Niki Kovingitoni

Lasio, ʻĪtali

ʻĪmisi

Niki and family at dinner

Kuo ʻomi tuʻo lahi ʻe hono ako ʻo e ngaahi tā fakatātā fuoloá, ʻa Niki mo hono fāmilí ki ʻĪtali. ʻOku lolotonga ako ʻa Niki ʻi Loma, ko ha feituʻu ʻokú ne kumi ai ha ngaahi founga ke fakaʻaongaʻi hono ngaahi talēnití mo e tā valivalí ke fakamoʻoni kia Sīsū Kalaisi.

Cody Bell, taha faitaá

ʻOku mau fakaʻamu ʻi heʻemau hoko ko ha fāmilí, ke fakaʻaongaʻi e ngaahi talēniti ʻoku mau ongoʻi kuo foaki mai ʻe he ʻOtuá, ke fai ha fakamoʻoni ki he ongoongoleleí pea ʻomi ʻa e ʻofa ʻa Kalaisí ki he moʻui ʻa e niʻihi kehé. Kuo tāpuekina ʻaki au ha ngaahi talēniti ʻoku fakangatangata pē, pea kuó u lava ai ʻo fakatupulaki ha niʻihi pē ʻo kinautolu. Mahalo ʻoku maʻu ʻe ha niʻihi ʻa e talēniti ʻo e ʻofa faka-Kalaisí, ko ha niʻihi ko e meʻafoaki ʻo e faʻu tohí, pea ʻi ai ha niʻihi ʻoku nau maʻu ha ngaahi meʻafoaki lahi.

ʻOkú ke fakaʻaongaʻi fēfē e ngaahi meʻafoaki mo e talēniti kuo foaki atu ʻe he ʻOtuá ke vahevahe mo e niʻihi kehé hoʻo fakamoʻoní pea mo hoʻo ngaahi ongo fekauʻaki mo e ongoongoleleí? Kuo fakaʻaiʻai ʻe he fehuʻi ko ʻení homau fāmilí ke feinga fakamātoato ke ʻilo pe ko e hā homau ngaahi meʻafoakí, pea mo e founga te mau fakaʻaongaʻi ai kinautolu ke fakamoʻoni ki he Fakamoʻuí.

Kuo tupu heni haʻaku toe fakatotolo mo ako lahi ange fekauʻaki mo e ʻuhinga ʻo e ʻātí, feituʻu naʻe ʻomai ia mei aí, mo hono vā mo e fatongia ʻi he ongoongoleleí.

ʻI heʻeku ako e ngaahi tupuʻanga ʻo e ʻātí, kuó u ʻilo ai ʻa e matuʻaki toputapu hono tupuʻangá ʻi he ʻOtuá. Ko e tupuʻanga ia ʻo e meʻa fakaʻofoʻofa, angamaʻa, mo e moʻoni kotoa pē. ʻOku tupu ʻa e meʻa fakaʻofoʻofa kotoa pē meiate Ia. Ko ha ʻilo lahi eni kiate au ko ha tokotaha tā valivali. Fakatauange pē, te u lava ʻo tuku ia ko ha fakamoʻoni ki heʻeku fānaú mo e niʻihi kehé ʻo fakafou ʻi he ngāue ʻa hoku ongo nimá.