Elder Taniela B. Wakolo

Hitu ’Ahuru Hui mana fa’atere rahi

’Ua hōro’a ’o Elder Taniela Biu Wakolo i te mahana ato’a o tōna orara’a mai tōna bāpetizora’ahia i te ’āva’e māti 1994 nō te tāvinira’a i te Fatu.

Fānauhia i te matahiti 1967, i roto i te hō’ē motu iti nō Lomaloma, Lau, i Fītī, e Taniela Vosa ’e e Temalesi Buadromo Wakolo, ’o Elder Wakolo te teina o nā tamari’i e ono. « ’Ua aupuruhia vau i roto i te hō’ē fare ha’eha’a mau, e mea ’ona rā mātou i te pae nō te here te tahi ’e te tahi », tē parau ra ’oia.

I te 12ra’a o te matahiti, ’ua vaiiho mai ’o Elder Wakolo i tōna nā metua nō te haere i te pūhapara’a ha’api’ira’a ’e e hau atu i te 500 taure’are’a tamāroa mai te 12 matahiti ē tae atu i te 19 matahiti. « ’Ua riro ’ei vāhi ha’api’ipi’ira’a fa’ahiahia mau nō’u », tāna i parau. « I reira ’ua ha’api’i mai au i te ha’avī iā’u iho ».

’Ua arapae ’oia ia Anita Herberta Moimoi, hō’ē melo fa’afāriu ’āpī, ’ua hau atu i te hō’ē matahiti. ’Ua fa’a’ipoipohia rāua i te 22 nō ’ātete 1987, i Suva, Fītī.

’Aita te fa’afāriura’a i tae mai i roto i te hō’ē noa pō nō Elder Wakolo, ’e i roto i nā matahiti mātāmua e va’u o tō rāua fa’aipoipora’a, ’ua fārerei ’oia e rave rahi misiōnare. « ’Ua fa’aoti au te mau ha’api’ira’a [misiōnare] e maha taime i roto i te va’u matahiti », tē parau ra ’oia. « E 24 misiōnare tā’u i fārerei ».

Nā te hō’ē noa uira’a ’ōhie a te hō’ē o taua mau misiōnare ra nō ni’a i te i’oa o te ’Ēkālesia i taui i tō’u mana’o nō ni’a i te bāpetizora’a. ’Ua parau ’oia : « e ti’a i te ’Ēkālesia ’ia pi’ihia i te i’oa o tōna fatu ». « ’Ua nava’i roa ïa nō’u ».

’Ua tā’atihia ’o Elder Wakolo ’e tāna vahine i roto i te hiero nō Nuku’alofa (Tona) i te matahiti 1995. E metua rāua nō e piti tamari’i.

’Ua ’āpe’e vitiviti mai te mau rāve’a tāvinira’a i tōna bāpetizora’a. Piti hopetoma tōna bāpetizora’a, ’ua pi’ihia ’oia i roto te peresidenira’a Feiā ’Āpī Tamāroa pāroita ’e e tauturu ha’api’i séminaire ’e tāna vahine. ’Aita i matahiti i muri mai, ’ua fāri’i ’oia i te pi’ira’a ’ia tāvini ’ei peresideni ’āma’a. I muri iho, ’ua tāvini ’oia ’ei tauturu i roto i te peresidenira’a titi, ’ei peresideni titi, ’e ’ei Hitu ’Ahuru ārea. I te taime nō tōna pi’ira’a ’ei Hitu ’Ahuru Hui mana fa’atere rahi, tē peresideni ra ’oia i te misiōni nō Arkansas Little Rock.

’Ua haere ’oia i te ha’api’ira’a pae faufa’a ’e te fa’aterera’a ’e ’ua roa’a mai te parau tū’ite master fa’aterera’a faufa’a. ’Aita i maoro a’enei, ’o ’oia te ti’a fa’atere nō te pū ’ohipara’a a te ’Ēkālesia i Fītī.