Fiefia ʻi he hoko ko ha Ākonga ʻa Sīsū Kalaisi

Kuó ke aʻusia ha ʻaho ne ʻikai lelei? Ko e hā naʻá ke fai ke ke fiefia aí? ʻOku ʻilo ʻe Palesiteni ʻUkitofa ʻoku “tau takitaha maʻu e loto mamahí, taʻe fiemālié, mo e ngaahi mamahí. Te tau ongoʻi loto-foʻi mo lomekina he taimi ʻe niʻihi.”

Ko ʻene founga solovaʻangá ko hono moʻui ʻaki ʻa e meʻa ʻokú ne ui “ko e moʻui ʻa ha ākonga”: “tui faivelenga pea laka ki muʻa ʻi he tui.” ʻI he taimi ʻoku tau laka atu ai ʻi he tuí, ʻoku tau lava ʻo falala ki he ʻOtuá, tauhi ʻEne ngaahi fekaú, mo tokoniʻi e niʻihi kehé—mo ongoʻi fiefia lolotonga kotoa ia! Hangē ko e lea ‘a Palesiteni ʻUkitofá, “Ko kinautolu ʻoku nau moʻui ʻaki e moʻui ʻa ha ākongá … ko kinautolu ia ʻoku hoko ʻenau fanga kiʻi ngāue īkí ke fakahoko ha faikehekehe ʻoku lahí.”

Fakakaukau ke ʻai ha lisi ʻo e ngaahi founga te ke lava ai ʻo moʻui ʻaki ʻa e moʻui ʻa ha ākonga. Hangē ko ʻení, ʻe lava ke ke hiki ha fakakaukau ngāue tokoni hangē ko e “Tokoni ki ha mātuʻa ke teuteu e meʻatokoni efiafí” pe ko ha foʻi fakakaukau ki hono tauhi ʻo e ngaahi fekaú ʻo hangē ko e “Lotu ke faʻa kātaki ange ki hoku ngaahi tokouá.” ʻI he taimi ʻokú ke ongoʻi mafasia ai pe lomekiná, toʻo mai hoʻo lisí, fili ha fakakaukau, pea ʻahiʻahi fakahoko ia!