’Eiaha e hiʼo i te tahi atu vāhi, ’a hiʼo i niʼa !
Nā Elder Yoon Hwan Choi
Nō te Hitu ’Ahuru
Te ani-manihini-raʼa i te tahi atu mau taʼata ’ia haere mai i te Mesia ra ʼo tā tātou ïa fā, ʼe e nehenehe tā tātou e faʼatupu i teie fā nā roto i te hiʼoraʼa atu i niʼa ia Iesu Mesia.
Tāʼu fā ’ia « ani manihini i te tahi atu mau taʼata ’ia haere mai i te Mesia ra ».1 Teie atoʼa tā ’outou fā. E nehenehe tā tātou e faʼatupu i teie fā nā roto i te hiʼoraʼa atu i ni’a ia Iesu Mesia.
’Ua bāpetizohia vau ʼe tōʼu nā metua i te 16raʼa o tōʼu matahiti. ’Ua tomo tōʼu nei teina, Kyung-Hwan, e 14 matahiti te paʼari, i roto i te ʼĒkālesia nā roto i tōʼu nei metua tāne fetiʼi, Young Jik Lee, ’e ’ua ani manihini mai ia mātou ’ia haere i tāna ʼĒkālesia. E melo anaʼe nā 10 melo tātaʼitahi o tō mātou ʼutuāfare nō te tahi atu ʼēkālesia, nō reira ’ua ’oa’oa mātou i te ’iteraʼa i te parau mau ʼe ’ua hinaʼaro mātou ’ia faʼaʼite i taua ʼoaʼoa tā mātou i ʼite i roto i te ʼevanelia ʼa Iesu Mesia i muri aʼe i tō mātou bāpetizoraʼahia.
ʼO tōʼu metua tāne te taʼata ʼanaʼanatae roa aʼe i rotopū ia mātou i te haʼapiʼi mai ’e i te faʼaʼite i te parau mau. E ara ’oi oi ʼoia i te poʼipoʼi roa nō te taiʼo i te mau pāpaʼiraʼa moʼa e hau atu i te piti hora i te mau mahana atoʼa. Fātata i te mau mahana ato’a, i muri aʼe i te ʼohipa, e haere ʼoia ʼe te mau misiōnare e fārerei i tō mātou ʼutuāfare, te mau hoa, ’e te mau taʼata tāpiri mai. E hitu avaʼe i muri aʼe i tō mātou bāpetizoraʼahia, ’ua riro mai e 23 taʼata nō tōʼu ʼutuāfare ’e tōʼu mau fetiʼi ’ei mau melo nō te ʼĒkālesia. ’Ua peʼehia te reira ʼe te semeio i te ʼiteraʼa ē 130 taʼata tei bāpetizohia i te matahiti i muri mai nā roto i te ʼohipa misiōnare melo ʼa tōʼu metua tāne.
E mea faufaʼa rahi atoʼa te ’ohipa ʼāʼamu ʼutuāfare nāna, ’e ’ua faʼaoti ʼoia ’e va’u uʼi nō tō mātou mau tupuna. Mai taua taime mai ā, ’ua rahi ïa te mau hotu nō te faʼafāriuraʼa ʼo tō mātou ʼutuāfare, tei ʼomuahia mai e tōʼu nei teina e 14 matahiti, nā roto i te mau rāveʼa e rave rahi ’eiaha noa i rotopū i te feiā ora i rotopū atoʼa rā i te feiā pohe. Nā roto i te turuʼiraʼa i niʼa i te ʼohipa ’a tōʼu metua tāne ʼe ’a te tahi atu mau taʼata, tē vai nei ïa i teie nei e 32 uʼi i roto i tō mātou tumu rāʼau ʼutuāfare, ’e te fa’aoti nei mātou i teie nei i te ʼohipa hiero nō te mau ʼamāʼa e rave rahi. Tē māere nei au i teie mahana ’e tē ʼite nei au i te ʼoaʼoa rahi nā roto i te tuʼatiraʼa tō mātou mau tupuna i tō mātou mau huāʼai.
’Ua pāpaʼi te peresideni Gordon B. Hinckley i te hōʼē ā huru ʼohipa tei ’itehia e āna i roto i te hiero nō Columbus Ohio :
« I ni’a i tō’u pārahira’a i roto i te hiero, ’a feruri noa ai au i te orara’a ’o [te pāpā ’o toʼu pāpā rū’au, tōʼu pāpā rūʼau, ʼe tōʼu metua tāne] ’ua hi’o atu vau i tā’u nei tamāhine, i tāna tamāhine… ’e tāna mau tamari’i, o tā’u ho’i mau hina. ’Ite ihora vau e tei rōpū maita’i au i teie nā u’i ’e hitu—e toru nā mua atu iā’u ’e e toru i muri mai iā’u.
« I roto i taua fare mo’a ra ’e te tura ’ua ō mai i roto i tō’u ferurira’a te hō’ē ’itera’a nō te tītaura’a rahi e vai ra i ni’a iho iā’u ’ia fa’ahaere atu i te mau mea ato’a tā’u i fāri’i ’ei faufa’a ’āi’a nō tō’u mau tupuna i te mau u’i tei nā muri mai iā’u ».2
E tufaʼa tātou pāʼātoʼa nō te hō’ē ʼutuāfare mure ʼore. E nehenehe tā tātou ʼohipa e riro ’ei hōʼē tumu nō te fa’atupu i te mau tauiraʼa faufaa rahi nō te maitaʼi ānei aore rā nō te ʼino ānei. ’Ua parau te peresideni Hinckley, « ’Eiaha roa ʼoutou ’ia riro ’ei tāpona paruparu i roto i te ʼāpaparaʼa nō tō ʼoutou mau uʼi ».3 E haʼapūai tō ʼoutou haʼapaʼoraʼa i roto i te ʼevanelia i tō ʼoutou ʼutuāfare. Nāhea e nehenehe ai ia ʼoutou ’ia haʼapāpū ē ’ua riro ʼoutou ’ei pona pūai i roto i tō ʼoutou ʼutuāfare ?
I te hōʼē mahana, te tahi nau ʼāvaʼe i muri aʼe i tōʼu bāpetizora’ahia, ’ua faʼaroʼo vau i te tahi mau melo i te fare purera’a i te faʼahaparaʼa te tahi i te tahi. ’Ua ʼoto roa vau. ’Ua hoʼi atu vau i te fare ’e ’ua parau atu i tōʼu metua tāne ē eʼita paha vau e hoʼi faʼahou i te fare pureraʼa. E mea fifi roa ’ia ’ite i te mau melo ’ia faʼahapa i te tahi atu mau taʼata mai tera te huru. I muri aʼe i tōna faʼaroʼoraʼa mai, ’ua haʼapiʼi mai tōʼu metua tāne iāʼu ’e ’ua faʼahoʼihia mai te ʼevānelia ʼe e mea maitaʼi roa ïa te reira, te mau melo rā ’aita ā ia ratou i maita’i roa atu ra, ’aita atoʼa ho’i ōna iho ’e o vau nei ato’a. Ma te reo pāpū maita’i, ’ua parau mai ʼoia, « ’eiaha roa e fa’aru’e i tō ʼoe faʼaroʼo nō te huru o te mau taʼata e ha’ati ra ia ’oe, ’a patu rā i te hōʼē auraʼa pāutuutu maita’i ’e o Iesu Mesia. ’Eiaha e hiʼo i te tahi atu vāhi, ’a hiʼo i niʼa ! »
’A hiʼo i niʼa ia Iesu Mesia—tē haʼapūai nei te aʼo paʼari ’a tōʼu metua tāne—i tōʼu faʼaroʼo i te mau taime atoʼa e faʼaruru vau i te mau tamataraʼa i roto i te oraraʼa nei. ’Ua haʼapiʼi ʼoia iāʼu nāhea i te faʼaʼohipa i te mau haʼapiʼiraʼa ’a te Mesia, nā roto i teie mau parau : « ’A hi‘o mai iā’u nei i tō mau mana‘o ato’a nā ; ʼeiaha e fēʼaʼa, ʼeiaha e mata’u ».4
I tōʼu peresideniraʼa i te misiōni nō Washington Seattle, ’ua topa te ua e rave rahi mahana i te matahiti. Noa atu ra te reira, ’ua faʼaʼuehia tā mātou mau misiōnare ’ia haere i rāpae ’e ’ia poro nā roto i te ua. E parau vau ia rātou, « ’a haere i roto i te ua, ʼa hiʼo i niʼa i te raʼi, ʼa hāmama i tō ʼoutou vaha, ’e ʼa inu i te ua ! ’Ia hiʼo ʼoutou i niʼa, ’e haʼapūaihia ʼoutou ’ia hāmama i tō ʼoutou vaha i te mau taʼata atoʼa ma te mataʼu ʼore. E haʼapiʼiraʼa te reira nō rātou ’ia hiʼo i niʼa ’ia faʼaruru anaʼe rātou i te mau tamataraʼa ’e tae noa atu i muri aʼe i tā rātou tau misiōni. ’Eiaha rā e tamata i te reira i te mau vāhi viʼiviʼihia.
’A tāvini noa ai au i roto i te misiōni nō Seattle, ’ua fāriʼi au i te hōʼē niuniu ʼa tāʼu nei tamaiti matahiapo, ’o Sunbeam, e taʼata faʼataʼi piana ’oia. ’Ua parau ʼoia ē e fāriʼi ʼoia i te haʼamaitaʼiraʼ ’ia haʼuti i roto i te Carnegie Hall i New York nō te mea ’ua rē ʼoia i te hōʼē tātaʼuraʼa nā te ara. ’Ua ʼoaʼoa roa māua ’e ’ua ʼanaʼanatae rahi ōna. Area rā, i taua pō ra, ’a pure ai māua ma te māuruuru rahi, ’ua ʼite tāʼu vahine faʼaipoipo ē e’ita e nehenehe ia māua ’ia haere atu i tāna ha’utiraʼa ’e ’ua fa’ahiti ʼoia i te tahi mea mai teie te huru : « E te Metua i te Ao ra, tē māuruuru nei au nō te haʼamaitaʼiraʼa tā ’Oe i hōroʼa nō Sunbeam. Tera rā ho’i eʼita e nehenehe iāʼu ’ia haere atu i reira. ’Ua nehenehe iā’u ’ia haere mai te mea ’ua hōroʼa mai ’Oe i teie haʼamaitaʼiraʼa nā mua a’e ’aore rā i muri aʼe i teie misiōni. ʼAita vau e amuamu nei, tē ’otoriʼi nei rā vau.
I muri noa iho i tōna faʼaotiraʼa i tāna pure, ’ua faʼaroʼo ʼoia i te hōʼē reo pāpū maitai. « Nō te mea e’ita e nehenehe ia ’oe ’ia haere, ’ua hōroʼahia teie haʼamaitaʼiraʼa i tā ʼoe tamaiti. E hinaʼaro ānei ’oe e taui ?
’Ua hitimahuta tāʼu vahine faʼaipoipo. ’Ua ʼite ʼoia ē e haʼamaitaʼihia te mau tamariʼi nā roto i te ʼohipa itoito ʼa tō rātou mau metua i roto i te bāsileia ʼo te Fatu, ’ua riro rā te reira ’ei taime mātāmua ’ua taʼa māramarama ʼoia i tāna tufa’a ’ohipa. ’Ua pāhono atu ’oia Iāna i te reira ihoa taime. « ’Aita, ’aita, ’aita e fifi ’ia ʼore au e haere atu. ’A vaiho iāna ’ia fāriʼi i taua hanahana ra ».
E au mau taeaʼe ’e au mau tuahine here, e ‘ere i te mea ʼōhie ia tātou ’ia ʼite i te here ʼo te Metua i te Ao ra ’ia hiʼo anaʼe tātou i te mau mea e ha’ati nei ia tatou nā roto i tō tātou mau mata tāhuti nō te mea e hiʼo tātou nā mua roa i te tano ʼore, te ’ereraʼa, te mau hōpoiʼa, ’aore rā te moʼemoʼe. I te tahi atu pae, e nehenehe tā tātou e ʼite ātea i te mau haʼamaitaʼiraʼa ’ia hiʼo anaʼe tātou i niʼa. ’Ua heheu mai te Fatu, « e ’ia noaʼa mai ia tātou te hōʼē haʼamaitaʼiraʼa nō ō mai nā i te Atua ra, ’ua nā roto ïa i te haʼapaʼoraʼa i taua ture i faʼatumuhia ai nō te reira ».5 I te feiā atoʼa e rave nei i roto e rave rahi tāviniraʼa i te Atua, te ʼitera’a ē ’ua riro ʼoutou ’ei tuʼatiraʼa paʼari nō te mau haʼamaitaʼiraʼa pūai nō te mau taʼata nā mua atu ia ʼoutou ʼe nō te mau uʼi i muri mai ia ʼoutou.
I teie nei mahana, tē māuruuru nei au i te ʼiteraʼa e tē tiʼa haʼapaʼo nei e rave rahi ʼo te mau melo nō tōʼu ʼutuāfare i niʼa i te ’ēʼa nō te fafauraʼa e ʼoto rā vau ’ia feruri anaʼe au i te mau pārahiraʼa taʼata ʼore i piha’i iho ia mātou. ’Ua parau Elder M. Russell Ballard ē : « Mai te mea e māʼiti ʼoutou ’ia riro ʼei melo paruparu aore rā ’ia faʼaruʼe i te ʼEkālesia ʼa Iesu Mesia i te Feiā Moʼa i te mau Mahana Hopeʼa nei tei faʼahoʼihia mai, e haere tiʼa ïa ʼoutou ia vai ra ? E aha ïa tā ʼoutou e rave ? Tē fa’aotira’a ‘’ia ’ore e pe’e fa’ahou’ i te mau melo nō te ’Ēkālesia ’e te feiā fa’atere mā’itihia e te Fatu, e hope’a ïa tō te reira o te ’ore e ’itehia i teie iho taime ».6 ’Ua faʼaitoito te peresideni Thomas S. Monson ia tātou, « e mā’iti noa tātou i te mau mea tano ’e te pa’ari a’e ’eiaha rā te mau mea hape ’e te ’ōhie a’e ».7
’Aita roa atu i taere nō te hiʼo atu i ni’a ia Iesu Mesia. ’Ua vai matara noa tōna nā rima nō ʼoutou. Tē vai nei te mau uʼi na mua ia tātou ’e i muri ia tātou o tē tiʼaturi nei i niʼa ia tātou nō te peʼe atu i te Mesia ’ia nehenehe ia tātou ’ia riro ’ei hōʼē ʼutuāfare mure ʼore.
I tōʼu haʼamāuruururaʼahia i tōʼu nei piʼiraʼa ’ei peresideni titi, ’ua ‘oa’oa tāʼu mau tamaiti nō te mea e rahi ïa tō’u taime i piha’i iho ia rātou. E toru hepetoma i muri mai ’ua piʼihia vau ’ei Hitu ’Ahuru. ’Ua manaʼo vau nā mua ē eʼita rātou e māuruuru roa, teie rā te pāhonoraʼa haehaʼa ʼa tāʼu nei tamaiti hopeʼa, « ’e papa, ‘eiaha e haʼapeʼapeʼa. E ʼutuāfare mure ʼore tātou. Auē ïa pāhonoraʼa ʼōhie ʼe te māramarama ! ’Ua peʼapeʼariʼi au nō te mea ’ua hiʼo mātāmua vau i teie orararaʼa tāhuti nei, ’ua ʼoaʼoa rā tāʼu tamaiti nō te mea ʼaita ʼoia i hiʼo i te tahi atu vāhi ’ua hiʼo rā ʼoia i niʼa ma te mata i niʼa i te ora mure ʼore ‘e te mau ʼōpuaraʼa a te Fatu.
E ʼere i te mea ʼōhie i te mau taime atoʼa ’ia hiʼo atu i niʼa ’ia pātoʼi anaʼe tō ʼoutou mau metua i te ʼevānelia, ’ia riro anaʼe ʼoutou ’ei melo nō te hōʼē ’amāʼa naʼinaʼi o te ʼEkālesia, ’ia ’ore anaʼe tō ʼoutou hoa faʼaipoipo ’ei melo, ’ia faʼaea anaʼe ʼoutou anaʼe iho noa atu ’ua tūtava ʼoutou ’ia faʼaipoipo, ’ia tāiva anaʼe te hōʼē tamariʼi, ’ia riro anaʼe ʼoutou ’ei hōʼē metua ’ōtahi, ’ia faʼaruru ana’e ʼoutou i te fifi i te pae tino ‘e te pae manaʼo, ’ia roʼohia ana’e ʼoutou i te hōʼē ’ati, ’e te tahi atu ā. ’A tāpeʼa māite i tō ʼoutou faʼaroʼo i roto i taua mau tau fifi ra. ’A hiʼo i ni’a i te Mesia nō te pūai, te ʼaifāitoraʼa ‘e te faʼaoraraʼa. Nā roto i te mana nō te Tāraʼehara ’a Iesu Mesia, « e faʼarirohia ïa te mau mea atoʼa ’ei hōʼē nō tō ʼoutou maita’i ».8
Tē fa’a’ite pāpū nei au ē, ʼo Iesu Mesia tō tātou Faʼaora ʼe Tāraʼehara. ’Ia peʼe anaʼe tātou i tō tātou peropheta ora, te peresideni Thomas S. Monson, te hiʼo ra ïa tātou i niʼa ia Iesu Mesia. ’Ia pure ’e ’ia taiʼo anaʼe tātou i te mau pāpaʼiraʼa moʼa i te mau mahana atoʼa, ʼe ’ia ’amu tātou i te ’ōroʼa ma te ʼāʼau tae i te mau hepetoma atoʼa, e noaʼa ia tātou te pūai nō te hiʼo tāmau atu Iāna. Tē ʼoaʼoa nei au i te riroraʼa ei hōʼē melo nō teie ʼĒkālesia ʼe te riroraʼa ’ei hōʼē tufaʼa nō te hōʼē ʼutuāfare mure ʼore. Mea au nāʼu ’ia faʼaʼite i teie ʼevānelia faʼahiahia i te tahi atu mau taʼata. Te ani-manihini-raʼa i te tahi atu mau taʼata ’ia haere mai i te Mesia ra ʼo tā tātou ïa fā, ʼe e nehenehe tā tātou e faʼatupu i teie fā nā roto i te hiʼoraʼa atu i niʼa ia Iesu Mesia. Tē fa’aʻite pāpū nei au ma te ha’eha’a nō teie mau mea i te i’oa mo’a ’o Iesu Mesia, ’āmene.