i ’ite ; nō te Atua mai te reira.

Te toru, tai’o i te Buka a Moromona

I muri mai i te tahi mau fārereira’a ’e te mau misiōnare, ’aita vau i nu’u rahi i mua. ’Ua mana’o vau ē, ’aita vau i fāri’i i te hō’ē ha’apāpūra’a nō te ti’ara’a mau o te ’evanelia.

I te hō’ē mahana, ’ua ani Renee iā’u : « Tē tai’o ra ānei ’oe i te Buka a Moromona ? »

’Ua pāhono vau : « ’aita ». Tē fa’aro’o nei au i te mau misiōnare—’aita ānei te reira i nava’i ?

Ma te roimata i tōna mata, ’ua ha’apāpū mai Renee iā’u ē, ’ua ’ite ’oia e parau mau te Buka a Moromona ’e ’ua fa’ata’a mai ’oia ē mai te mea e hina’aro vau e ’ite e parau mau te reira, hō’ē ana’e ïa rāve’a—’ia mana’o ’outou e aha ra ïa—tai’o i te reira ! ’E i muri iho, e ani !

Tai’o, feruri hōhonu i roto i tō ’outou ’ā’au, ’e « ui atu i te Atua, i te Metua mure ’ore ra, i te i’oa o Iesu Mesia… ma te ’ā’au hina’aro mau, ma te mana’o pāpū, ’e ma te fa’aro’o i te Mesia » (Moroni 10:4) e parau mau ānei te Buka a Moromona, e teie ānei te ’Ēkālesia mau.

Nō reira, te toru o te ha’api’ira’a ha’apotohia ’ei hō’ē noa parau : ’ia fāri’i ’outou i teie mau mea—te Buka a Moromona—’e tē a’ohia ra ’outou ’ia tai’o ’e ’ia ani i te Atua e parau mau ānei te reira, e rave noa na !

Te hope’a, tātarahapa

Te ’ohipa hope’a tā’u e hina’aro e fa’a’ite atu, nō ni’a ïa i te tātarahapa. I muri a’e i tō’u fa’aotira’a i te tā’āto’ara’a o te mau ha’api’ira’a misiōnare, ’aita vau i pāpū atura e hina’aro ānei au e taui i te hō’ē mea i roto i tō’u orara’a. Nā te misiōnare Cutler, te hō’ē misionare ’āpī ’e te pāpū maita’i, ’o tei paraparau iti noa rā i te reo pāniora, tei parau i te hō’ē mahana : « E Joaquin, e tai’o tāua ia Alama 42, ’e e tu’u tāua i tō ’oe i’oa ’a tai’o ai tāua ».

’Ua mana’o vau ē, e ’ohipa ma’au te reira, ’ua rave rā vau mai te anira’a a Elder Cutler ’e ’ua tai’o ho’i i te ’īrava 1 : « ’E teienei, e ta’u tamaiti [Joaquin], tē ’ite nei au ē, tē vai noa na te tahi atu ā mea, ’o tei ha’ape’ape’a i tō ’oe ’ā’au, ’aita i ’ite-pāpū-hia e ’oe ». ’Auē ! Tē paraparau nei te buka iā’u.

’E ’ua tai’o atura māua i te ’īrava 2 : « ’E teienei, inaha, e ta’u tamaiti [Joaquin], e tātara atu vau i te reira ia ’oe nā », ’e i reira ’ua fa’ata’ahia mai te hi’ara’a o Adamu.

’E i roto i te ’īrava 4 : « ’Ua ’ite ho’i tātou ē, ’ua roa’a [ia Joaquin] te taime e ti’a ai iāna ’ia tātarahapa ».

’Ua nā reira noa māua i te tai’o-marū-noa-ra’a, ’īrava i muri i te tahi ’īrava, ē tae noa atu i nā ’īrava hope’a e toru. I reira, ’ua haere mai te hō’ē mana pūai i ni’a iā’u. Tē paraparau ’āfaro ti’a nei te buka iā’u, ’e ’ua ha’amata vau i te ta’i ’a tai’o noa ai : « ’E teienei, [Joaquin], ta’u tamaiti, ’ua hina’aro vau ē ’eiaha taua mau mea nei e ha’ape’ape’a fa’ahou ia ’oe ra, ’e ’ia ha’ape’ape’a ana’e tā ’oe mau hara ia ’oe, ’oia te pe’ape’a e fa’ahaeha’a ia ’oe… i te tātarahapa » (’īrava 29).

Tē ’ite nei au i teie taime ē, ’ua tīa’i au ’ia fāri’i i te heheura’a ma te aufau ’ore i te ho’o. Tae noa mai i te reira taime, ’aita vau i paraparau mau i te Atua, ’e te mana’o e paraparau i te hō’ē ta’ata ’aore e ’itehia, e ’ohipa huru ma’ama’a ïa nō’u. Tītauhia ’ia fa’aha’eha’a vau iā’u ’e ’ia rave i te ’ohipa ’o tei anihia iā’u ’ia rave, noa atu ē i roto i tō’u ferurira’a, e ’ohipa ma’au.

I te reira mahana, ’ua ’īriti au i tō’u ’ā’au i te Vārua, ’ua hina’aro vau ’ia tātarahapa, ’e ’ia bāpetizohia ! Nā mua a’e i te reira taime, ’ua mana’o vau te tātarahapa e mea faufa’a ’ore, ’ua ’āpiti-noa-hia i te hara ’e te ravera’a hape i te mau mea, ma te hitimahuta rā, ’ua ’ite au i tōna huru ta’a ’ē—mai te tahi ’ohipa tano e tūrama i te ’ē’a nō te tupura’a ’e te ’oa’oa.

Tei ’ō nei ’o Elder Cutler i teie mahana, ’e tē hina’aro nei au e ha’amāuruuru iāna i te fa’a’ara’arara’a i tō’u mata. Te mau fa’aotira’a tāta’itahi tā’u i rave i roto i tō’u orara’a mai taua taime ra, ’ua fa’auruhia ïa i te taime ’a fa’aha’eha’a ai au ’e ’a pure ho’i nō te fa’a’orera’a hara, ’e ’ua riro atura te tāra’ehara a Iesu Mesia ’ei tuha’a nō tō’u orara’a.

Terā ïa nō te ha’apotora’a i te ha’api’ira’a hope’a : ’a fa’a’ohipa i te tātarahapa, ’aita e ’ohipa ’ē atu o te ha’afātata ia ’outou i te Fatu ra ia Iesu Mesia maoti rā te hina’aro ’ia taui.

E au mau ta’ata tītorotoro, e au mau hoa nō te ’Ēkālesia, mai te peu tē fa’aro’o nei ’outou i teie mahana, ’ua fātata roa ’outou i te fāri’i i te ’oa’oa rahi roa. ’Ua fātata roa ’outou !

Tē ani manihi nei au ia ’outou, ma te pūai hope o tō’u ’ā’au, ’e ma te hōhonu o tō’u vārua : ’a haere ’e ’a bāpetizo ia ’outou ! ’O te ’ohipa faufa’a rahi roa e rave ’outou. E taui te reira ’eiaha noa tō ’outou orara’a, te orara’a ato’a rā o tā ’outou mau tamari’i ’e mau mo’otua.

’Ua ha’amaita’i te Fatu iā’u ’e te hō’ē ’utuāfare. ’Ua fa’aipoipohia māua Renee ’e e maha tamari’i nehenehe tā māua. ’E nā roto i tō’u bāpetizora’a, e nehenehe iā’u, mai te peropheta ’o Lehi, e ani ia rātou ’ia ’amu i te hotu o te rā’au o te ora, ’oia ho’i te aroha o te Atua (hi’o 1 Nephi 8:15; 11:25). E nehenehe tā’u e tauturu ia rātou ’ia haere mai i te Mesia ra.

Nō reira, ’a hi’opo’a māite i te mau ’ohipa i tupu nō’u, ’e (1) ’a ha’apa’o maita’i i te parau a te mau misionare, (2) ’a haere i te purera’a ’e ’a ha’amana’o i te mau putapūra’a pae varua, (3) ’a tai’o i te Buka a Moromona ’e ’a ani i te Fatu e parau mau ānei te reira, ’e (4) ’a fa’a’ohipa i te tātarahapa ’e ’a bāpetizo ia ’outou.

Tē fa’a’ite pāpū nei au ē mai te mea e ’aufau ’outou i te ho’o o te heheura’a, e fa’aha’eha’a ia ’outou iho, e tai’o, e pure ’e e tātarahapa, e matara te mau ra’i ’e e ’ite ’outou mai tā’u i ’ite ē, ’o Iesu te Mesia, ’o ’oia tō’u Fa’aora ’e tō ’outou ato’a. Nā roto i te i’oa o Iesu Mesia ra, ’āmene.