Vahe ‘o e Kau Taki Fakaʻēlia Foʻoú

Vakai ki he news.lds.org ki ha ongoongo lahi ange mo e meʻa ʻoku hoko ʻi he Siasí.

Kuo fanongonongo ʻe he Kau Palesitenisī ʻUluakí ha ngaahi liliu ki he ngaahi tuʻunga takimuʻa fakaʻēliá, ʻo kamata ʻi he ʻaho 1 ʻo ʻAokosi 2017.

ʻOku ui ʻa e Kau Fitungofulú ʻi he fakahā, ʻo fakatatau mo e fakahinohino ʻa e Kau Palesitenisī ʻUluakí, ke tokoni ki he Kōlomu ʻo e Kau ʻAposetolo ʻe Toko Hongofulu Mā Uá ʻi heʻenau ngāue ʻi he funga ʻo e māmaní. ʻOku puleʻi ʻe he Kau Palesitenisī ʻo e Kau Fitungofulú mo e Kau Palesitenisī Fakaʻēliá ha ngaahi feituʻu fakasiokalafi, pea ʻoku fononga ‘a e kau taki fakaʻēliá ʻi honau ʻēlia kuo vahe angé ke akoʻi mo poupouʻi e kau taki fakalotofonuá mo e kau mēmipa ʻo e Siasí.

Lolotonga e ngāue ʻa Kalaisi he māmaní, naʻá Ne ui ʻa e Kau Fitungofulú, ʻo fakahinohinoʻi kinautolu ʻi ha founga tatau pē mo e kau ʻAposetolo ʻe Toko Hongofulu Mā Uá, pea fekau atu kinautolu “ʻi he ʻao ʻo hono fofongá,” mo fakamatalaʻi ange ko kinautolu ʻoku fanongo ki honau leʻó te nau fanongo ki Hono leʻó (vakai, Mātiu 10:1, 16–17; Luke 10).