BYU–Pathway Fakaemāmani Lahi
ʻOku ngaʻunu mālohi ʻa e ʻEikí ʻi hono Siasí he kuongá ni, ke fakalahi ʻa e akó pea ke aʻutaki atu ia ki he lahi taha ʻe lavá kiate kimoutolu. Mahalo ko e sīpinga lelei taha ʻo hono fakalahi ʻe he Siasí ʻa e faingamālie ako ko ʻení, ko e fanongonongo ko ia ʻi he 2017 ʻo ha fokotuʻutuʻu foʻou ʻi loto ʻi he Potungāue Ako ʻa e Siasí (CES) ʻoku ʻiloa ko e BYU-Pathway Worldwide. Naʻe tupu e fokotuʻutuʻu foʻoú ni mei he Polokalama Pathway.
Pathway
ʻI he 2009, naʻe fakamafaiʻi ai ʻe he Poate ʻo e Ako ʻa e Siasí, ʻa e ʻUnivēsiti Pilikihami ʻIongi-ʻAitahoó, ke nau faʻu ha polokalama fakaʻakatēmika foʻou ʻo ui ko e Pathway, ko e fakataumuʻa ke fakaʻatā ai ha ngaahi faingamālie ki he ako māʻolunga angé, ki ha kāingalotu tokolahi ange ʻo e Siasí. Ko e Pathway, ko ha polokalama semesitā ʻe tolu ia ʻoku teuteuʻi ai e kau akó ki ha ako māʻolunga angé, ʻaki ʻenau fai ha ngaahi kalasi he ʻinitanetí pea nau fakataha hake ki ha ʻapiako pe ʻapisiasi he uike takitaha ke maʻu ha ako fakalotu mo kau atu ki he ngaahi lēsoni ʻe tataki ʻe he kau akó, mei he nāunau ʻi he ngaahi kalasi he ʻinitanetí. ʻOku tataki ʻa e polokalama Pathway ʻe he kau taki lakanga fakataulaʻeiki fakalotofonuá pea tokangaʻi leva ia ʻe ha kau faifekau tokoni ʻa e Siasí, ʻoku nau tokoni mo poupouʻi e kau akó. Ko e taumuʻa ʻe tolu ʻo e Pathway ke (1) fakatōkakano ʻa e ongoongoleleí ʻi he loto ʻo e kau akó, (2) tokoni ke lavameʻa e kau akó pea (3) teuteuʻi ʻa e kau akó ke nau taki mo tokoniʻi ʻa e ngaahi fāmilí.
ʻOku ngāue ʻaki e Pathway he taimí ni ʻi ha ngaahi feituʻu fakaemāmani lahi ʻe 500 nai, pea kuo laka haka he kau ako ʻe toko 57,000 kuo tokoniʻí, ʻo fakaava ai ha ngaahi faingamālie, fakatupulaki e ʻamanaki leleí mo e mo e tui ki he Fakamoʻuí, pea fakaloloto ange e ako ʻa ha lauafe ʻo kimoutolu. Kuo hanga ʻe hono fakakakato ʻo e polokalama Pathway, ʻo fakafaingofuaʻi e malava ʻa ha kau ako tokolahi ʻo lesisita ʻi ha ngaahi ako māʻolunga angé, kau ai e ngaahi polokalama ako tohi fakamoʻoni pe maʻu mataʻitohi ʻoku fai he ʻinitanetí ʻo fakafou ʻi BYU-ʻAitahō pe ʻi he ngaahi ʻapiako fakalotofonuá.
BYU–Pathway Fakaemāmani Lahi
ʻOku tupu mei he tupulaki mo e fakalakalaka ʻo e polokalama Pathway, ʻa hono fai ʻo e fokotuʻutuʻu foʻoú, ke fengāueʻaki mo e ngaahi akoʻanga kotoa ʻa e Siasí (CES), pea ʻoku ui ia ko e BYU–Pathway Worldwide (BYU–PW). ʻOku tokangaʻi ʻe he BYU-PW ʻa e Pathway, mo fakafekauʻaki e ngaahi polokalama tohi fakamoʻoni ako mo e mataʻitohi māʻolunga ange he ʻinitanetí ʻa e CES. ʻOku tokoniʻi ʻe he kautahá ni ʻa e kau akó, ʻo fakafou ʻi he ngaahi kalasi ʻi he ʻinitanetí mo fakahoko ha ngaahi fakataha fakaemāmani lahi ʻi he ngaahi feituʻu Pathway, kau ai hono fai ʻo ha ngaahi fealēleaʻaki mo ha ngaahi kalasi ako mo e ako ngāue fakalotofonua.
Ko e BYU-PW ko ha fānau tama ia ʻa ha tuʻutuʻuni naʻe fakangofua ʻe he Poate ʻo e Ako ʻa e Siasí ʻi Nōvema 2015: “ʻE feinga e Potungāue Ako ʻa e Siasí (CES) ke maʻu ʻe he kāingalotu ʻo e Siasí ha ngaahi faingamālie fakaako ʻi ha feituʻu pē ʻoku fokotuʻu ai e Siasí.”
ʻE lava ke tokoniʻi koe ʻe he BYU–Pathway Worldwide ke ke lava ʻo hū ki he polokalama ʻe maʻu ai haʻo tohi fakamoʻoni ako mo e mataʻitohi ʻi he ʻinitanetí, ʻa ia te ne fakaava ha ngaahi faingamālie fakaengāue ʻoku lelei angé. ʻOku fakatahaʻi ia mo ha ako fakalotu ʻi he ʻinisititiutí pea mo e ako ʻi he Laumālié ki he founga ʻa e ʻEikí, pea te ke lava ai ʻo ako lahi ange ʻi ha feituʻu pē ʻokú ke ako ai. Makehe mei he maʻu ʻo ha faleʻi fakaakó, te ke maʻu foki ai mo ha faleʻi pea mo ha tokoni mei he kau ngāue ʻa e CES mo e Tafaʻaki Moʻui Fakafalala pē Kiate Kitá, ke tokoni atu ke maʻu ha ngaahi akoako ngāue mo ha ngāue pe kau atu ki ha ngaahi faingamālie ako fakalotofonua.
Te ke lava ʻo hū ki he ngaahi polokalama BYU–Pathway Worldwide, kau ai ʻa e Pathway, fakahinohino ʻi he lea faka-Pilitāniá, ngaahi tohi fakamoʻoni akó, mo e mataʻitohi fakaakó, ʻo fakafou ʻi hoʻo kau taki mo e ngaahi ʻiuniti fakalotofonua ʻo e Siasí. ʻOku maʻu ʻa e ngaahi polokalamá ni ʻi ha ngaahi ʻēlia lahi he taimí ni, pea ʻi he laka atu kimuʻa ʻa e Siasí ʻi he fakahinohino ʻa e ʻEikí, ʻe hokohoko atu ai hono tānaki mai ʻe he BYU-PW ha ngaahi feituʻu mo ha ngaahi polokalama foʻou ʻi ha founga pau kuo palaniʻi.