Kae ʻOua Ke Tau Toe Feʻiloaki
Kātaki Foki Mai!
Mei he “A Priceless Heritage,” Ensign, Nov. 1992, 85–86.
ʻOku mau talitali lelei kimoutolu. ʻOku mau fie maʻu hoʻomou tokoní.
Kiate kimoutolu kuo loto mamahi pe mole e tokangá [ʻi he Siasí], pe kuo mou tafoki ʻi ha faʻahinga ʻuhinga pē, ʻoku mau fakaafeʻi kimoutolu ke mou kau mai ke tau feohi fakataha. ʻOku fāifeinga loto fakatōkilalo ‘a e kaingalotu tui faivelengá, mo ʻenau ngaahi angahalá mo e ngaahi fehalākí, ke fai e ngāue toputapu ʻa e ʻOtuá ʻi he funga ʻo e māmaní. ʻOku mau fie maʻu hoʻomou tokoní ʻi heʻetau fefaʻuhi mo e ngaahi mālohi ʻo e fakapoʻulí ʻa ia ʻoku mafola ʻi he māmaní he ʻaho ní. ʻI hoʻomou kau mai ki he ngāué ni, te mou lava kotoa ʻo fakafiemālieʻi e holi taupotu taha ʻa homou laumālié. Te mou lava ʻo ʻilo ʻa e fiemālie ʻe lava ke maʻu ʻi he fekumi ki he ngaahi meʻa toputapu mo māʻoniʻoni ʻa e ʻOtuá. ʻE lava ke ke fiefia ʻi he ngaahi tāpuaki mo e ngaahi fuakava ʻoku fakahoko ʻi he ngaahi temipale māʻoniʻoní. ʻE lava ke ʻuhingamālie kiate koe mo ʻi ai ha taumuʻa ʻi hoʻo moʻuí, neongo e māmani taʻefakaʻatuʻi ʻoku tau moʻui aí. Te ke lava ʻo maʻu ha mālohi fakaʻulungaanga koeʻuhi ke ke lava ʻo ngāue ʻiate koe pē kae ʻikai fakakounaʻi. (Vakai 2 Nīfai 2:26.)
ʻI he ngaahi taʻu siʻi kuo hilí, naʻe ʻomi ai ʻe he Kau Palesitenisī ʻUluaki ʻo e Siasí ʻa e fakaafe ko [ʻení]:
“ʻOku mau ʻiloʻi ʻoku ʻi ai ha niʻihi ʻoku māmālohi, mo e niʻihi kehe kuo nau fakaangaʻi pea fekumi ke maʻu ha fehalaaki, pea mo kinautolu kuo fakamavahe pe tuʻusi mei he Siasí koeʻuhi ko ha ngaahi maumaufono mamafa.
“Ki he niʻihi kotoa ko ʻení, ʻoku mau kakapa atu ʻi he ʻofa. ʻOku mau loto ke fakamolemoleʻi ʻi he laumālie ʻo Ia naʻe folofola: ‘Ko au, ko e ʻEikí, te u fakamolemoleʻi ʻa ia ʻoku ou loto ke fakamolemoleʻí, ka ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē (TF 64:10).’
“ʻOku mau poupouʻi atu e kāingalotu ʻo e Siasí ke fakamolemoleʻi ʻa kinautolu ʻoku fai hala kiate kinautolú. “Kiate kinautolu ʻoku ʻikai ke nau toe mālohí pea mo kinautolu kuo nau fakaangá, ʻoku mau pehē, ‘Foki mai. Foki mai ʻo keinanga ʻi he tēpile ʻa e ʻEikí, pea mo toe ʻahiʻahiʻi ʻa e ngaahi fua huʻamelie mo fakafiemālie ʻo e feohi mo e kāingalotú.’
“ʻOku mau tui kuo fakaʻamu ha tokolahi ke foki mai, ka ʻoku nau ongoʻi mā ke fai ia. “ʻOku mau fakapapauʻi atu ʻe talitali lelei kimoutolu ʻe ha ngaahi nima ʻofa mo e ngaahi nima ke tokoni atu” (Church News, Dec. 22 1985, 3).
… ʻOku ou toe fakaongo fakamātoato atu mo e loto fakatōkilalo moʻoni ʻa e kole ko iá. Pea ʻoku mau talitali lelei kimoutolu.