’Ua hi’o atu ra Iesu iāna ’e ’ua aroha atu ra iāna

Nā Elder S. Mark Palmer

Nō te Hitu ’Ahuru

I te mau taime ato’a e anihia ’outou ia rave i te hō’ē ’ohipa fifi, ’a feruri i te Mesia o te hi’o ra ia ’outou, arohara’a atu ia ’outou, ’e te ani-manihi-ra’a ia ’outou ’ia pe’e Iāna.

I nā matahiti i ma’iri a’e nei, ’ua pi’ihia vau, e tā’u vahine fa’aipoipo, Jacqui, ’ia peresideni i ni’a i te misiōni o Washington Spokane. ’Ua tae māua i te misiōni ma te taiā ’e te ’āehuehu i te hōpoiʻa ’ia ’ohipa ’e te mau misiōnare ’āpī fa’ahiahia mau. ’Ua haere mai rātou na te mau tuha’a ta’a ’ē e ’ua riro vitiviti roa rātou ’ei mau tamāroa ’e ’ei tamāhine nā māua.

Noa atu ā te ’ohipa maita’i a te rahira’a o rātou, are’a rā te tahi pae o te ’aro nei i mua i te mau tia’ira’a teitei o tā rātou pi’ira’a. Tē ha’amanao ra vau i te hō’ē misiōnare o te parau mai, « peresideni, ’aita vau i here i te mau ta’ata ». E mea rahi o rātou o tei fa’a’ite mai i tō rātou ’orera’a e hina’aro ’ia pe’e i te mau ture ’eta’eta misiōnare. ’Ua ha’ape’ape’a vau ma te ani e aha tā māua e nehenehe e rave nō te taui i te ’ā’au o te reira mau misiōnare o tei ’ore atu ra i ha’api’i i te ’oa’oa nō te ha’apa’ora’a.

I te hō’ē mahana, ’a haere ai au nā te hiti o te mau fa’a’apu tītona nehenehe o te ’ōti’a o Washington-Idaho, tē fa’aro’o ra vau i te hō’ē rīpene a te faufa’a ’āpī. ’A fa’aro’o ai au i te ’ā’amu o te tamaiti āpī tao’a rahi i te haerera’a i mua i te Fa’aora ma te ani nāhea e noa’a ai Iāna te ora mure ’ore, ’ua fāri’i au i te hō’ē heheura’a mana’o-’ore-hia e te hōhonu rā o tei vai ’ei ha’amana’ora’a mo’a nō’u.

I muri iho i tō’u fa’aro’ora’a ’ia Iesu ’ia fa’ahiti mai i te mau fa’auera’a ’e i te pāhonora’a a te tamaiti ’āpī, ’ua hope roa te reira i te ha’apa’ohia e āna mai tōna ’āpīra’a, ’ua fa’aro’o vau i te a’o marū a te Fa’aora : « Te toe ra te hō’ē mea ia ’oe : …’a ho’o atu i tā ’oe ra, ’e… ’a haere mai… ’a pee mai ai iā’u ».¹ Are’a ra, i tō’u māere, ’ua fa’aro’o vau e ono ta’o nā mua a’e o teie tuha’a o te ’īrava e au ra ē, ’aita vau i fa’aro’o ’aore rā i tai’o nā mua a’e ; tei reira rātou mai te huru ra ē, ’ua po’ihia i te pāpa’ira’a mo’a. ’Ua māere au i teie ’itera’a hōhonu heheuhia ’e o tei vauvauhia mai.

E aha teie mau ta’o e ono o te hōro’a i te hō’ē hotu hōhonu. ’A fa’aro’o, mai te mea e ’ite ’outou i teie mau ta’o mai te huru mā’ohi o te ’ore e ’itehia i roto i te tahi atu mau ’ā’amu nō te ’Evanelia maoti ra o te ’ite-noa-hia i roto i te ’evanelia a Mareko :

« E horo mai ra te hō’ē ta’ata… ‘ua ui mai ra, e te ‘orometua maita’i, e aha vau e noa’a ai te ora mure ‘ore ?

« ‘Ua parau atu ra Iesu…

« ’Ua ’ite ’oe i te ture, ’eiaha e fa’aturi, ’eiaha e tāparahi i te ta’ata, ’eiaha e eiā, ’eiaha e pari ha’avare, e fa’atura atu i tō metua tāne ’e tō metua vahine ».

« ’Ua parau mai ra ’oia iāna… E te ’orometua, ’ua hope roa te reira i te ha’apa’ohia e au mai tō’u ‘āpīra’a

« ’Ua hi’o atu ra Iesu iāna ’e ’ua aroha atu ra iāna, nā ’ō atura, tē toe ra te hō’ē mea ia ’oe, ’a haere, ’a ho’o atu i tā ’oe ra e hope roa ’e, ’a hopoi atu ai nā te ta’ata ri’i, ’e e tao’a tā ’oe i te ao i reira, e haere mai ai, ’a rave ai i tō sātauro, ’a pe’e mai ai iā’u ».²

« ’Ua hi’o atu ra Iesu iāna ’e ’ua aroha atu ra iāna ».

’A fa’aro’o ai au i teie mau ta’o, ’ua ’ī tō’u nei ferurira’a i te hō’ē hōho’a o tō tātou Fatu o tei fa’aea noa, ma te hi’o atu i teie tamaiti ’āpī. Hi’o atu ra—mai te hi’ora’a hōhonu ’e te tomo atu i roto i tōna vārua, ma te ’ite i tōna maita’i ’e ’oia ato’a i te ’īra’a o tōna huru, mai te hāro’aro’a i tōna hina’aro rahi.

I muri mai i te mau ta’o ’ōhie—aroha atu ra Iesu iāna ». ’Ua fāri’i ’oia i te hō’ē here ’e te aroha rahi nō teie tamaiti ’āpī, ’e nō tōna here, ’e nā roto i te reira here, ’ua ani Iesu hau atu iāna. ’Ua feruri au i te ’ohipa tāna i fāri’i nō teie tamaiti ’āpī o te pū’ohuhia e teie huru here noa atu ’ua anihia ’ia rave i te hō’ē ’ohipa fifi mau mai te ho’ora’a i te tā’āto’ara’a o tāna mau tao’a ’e te hōro’ara’a na te mau ta’ata ri’i.

I te reira taime, ’ua ’ite au ē, e ’ere noa te māfatu o te tahi mau misiōnare o te ti’a ’ia taui. O tō’u ato’a ra. E ’ere fa’ahou ra te uira’a : « Nāhea te hō’ē peresideni misiōni ’ino’ino e tauturu i te hō’ē misiōnare fifi ’ia taui i te hō’ē huru maita’i ? Teie ra te uira’a : « Nāhea vau ’ia ’ī i te huru here Mesia, ’ia nehenehe i te hō’ē misiōnare ’ia fāri’i i te here o te Atua, nā roto iā’u ’e ’ia hina’aro ’ia taui » ? Nāhea vau ’ia hi’o ia rātou mai te Fatu i hi’o i te tamaiti ’āpī tao’a rahi, te ’itera’a ia rātou mai tō rātou iho huru ’e te huru o te nehenehe ia rātou ’ia riro mai, ’eiaha noa ra i te ’ohipa e ravehia e rātou ’aore rā ’aita. Nāhea vau ’ia riro mai te Fa’aora ?

« ’Ua hi’o atu ra Iesu iāna ’e ’ua aroha atu ra iāna ».

Mai te reira taime, ’ia pārahi ana’e au turi ’e turi ’e te hō’ē misiōnare o tei fifi ’e te tahi atu huru nō te fa’aro’o, i roto i tō’u māfatu, te ’ite nei au i te hō’ē tamāroa ’āpī ’aore rā hō’ē tamāhine ’āpī o te rave i te hō’ē ’ohipa ma te hina’aro ’ia haere i te misiōni. ’Ua nehenehe iā’u ’ia parau mai te reira taime, i te mau ’ite o te hō’ē metua marū :³ « Elder ’aore rā tuahine, mai te mea ’aita vau i here ia ’oe, ’aita vau e ha’apa’o e aha te tupu i roto i tā ’oe misiōni. Tera rā, ’ua here au ia ’oe, ’e nō te reira, e ha’apa’o vau o vai ’oe ’ia riro mai. Nō te reira, tē ani nei au ’ia taui ’oe i teie mau mea fifi nō ’oe ’e ’ia riro ’oe ’ia au i tā te Fatu e hina’aro ia ’oe ’ia riro mai.

I te mau taime ato’a e uiui ai au i te mau misiōnare, e pure nā mua vau nō te fāri’i i te ō o te aroha ’e ’ia ’ite au i te elder ’e te tuahine tāta’itahi mai tā te Fatu e ’ite ra iāna.

Nā mua a’e i te mau ’āpo’ora’a ārea, ’a aroha ai te tuahine Palmer ’e ’o vau nei i te misiōnare tāta’itahi, e fa’aea vau, ’e e hi’o vau i roto i te hōhonu o tō rātou mata, ma te hi’o ia rātou—te hō’ē ïa uiuira’a ma te parau ore—’e i reira ma te tāvava ’ore, ’ua ’ī au i te here rahi nō teie mau tamāroa ’e tamāhine faufa’a rahi a te Atua.

’Ua ha’api’i au e rave rahi mau ha’api’ira’a nō te tauira’a i te orara’a nō roto mai i teie mea hōhonu tā’u i ’ite i roto i te pene 10 a Mareko. Teie e maha ha’api’ira’a o tā’u e ti’aturi o te tauturu ia tātou tātaitahi :

’A ha’api’i ai tātou i te hi’o ia vetahi ’ē mai te Fatu e hi’o ra ia rātou ’eiaha ra i tō tātou iho mata, e rahi atu tō tātou here nō rātou, ’e e rahi ato’a atu tō tātou hina’aro ’ia tauturu ia rātou. E ’ite tātou i te ’īra’a o tō rātou huru tā rātou e ’ore e ’ite rātou iho. Nā roto i te here Huru Mesia, ’aita tātou e taiā ’ia parau ma te mata‘u ’ore, « e pe’e te mata’u i te aroha ti’a mau ra ».⁴ ’Eiaha tātou e fa’aru’e, e ha’amana‘o ē te feiā e mea fifi ’ia here, o rātou ïa tei hina’aro rahi i te here.
’Aita roa e ha’api’ira’a mau ’aore e ’ohipa e tupu nā roto i te ’ino’ino ’e te riri, ’e ’aita te mau māfatu e taui ’aita ana’e e here. ’Ia rave tātou ’ei ti’ara’a metua, ha’api’i, ’aore rā e ta’ata fa’atere, e tupu noa te ha’api’ira’a mau i roto i te hō’ē taime o te ti’aturira’a ’eiaha ra te fa’ahapara’a. Tītauhia ’ia riro noa tō tātou ’utuāfare ’ei mau vāhi ha’apūora nō tā tātou mau tamari’i—’eiaha ra ’ei vāhi enemira’a.
’Eiaha roa e ’īriti te here mai te mea e ’ore te hō’ē tamari’i, hoa, ’aore ra melo nō te ’utuāfare e ora i te mea tā tātou e tia’i ra. ’Aita tātou i ’ite e aha tei tupu i te tamaiti ’āpī tao’a rahi i muri iho i tōna haerera’a ma te ’oto, tera rā, ’ua ti’aturi au, ’ua here noa Iesu iāna noa atu ’ua ma’iti i te ’ē’a ’ōhie aʻe. Penei a’e i roto i te orara’a i muri mai, ’a ’ite ai ’oia i tāna mau tao’a rahi po’opo’o, ’ua ha’amana‘o ’e ’ua rave mai te au i te ’ohipa fa’ahiahia a Tōna Fatu tei hi’o, tei here ’e tei ani ia pee atu Iāna.
Nō te mea ’ua here ’oia ia tātou, e ani rahi atu a te Fatu ia tātou. Mai te mea e mea haeha’a tātou, e fāri’i manihini tātou i te anira’a a te Fatu ’ia tātarahapa, ’ia fa’atusia, ’e ’ia tāvini ’ei tāpa’o nō tōna here maita’i hope nō tātou. I te pae hope’a, te hō’ē anira’a nō te tātarahapa, ’oia ato’a i te hō’ē anira’a ’ia fāri’i i te ō fa’ahiahia nō te fa’a’orera’a hapa ’e te hau. Nō reira « ’eiaha ’oe… e ha’afaufa’a ’ore i te a’o a te Fatu nei, ’eiaha ho’i ’ia pau te aho ’ia fa’ahapahia mai ’oe e āna ra ; o tā te Fatu e here ra, o tāna ïa e a’o mai ».⁵

Tō’u mau taea’e ’e mau tuahine here, i teie nei, ’ia anihia ’outou ’ia rave i te tahi ’ohipa fifi—mai te fa’a’orera’a i te hō’ē peu ’i’ino ’aore rā i te hō’ē fa’atītīra’a, tāpapara’a i te mau ’ohipa o te ao nei, fa’atusiara’a i te hō’ē fa’a’oa’oara’a nō te mea e mahana Sābati, fa’aore i tei hara ia ’outou—’a ha’amana’o te hi’o mai ra te Fatu ia ’outou, ’ua here ia ’outou, e tāna anira’a ’ia fa’aru’e i te reira mau mea ’e ’ia pe’e Iāna. Tē ha’amauruuru nei au Iāna nō tōna here nava’i nō te ani manihini ia ’outou ’ia rave hau atu ā.

Tē fa’aite pāpū nei au nō tō tātou Fa’aora, o Iesu te Mesia, e te tia’i noa nei au i te mahana a tauahi marū noa mai ai ’oia ia tātou tāta’itahi, ’a hi’o mai ai, ’a ha’ati mai ai i tōna here maita’i roa ra. Nā roto i te i’oa o Iesu Mesia ra, ’āmene.