Kau Tuʻukimuʻa ʻi he Lotu Fakafāmilí
Ngaahi tokoni ʻe hongofulu mei he toʻu tupú ke tokoni ki ho fāmilí ke aʻusia ha ngaahi tuʻunga fakalaumālie lelei ange ʻi hoʻomou lotu fakafāmilí.
Naʻá ke ʻilo nai ko ha fekau e lotu fakafāmilí? Naʻe fekau ʻe Sīsū Kalaisi ʻa e kakai Nīfaí ke nau “lotu ʻi homou ngaahi fāmilí ki he Tamaí” (3 Nīfai 18:21). Talu mei ai, kuo toe fakaongo mai e akonaki ko ʻení ʻe he kau palōfitá mo e kau ʻaposetoló. Hangē ko ʻení, naʻe akoʻi ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku totonu ke hoko ia ko e “[meʻa mahuʻinga taha] ʻi hoʻomou moʻui fakaʻahó.”1
ʻOku mahuʻinga ‘a e lotu fakafāmilí! Ko e kī foki ia ke vāofi ange ai mo e niʻihi kehé pea mo e Tamai Hēvaní. Pea ʻoku ʻikai ke fakakaukauʻi pē ia ʻe he fineʻeikí mo e tangataʻeikí. ʻE lava ke ke maʻu ha ivi tākiekina lahi ki ho fāmilí! ʻE lava ke ke hoko ko ha taha tuʻukimuʻa ʻi he lotu fakafāmilí.
Hoko ko ha Tuʻukimuʻa
Ko e hā ʻa e tuʻukimuʻa ʻi he lotu fakafāmilí? ʻI hoʻo fakakaukau ki he niʻihi tuʻukimuʻá, mahalo te ke fakakaukau ki he kakai ʻa ia ko e lelei taha ʻi ha faʻahinga meʻa. Ko ha faʻahinga ia ʻe taha ʻo e tuʻukimuʻá: ko ha tokotaha ikuna pale ʻuluaki pe ʻuluaki ʻi ha faʻahinga feʻauhi. Ko ha faʻahinga ʻe taha ʻo e tuʻukimuʻá ʻokú ne tauʻi ke maʻu ha meʻa, ko ha taukapo pe tokotaha maluʻi. Ko ia ko ha tuʻukimuʻa ʻi he lotu fakafāmilí ko ha taha ia ʻokú ne taukaveʻi, poupouʻi pea taukapoʻi e lotu fakafāmilí.
Ke pehē te ke lava ʻo fai ia?
Ko ha ngaahi tokoni ʻeni ki he founga ke ke hoko ai ko ha tuʻukimuʻa ʻi he lotu fakafāmilí:
-
Feinga ke ʻoua te ke toutou lea ʻaki ha ngaahi meʻa tatau ʻi he taimi ʻokú ke lotu aí. Sineli S. taʻu 14, ʻAitahō, USA
-
Hiki ha lisi ʻo e ngaahi meʻa ʻoku fie maʻu ke mou lotua fakafāmilí. Samanitā B., taʻu 17, ʻAlapama, USA
-
ʻOku feinga maʻu pē hoku fāmilí ke fakahaaʻi ʻemau houngaʻiá ʻo lahi ange ʻi he ngaahi meʻa ʻoku mau kolé. ʻOku mau feinga maʻu pē ke maʻu ha laumālie houngaʻia ki he Tamai Hēvaní, ko ia ʻoku ou feinga ke tokoni ki hoku ngaahi tokouá ʻi he meʻa ko iá. Kaala S., taʻu 17, Tihuana, Mekisikou
-
Fakamanatu ki he tokotaha kotoa pē. Kapau ʻoku ʻikai fuʻu lelei ho fāmilí ʻi he lotu fakatahá, ko ha kamataʻanga lelei ia ke fakahoko hoʻomou ngaahi lotu fakatāutahá. Kamila G., taʻu 18, ʻAlapama, USA
-
ʻĀ pongipongia ange ke fakapapauʻi ʻoku fakahoko e lotu fakafāmilí kimuʻa peá ke toki mavahé. ʻE lava ke ke fokotuʻu ha uasi tatangi ke talaatu ʻa e taimi ki he lotu fakafāmilí. Tesi Z., taʻu 16, Tekisisi, USA
-
Fakafanongo ki he ngaahi lea ʻoku lea ʻaki ʻe he tokotaha lotú, pea toutou fakakaukau ki ai. Hili iá, vakai pe ko e hā te ke lava ʻo manatuʻi mei heʻenau lotú. ʻI hoʻo lea “ʻĒmení” ʻoku ʻuhinga ia “ko ia ke hoko ʻo pehē”, pe ʻokú ke loto fiemālie ki ai. ʻOku ou fie maʻu moʻoni ke u ʻiloʻi pea mahino kiate au e meʻa oku ou loto fiemālie ki aí. Kelesi M., taʻu 14, Kalefōnia, USA
-
Maʻu ha tōʻonga fakakaukau lelei fekauʻaki mo e lotu fakafāmilí. ʻOua te ke fakakaukau ko ha meʻa pē ia ke fakahoko peá ke toki ʻalu ʻo mohé. Manatuʻi ʻe lava ke tokoni e lotu fakafāmilí ke fakatahatahaʻi ho fāmilí ke nau toe vāofi ange. Leinoa H., taʻu 17, ʻAlapama, USA
-
Feinga ke tokoniʻi ho ngaahi tokouá kotoa. Naʻa mo hoʻo maʻu pē ha tōʻonga fakakaukau leleí mo hoko ko ha faʻifaʻitakiʻanga leleí, ko ha meʻa lahi ia. Uili W., taʻu 14, Kalefōnia, USA
-
Fakakaukau ki he meʻa ‘okú ke fie lotuá kimuʻa pea toki fai e lotú. Lilika A., taʻu 16, ʻĀkenisā, USA
-
Manatuʻi he ʻikai ha meʻa ʻe toe mahuʻinga ange ai. Ko e feohi mo ho fāmilí pea mo hono fakapapauʻi ʻoku mou maʻu ha taimi lelei ke lau e folofolá mo lotú ʻoku matuʻaki mahuʻinga ia. ʻAisake S., taʻu 9, Kalefōnia, USA