Nāhea te Vārua Maita’i e nehenehe ai e tauturu ia ʼoutou ?
Nā Elder Gary E. Stevenson
Nō te pupu nō te Tino ’Ahuru Ma Piti ’Āpōsetolo
’A fa’aea piri noa i te Vārua, ’e e fa’aea piri mai te Vārua ia ’outou.
I te hōʼē pō monire ʼaita i maoro aʼenei, ’ua haere māua tāʼu vahine faʼaipoipo, ʼo Lesa, i te fare o te hōʼē ʼutuāfare ʼāpī i tō mātou vāhi nohoraʼa. I reira, ’ua ani mai te ʼutuāfare ia māua ’ia faʼaea mai nō te pureraʼa pō ʼutuāfare, ma te parau mai ia māua ē nā tā rāua tamaiti e iva matahiti i faʼaineine i te haʼapiʼiraʼa. ’Ua tiʼa roa te reira ʼe ’ua faʼaea atu māua !
I muri aʼe i te hīmene mātāmua, te pure, ʼe te ʼāparaura’a i te tābula ʼohipa ʼa te ʼutuāfare, ’ua haʼamata te tamaiti e iva matahiti i te taiʼo mai i te hōʼē uiraʼa nō roto mai i tāna haʼapiʼiraʼa tei pāpaʼi-rima-hia. « Nāhea te Vārua Maita’i e nehenehe ai e tauturu ia ʼoutou ? » ’Ua haʼamata teie uiraʼa i te hōʼē tāuʼaparauraʼa ʼutuāfare faufaʼa rahi ʼa faʼaʼite ai te mau taʼata tātaʼitahi i tō rātou mau manaʼo ʼe mau hiʼoraʼa. ’Ua faʼahiahia vau i te ineine o te haʼapiʼira’a ʼa tā mātou ʼorometua haʼapi’i ʼe tāna uiraʼa maita’i roa, tāʼu i feruri tāmau noa.
’Ua tāmau noa vau i te ui iāʼu iho mai taua taime ra, « nāhea te Vārua Maitai ʼe nehenehe ai e tauturu ia ʼoutou ? »—te hōʼē uiraʼa faufaʼa rahi mau nō te mau tamari’i Paraimere, fātata i te vaʼu matahiti, te faʼaineine nei nō te bāpetizoraʼa ʼe teie mau tamari’i tei bāpetizohia iho nei ʼe tei fāri’i i te hōroʼaraʼa ʼa te Vārua Maitaʼi. ʼE mea faufaʼa rahi atoʼa te reira nō te mau tauasini melo faʼafāriuhia iho nei
Tē ani nei au ia tātou tātaʼitahi, te mau tamari’i Paraimere ihoa ra, ia feruri, « nāhea te Vārua Maita’i ʼe nehenehe ai e tauturu ia ʼoutou ? » ’A feruri ai au i teie uiraʼa, ’ua haʼamanaʼo ’oi’oi ihora vau i te hōʼē ʼohipa tei tupu i tōʼu ʼāpīraʼa. Teie te hōʼē ʼāʼamu tāʼu i faʼatiʼa atu ia Elder Robert D. Hales i muri noa aʼe i tōʼu piʼiraʼahia i roto i te Pupu nō te Tino ’Ahuru Ma Piti ’Āpōsetolo ʼo tāna i tuʼu atu i roto i te hōʼē veʼa ʼa te ʼĒkālesia ʼe te hōʼē parau nō niʼa i tōʼu oraraʼa.1 ’Ua faʼaroʼo paha te tahi o ʼoutou i teie ʼāʼamu, ʼe rave rahi rā ʼaita.
I te 11raʼa o tōʼu matahiti, ’ua haere atu vau ʼe tōʼu metua tāne te hōʼē mahana veʼaveʼa i te tau māhanahana i niʼa i te mau mouʼa i piha’i iho i tō mātou fare. ʼA haere ai pāpā nā niʼa i te aratiʼa teitei, ’ua ʼōuʼa vau mai te hōʼē ʼōfai rahi i te tahi atu ʼōfaʼi, nā te hiti o te aratiʼa. Nō tōʼu hinaʼaro i te paʼuma atu i niʼa i te hōʼē o te mau ʼōfa’i rahi, ’ua haʼamata vau i te paʼuma atu i te pae niʼa o taua ʼōfa’i ra. ʼA nā reira ai au, ’ua hitimahuta vau ’a haru mai ai tōʼu pāpā iāʼu ma tōʼu hātua ʼe ’ua huti vitiviti iāʼu i raro ma te parau mai, « ʼEiaha e paʼuma i niʼa i tera ʼōfaʼi. ’A haere noa nā niʼa i te aratiʼa ».
Tau minuti i muri mai, ’a hiʼo ai māua mai niʼa mai i te aratiʼa, ’ua hitimahuta māua i tō māua ʼiteraʼa i te hōʼē ʼōfī rahi e tāra’i mahana ra i niʼa i taua ʼōfa’i ra tāʼu i ʼōpua i te paʼuma atu.
I muri mai, ’a tere ai māua nō te ho’i i te fare, ’ua ʼite au te tia’i ra Pāpā iāʼu ’ia ui atu, « nāhea ʼoe i ʼite ai ʼe ’ōfī tō reira ? » Nō reira ’ua ani au, ʼe ’ua arata’i tāʼu uiraʼa i te hōʼē tāuʼaparauraʼa nō niʼa i te Vārua Maita’i, e nāhea te Vārua Maita’i e nehenehe ai e tauturu ia tātou. E’ita roa atu e moʼehia iāʼu i te mea tāʼu i haʼapi’i mai i taua mahana ra.
Tē ʼite ra ānei ʼoutou e nāhea te Vārua Maita’i te tautururaʼa iāʼu ? Tē māuruuru nei au e a muri noa atu nō te mea ’ua faʼaroʼo tōʼu metua tāne i te reo iti haʼihai ʼo te Vārua Maitaʼi, nā te reira ho’i i faʼaora i tōʼu nei oraraʼa.
E aha te mea tā tātou i ʼite nō ni’a i te Vārua Maitaʼi.
Hou tātou ʼa tuatāpapa ai i te uiraʼa « nāhea te Vārua Maita’i e nehenehe ai e tauturu ia ʼoutou ? » e hiʼo faʼahou nā tātou i te tahi o te mau mea tā te Fatu i heheu mai nō ni’a i te Vārua Maitaʼi. E rave rahi parau mau tā tātou e nehenehe e hi’o atu, teie rā mahana e haʼamau vau i niʼa noa e toru.
ʼA tahi, te Vārua Maita’i, o te toru ïa o te melo nō te Atuaraʼa. ’Ua haʼapi’i mai tātou i teie parau mau i roto i te hīroʼa faʼaroʼo mātāmua : « Te tiʼaturi nei mātou i te Atua, te Metua Mure ʼOre, ʼe i Tāna Tamaiti ia Iesu Mesia, ʼe i te Vārua Maita’i hoʼi ».2
Te piti, te Vārua Maita’i o te hōʼē ïa taʼata vārua, mai tei faʼaʼitehia i roto i te pāpaʼiraʼa moʼa nō teie anotau : « E tino ’i‘o ʼe te ivi tō te Metua mai te au iho i tō te taʼata nei te huru ; ʼe te Tamaiti atoʼa ho’i ; are’a te Vāua Maita’i rā, ʼaore ïa tōna e tino ’i‘o ʼe te ivi, tera rā e tino vārua ʼoia. ʼĀhiri ʼaita rā, e ʼore roa ïa e tiʼa i te Vārua Maita’i ’ia pārahi i roto ia tātou nei ».3 Te auraʼa o te reira, e tino vārua ïa tō te Vārua Maitaʼi, e ʼere mai te Atua te Metua ʼe Iesu Mesia, ʼe tino ’iʼo ho’i tō rāua. Tē haʼapāpū nei teie parau mau i te tahi atu mau iʼoa tei hōroʼahia i te Vārua Maita’i ʼe tei matauhia e tātou, mai te Vārua Moʼa, te Vārua ʼo te Atua, te Vārua ʼo te Fatu, te Vārua Moʼa nō te Fafauraʼa, ʼe te Faaaʼo.4
Te toru, e tae mai te hōroʼaraʼa a te Vārua Maita’i nā roto i te tuʼuraʼa rima. E faʼatiʼa teie ʼōroʼa, i muri aʼe i te bāpetizoraʼa, ’ia pārahi tāmau noa mai te Varua Maita’i ia tātou ra.5 Nō te rave i teie ʼōroʼa, e tuʼu ïa te mau taʼata tiʼamā tei mau i te Autahuʼaraʼa ʼa Melehizedeka i tō rātou rima i niʼa i te upoʼo o te taʼata,6 ’ia fa’ahiti i tōna i’oa, e nā roto i te mana o tō rātou autahu’ara’a ’e nā roto i te i’oa o Iesu Mesia, e haʼamau iāna ʼei melo nō te ʼĒkālesia ʼa Iesu Mesia i te Feia Moʼa i te mau Mahana Hopeʼa nei, ma te faʼahiti i te parau faufaʼa rahi : « ’A fāri’i mai te Vārua Maitaʼi ».
Nāhea te Vārua Maita’i e nehenehe ai e tauturu ia ʼoutou ?
Mā taua hiʼo-faʼahou-raʼa ʼōhie nō nā parau mau tumu ʼe toru nō niʼa i te Vārua Maitaʼi, e ho’i ïa tātou i tā tātou uiraʼa mātāmua : « Nāhea te Vārua Maita’i e nehenehe ai e tauturu ia ʼoutou ? »
E faʼaara te Vārua Maita’i
Mai tāʼu i faʼaʼite i roto i te ʼohipa tei tupu i tōʼu nei tamariʼiri’iraʼa, e nehenehe te Vārua Maita’i e tauturu ia ʼoe mā te faʼaara-ātea-raʼa ia ʼoe i te mau ʼati i te pae tino ʼe i te pae vārua. ’Ua haʼapiʼiʼ faʼahou mai au i te ʼohipa faʼaararaʼa faufaʼa rahi ʼa te Vārua Maita’i ’a tāvini ai au i roto i te Peresideniraʼa Ārea i te fenua Tāpōnē.
I roto i taua taime ra, ’ua ’ohipa piri atu vau i te peresideni Reid Tateoka, nō te misiōni nō Japan Sendai. ʼEi tufaʼa nō tāna ʼohipa misiōni, ’ua faʼanaho te peresideni Tateoka i te hōʼē ʼāpoʼoraʼa nā te mau faʼatere misiōnare i te tufaʼa apatoʼa nō tāna misiōni. Tau mahana hou te ʼāpoʼoraʼa, ’ua fāri’i te peresideni Tateoka i te hōʼē faʼaʼiteraʼa, te hōʼē manaʼo i roto i tōna ʼāʼau, ’ia tītau i te tāʼātoʼaraʼa o te mau misiōnare nō taua tufaʼa ra ’ia haere mai i te ʼāpoʼoraʼa faʼatere, ʼeiaha noa rā te mau elders ʼe te mau tuahine faʼatere.
I tōna faʼaʼiteraʼa i tāna ʼōpuaraʼa, ’ua faʼaha’amanaʼohia ’oia ē e ʼere teie ʼāpoʼoraʼa i faʼanahohia nō te mau misiōnare atoʼa nō te mau faʼatere misiōnare rā. Tera rā, ’ua vaiiho ʼoia i te hiti te faʼanahoraʼa nō te peʼe i te faʼaururaʼa tāna i fāri’i ʼe ’ua tītau ʼoia i te mau misionare atoʼa e tāvini ra i roto i te mau ʼoire i te pae tāhatai, mai te ʼoire nō Fukushima, ’ia haere mai i te ʼāpoʼoraʼa. I te mahana faʼataʼahia, te 11 nō māti 2011, ’ua putuputu ’āmui mai te mau misiōnare nō te ʼāpoʼoraʼa misiōni faʼarahihia i te ʼoire nō Koriyama.
I roto i taua ʼāpoʼoraʼa ra, ’ua tāʼiri te hōʼē aueueraʼa fenua te fāito 9 te pūai ʼe te hōʼē miti faʼaʼī i te tufaʼa nō te fenua Tāpōnē tei reira te Misiōni nō Japan Sendai te vairaʼa. Te mea ʼoto, e rave rahi ïa mau ʼoire i te pae tāhatai—mai te mau ʼoire nō reira mai te mau misiōnare tei putuputu mai—tei vāvāhihia ʼe ’ua rahi te feiā i pohe. E ’ua fāri’i te ʼoire nō Fukushima i te hōʼē ʼati ʼatomi i muri mai.
Noa atu ē ’ua parari te fare pureraʼa i te aueueraʼa fenua i reira te mau misionare e ruru ai i taua mahana ra, nā roto i te peʼeraʼa i te mau faʼaʼiteraʼa ʼa te Vārua Maitaʼi, ’ua ruru te peresideni ʼe te tuahine Tateoka ʼe te tāʼātoʼaraʼa ʼo te mau misiōnare ma te fifi ʼore. Tei te hōʼē vāhi rātou e rave rahi kilometera i te ātea i te vāhi i vāvāhihia ʼe te miti faʼaʼī ʼe te ʼati ʼatomi.
’Ia peʼe anaʼe ʼoutou i te mau faʼaʼiteraʼa ʼa te Vārua Maitaʼi—i te rahiraʼa ʼo te taime e mau manaʼo hau ʼe te haʼihaʼi—e nehenehe ʼoutou e faʼaāteʼa-’ē-hia, ma te ʼite ʼore i te tumu, i te ’ati pae vārua ʼe te pae tino.
Te mau taeaʼe ʼe te mau tuahine, e tauturu te Vārua Maita’i ia ʼoutou ma te faʼaararaʼa ia ʼoutou, mai Tāna i nā reira i tōʼu metua tane ʼe i te peresideni Tateoka.
E tāmāhanahana te Vārua Maita’i
Nō te pāhono tāmau i te uiraʼa « nāhea te Vārua Maita’i e nehenehe ai e tauturu ia ʼoutou ? » e hiʼopoʼa nā tātou i Tāna tufa’a ʼohipa ʼei Faaa’o. E faʼatupu te mau ʼohipa manaʼo-ʼore-hia i roto i tō tātou oraraʼa atoʼa i te ʼoto, te māuiui, ʼe te ʼinoʼino. Noa atu rā teie mau tamatara’a, e tāvini te Vārua Maita’i ia tātou. I roto i te hōʼē ʼo Tāna ʼohipa faufaʼa rahi—te Faaa’o, ʼo te hōʼē ia ’o Tōna ra mau iʼoa. Tē faʼaʼite mai nei teie mau parau hau ʼe te pāpū ʼa Iesu Mesia i teie ʼohipa moʼa, « nāʼu ho’i e ani atu i te Metua ra, e Nāna e hōroʼa mai i te tahi Faaaʼo ia ʼoutou, ’ia pārahi mau ʼoia ʼe ʼa muri noa atu ».7
Nō te faʼahōhoʼa atu ā i te reira, e faʼaʼite atu vau i te ʼāʼamu mau nō te hōʼē ʼutuāfare e pae tamāroa tei tere mai nā Los Angeles, California, Marite, mai i te hō’ē tuha’a ’oire iti e rave rahi matahiti i teie nei. ’Ua haʼamata nā tamāroa paʼari aʼe e piti i te haʼuti i te mau ʼohipa tuʼaro i roto i te fare ha’api’ira’a tuarua ʼe i te ʼāmui atu i te mau hoa, te feiā faʼatere, ʼe te mau taʼata faʼaineine—e rave rahi ʼo rātou e mau melo haʼapaʼo nō te ʼĒkālesia. ’Ua tauturu teie mau auraʼa ’ia arata’i atu i te bāpetizoraʼa ʼo Fernando, te matahiapo, ʼe tōna teina.
I muri mai ’ua faʼaātea atu Fernando i te ʼutuāfare nō te haere i te haʼapiʼiraʼa ʼe ’ua haʼuti tu’e popo i te fare haʼapiʼiraʼa teitei. ’Ua faʼaipoipo ʼoia i tōna hoa here nō te fare haʼapiʼiraʼa tuarua, o Bayley, i roto i te hiero. I tō rāua faʼaotiraʼa i tā rāua haʼapiʼiraʼa, ’ua tia’i Fernando ʼe Bayley ma te ʼoaʼoa rahi i te fānauraʼa ʼo tā rāua tamari’i mātāmua—te hōʼē tamāhine iti. I roto rā i te taime ʼa tauturu ai tō rāua nā ʼutuāfare ia Fernando ʼe ia Bayley nō te ho’i i te fare, tē tere ra o Bayley ʼe tōna tuahine i niʼa i te poromu rahi ’ō atu nei rāua i roto i te hō’ē ’ati poromu e rave rahi pereoʼo uira. ’Ua fa’aru’e mai o Bayley ʼe tāna tamāhine tei ʼore ā i fānauhia.
E mea hōhonu te māuiui ʼo Fernando, mai te māuiui atoʼa ʼo te mau metua ʼo Bayley ʼe tōna mau taeaʼe ʼe mau tuahine, e mea taʼa ʼē rā te hōhonuraʼa o te hau ʼe te tāmāhanahana i niniʼihia mai i niʼa ia rātou fātata i te reira ihoa taime. ’Ua pāturu mau te Vārua Maita’i i roto i Tāna ʼohipa ʼei Faaaʼo ia Fernando i roto i teie ʼati rahi taʼa-ʼore-hia. ’Ua faʼaʼite mai te Vārua i te hau tei arata’i ia Fernando ’ia faʼaʼore i te hape ʼe ’ia here i te mau taʼata atoʼa tei faʼatupu i te ʼati pohe.
’Ua niuniu atu te mau metua ʼo Bayley i tōna teina e tāvini ra ʼei misiōnare i te taime nō te ʼati. ’Ua faʼaʼite ʼoia i roto i te hōʼē rata i tōna ʼutuāfare i tōna mau manaʼo i te faʼaroʼoraʼa i te parau ʼāpī peʼapeʼa nō tōna tuahine here : « E mea māere mau ’ia faʼaroʼo i tō ʼoutou mau reo hau maita’i i rotopū i te hōʼē vero. ʼAita vau i ʼite e aha te parau… Te mea noa tāʼu e manaʼo nei ʼaita ïa tōʼu tuahine i reira ‘ia ho’i atu vau i te fare… ‘Ua tāmāhanahana tō ʼoutou mau ʼiteraʼa pāpū ʼaueue ʼore nō niʼa i te Faʼaora ʼe Tāna ʼōpuaraʼa iāʼu. ’Ua ’ī tōʼu ʼāʼau i taua vārua hau ʼe te mārū ra ʼo tei faʼata’i iāʼu ’a taiʼo ai ʼe ’a haʼapi’i ai au. I reira ’ua tāmāhanahanahia vau ʼe ’ua faʼahaʼamanaʼohia vau i te mau mea tāʼu i ʼite ».8
E tauturu te Vārua Maitai ia ʼoutou ma te tāmāhanahana ia ʼoutou, mai Tāna i nā reira ia Fernando ʼe te ʼutuāfare ʼo Bayley.
E faʼaʼite pāpū te Vārua Maita’i i te parau mau
E faʼaʼite pāpū atoʼa te Vārua Maita’i i te parau nō te Metua ʼe te Tamaiti ʼe te mau parau mau atoʼa.9 « ’Ia tae mai rā te Faaaʼo nō ’ō mai i te Metua ra nāʼu e tono mai… nāna vau e faʼaʼite ».10
Nō te faʼaʼite atu i te faufaʼa rahi o te ʼohipa ʼa te Vārua Maita’i ’ei ʼite, e tāmau noa vau i te faʼatiʼa atu i te ʼāʼamu ʼo Fernando ʼe ʼo Bayley. Mai te mea te haʼamanaʼo ra ʼoutou, ’ua parau atu vau ē ’ua bāpetizohia ʼo Fernando ʼe tōna teina, ʼaita rā tōna nā metua ʼe e toru mau taeaʼe ʼāpī aʼe. ʼE, noa atu te fāriʼiraʼa i te mau aniraʼa e rave rahi ’ia fārerei i te mau misiōnare i te roaraʼa ʼo te mau matahiti, ’ua pāto’i noa te ʼutuāfare i te mau taime atoʼa.
I te poheraʼa ʼoto ʼo Bayley ʼe tāna aiū tamāhine, ʼaita te ʼutuāfare ʼo Fernando i nā te ʼoto. Mai ia Fernando ’e mai te ’utuāfare o Bayley, ʼaita rātou i ’ite te tāmāhanahanaraʼa ’aore rā te hau. ʼAita i nehenehe ia rātou ’ia hāroʼaroʼa e nāhea ai i tā rātou iho tamaiti ʼe te ʼutuāfare ʼo Bayley ’ia faʼaʼoroma’i i tā rātou hōpoiʼa teimaha.
I te pae hopeʼa ’ua faʼaoti rātou ē te mea tei mauhia e tā rātou tamaiti ʼe tei mau-ʼore-hia e rātou o te ʼevānelia ïa ʼa Iesu Mesia tei faʼahoʼihia mai, e teie te tumu mau nō tōna hau ʼe te itoito. I muri aʼe i te ʼiteraʼa i te reira, ’ua tītau rātou i te mau misiōnare ’ia haʼapi’i i tō rātou ʼutuāfare i te ʼevānelia. ʼEi hopeʼaraʼa, ’ua fāri’i rātou i tō rātou iho ʼiteraʼa ʼe te haʼapāpūraʼa nō niʼa i te rāveʼa rahi ʼoaʼoa, tei ʼafa’i atu ia rātou te hau mārū ʼe te tāmāhanaharaʼa tā rātou i ʼimi noa nā.
E piti ʼāvaʼe i muri aʼe i te poheraʼa ʼo Bayley ʼe tā rātou moʼotua tamahine fānau-ʼore-hia, ’ua bāpetizohia te mau metua ʼo Fernando ʼe e piti o tōna nau taeaʼe ʼāpī, ʼe ’ua ha’amauhia ’e ’ua fāri’i i te hōro’ara’a ʼa te Vārua Maitaʼi. Tē tia’i nei te taeaʼe ʼāpī roa aʼe ʼo Fernando, e ono matahiti i teie nei, i tōna bāpetizoraʼa ia vaʼu anaʼe tōna matahiti. ’Ua faʼaʼite pāpū mai rātou tātaʼitahi ē ’ua faʼaʼite te Vārua, te Vārua Maita’i i te parau mau nō te ʼevānelia, tei arata’i ia rātou i te hōʼē hinaʼaro ’ia bāpetizohia ʼe ’ia fāri’i i te hōroʼaraʼa ʼa te Vārua Maita’i.
Te mau taeaʼe ʼe te mau tuahine, e tauturu te Vārua Maita’i ia ʼoutou ma te faʼaʼite pāpū atu ia ʼoutou i te parau mau, mai Tāna i nā reira i te ʼutuāfare ʼo Fernando.
Pu’ohura’a
E puʼohu tātou i teie nei. ’Ua ʼite tātou e toru parau mau i heheuhia mai o te arata’i ia tātou i te hōʼē ʼiteraʼa nō niʼa i te Vārua Maitaʼi. ʼOia hoi te Vārua Maita’i ʼo te toru ïa o te melo nō te Atuaraʼa, e taʼata vārua te Vārua Maita’i, ʼe e noaʼa te hōroʼaraʼa ʼa te Vārua Maita’i nā roto i te tuʼuraʼa rima. ’Ua ʼite atoʼa tātou e toru pāhonoraʼa nō te uiraʼa « nāhea te Vārua Maita’i ʼe nehenehe ai e tauturu ia ʼOutou ? » E faʼaara te Vārua Maitaʼi, e tāmāhanahana te Vārua Maita’i, ʼe e faʼaʼite pāpū te Vārua Maita’i i te parau mau.
’Ia vai parau-tiʼa noa nō te tāpeʼa mai i te hōroʼaraʼa
Nō ʼoutou o te faʼaineine nei ’ia bāpetizohia ʼe ia haʼamauhia ʼaore rā o ʼoutou tei bāpetizohia iho nei ʼaore ra ʼe mea maoro aʼenei, e mea faufaʼa rahi nō tō tātou pārururaʼa i te pae tino ʼe i te pae vārua ’ia tāpeʼa tātou i te hōroʼaraʼa ʼa te Vārua Maitaʼi. E haʼamata tātou ’ia nā reira ma te faʼaitoitoraʼa i te haʼapaʼo i te mau faʼaueraʼa, te pure tātaʼitahi ʼe te pure ʼutuāfare, te taiʼoraʼa i te mau pāpaʼiraʼa moʼa, ʼe te ʼimiraʼa i te mau auraʼa here ʼe te faʼaʼoreraʼa hapa i rotopū i tō tātou ʼutuāfare ʼe i te mau taʼata i herehia e tātou. E tiʼa ia tātou ’ia tāpeʼa mā noa i tō tātou mau manaʼo, mau ʼohipa ʼe mau parau. E tiʼa ia tātou ’ia haʼamori i tō tātou Metua i te Ao ra i roto i tō tātou ʼutuāfare, i te fare pureraʼa ʼe i roto i te hiero moʼa. ’A fa’aea piri noa i te Vārua, ’e e fa’aea piri mai te Vārua ia ’outou.
ʼIteraʼa pāpū
ʼE faʼaoti au i teie taime mā te hōʼē aniraʼa ʼe tōʼu ʼiteraʼa pāpū mau. Tē ani nei au ia ʼoutou e ’ia ora hau atu ā i te mau parau tei hīmene-pinepine-hia ʼe tā tātou mau tamari’i Paraimere, te mau parau, ’ua pāpū iāʼu e ʼite rātou : « ’A faʼaroʼo, ’a faʼaroʼo. E muhumuhu mai te Vārua Maitaʼi. ʼA faʼaroʼo, ʼa faʼaroʼo i te reo iti ha’iha’i ».11
E tōʼu mau taeaʼe ʼe mau tuahine here ē, te mea paʼari ʼe te mea ʼāpī, tē pūpū atu nei au i tōʼu ʼiteraʼa pāpū nō niʼa i te oraraʼa hanahana ʼo te mau taʼata nō te Atuaraʼa : Te Atua te Metua, Iesu Mesia, ʼe te Vārua Maitaʼi. Tē faʼaʼite pāpū atu nei au ē te hōʼē o te mau haʼamaitaʼiraʼa tā tātou e fānaʼo nei ’ei Feiā Moʼa i te mau Mahana Hopeʼa nei e ora nei i roto i te ’īraʼa o te mau tau nō te horoʼaraʼa ʼa te Vārua Maitaʼi. ’Ua ʼite au ē e rave ’e e tauturu te Vārua Maita’i ia ’outou. Te ’āpiti atoʼa nei au i tōʼu ʼiteraʼa taʼa ʼē nō Iesu Mesia ʼe Tāna ʼohipa ʼei Faʼaora ʼe ʼei Tāraʼehara nō tātou ʼe nō te Atua tō tātou Metua i te Ao ra. Nā roto i te i’oa ʼo Iesu Mesia ra, ’āmene.