Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻá ku Fie Maʻu Nai ʻa e SĀKALAMĒNITÍ?
Tā fakatātaaʻi ʻe Joshua Dennis
Naʻe toe pē ha miniti ʻe nima pea fakahoko e houalotu sakalamēnití, ka kuo kamata e fakafiufiú, tuʻo ua ki he fale mālōloó, fetongi ʻo ha taipa, mo e tangi tuʻo lahi ʻo e “ʻOku ou fiekaia!”
ʻI heʻeku hoko ko ha faʻē ʻa ha fānau iiki ʻe toko nima, mo ha husepāniti ʻoku toki fakaʻatā pē ke foki mai ki ʻapi ʻi he fakaʻosinga ʻo e uiké, ʻoku ou faʻa ongoʻi ongosia ʻi he aʻu ki he ʻaho Sāpaté. ʻI he lue homau fāmilí kotoa ki he falelotú he Sāpaté, ʻoku ma mateuteu maʻu pē mo hoku husepānití ki ha houa ʻe taha ʻo e meʻa ʻokú ma ui ko e “faʻa kātaki fuoloa.”
Hili ha miniti ʻe hongofulu mā nima ʻi he houalotú, naʻe tangi leʻo lahi ʻema pēpē māhina ʻe hivá. Naʻá ku feinga ke ne fakalongolongo mo fakanonga ia. ʻI he ʻikai ke u lavá, naʻá ku ʻave ia mei he falelotú ke fakafiemālieʻi ia. ʻI heʻeku tangutu hifó, naʻe kamata ke tukutaha ʻeku ongosiá ʻi he ngaahi fie maʻu ʻo e uike ka hokó. Naʻá ku ongoʻi lōmekina.
Naʻá ku kiʻi ʻohovale ʻi he ʻasi fakafokifā mai ha kiʻi talavou mo e sākalamenití. “ʻOkú ke fie maʻu ʻeni?” ko ʻene fehuʻí mai ia. Ko ha fehuʻi faingofua ʻeni, ka naʻe ongo ki hoku lotó. Naʻe vave hono fakafonu au ‘e he Laumālié, pea naʻe kamata ke tō hoku loʻimatá. Naʻá ku fakakaukau kiate au: “ʻOku fuʻu fie maʻu ʻaupito.”
ʻOku hanga ʻe he ngaahi fie maʻu fakaʻahó mo e ngaahi fatongiá ʻo fakamafasiaʻi kitautolu, ka ko e sākalamēnití ʻe lava ke ne fakafonu kitautolu. ʻI heʻeku kai e sākalamēnití, ne u ongoʻi e nongá pea mo e fakamoʻuí ʻoku hoko ʻiate au. ʻI he momeniti ko iá naʻá ku fakatokangaʻi naʻá ku fuʻu fie maʻu ʻa e sākalamēnití ʻo laka ange ʻi ha toe meʻa koeʻuhí he naʻá ku fie maʻu e Laumālié ke ʻiate au.
Na‘e tukutaha ʻeku tokangá ki ha tā valivali ʻo e Fakamoʻuí ʻi he loki talitaliʻanga kakaí ʻoku mafao mai Hono toʻukupú. ‘Oku langaki ʻa e loto houngaʻia ʻi hoku lotó ʻi heʻeku fakalaulauloto ki he founga ʻokú Ne mateuteu maʻu pē ke fakamoʻui mo fakamālohia kitautolú. ʻOku fakamanatu mai ʻeni kiate au he Sāpate kotoa ʻi heʻeku maʻu e sakalamēnití. ʻOku ou fakamālō ʻi hono akoʻi au ʻe he Laumālié ʻi ha kiʻi fehuʻi faingofua ʻi he lotolotonga ʻo e ngaahi faingataʻa ʻo e moʻuí, ko e Fakamoʻuí hotau maʻuʻanga iví mo e nongá.