Pōpoaki ʻa e Faiako ʻAʻahí
Ko ha Moʻui Kuo Fakatapui
Ako ʻi he faʻa lotu ʻa e fakamatala ko ʻení, pea fekumi ki ha ueʻi fakalaumālie ke ʻiloʻi ʻa e meʻa ke ke vahevahé. ʻE teuteuʻi fēfē ʻe he mahino ʻo e taumuʻa ʻo e Fineʻofá, ʻa e ngaahi ʻofefine ʻo e ʻOtuá ki he ngaahi tāpuaki ʻo e moʻui taʻengatá?
Naʻe pehē ʻe ʻEletā D. Toti Kulisitofasoni, ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e fakatapuí ko hono fakamavaheʻi pe tekaki ha meʻa ke toputapu, ʻo tuku taha ki he ngaahi taumuʻa māʻoniʻoní.” “Ko e lavameʻa moʻoni ʻi he moʻui ní ʻoku maʻu ia ʻi hono fakatapui ʻetau moʻuí—ʻa ia ko hotau taimí mo ʻetau ngaahi filí—ki he ngaahi taumuʻa ʻa e ʻOtuá.”1
Naʻe pehē ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku tau faʻa lau pē ko e fakatapuí ko ha tukuange ia ʻetau koloa fakaemāmaní ʻi he taimi ʻoku tuʻutuʻuni fakalangi mai aí. Ka ko e tumutumu ʻo e fakatapui moʻoní ko hono fakamoʻulaloaʻi kita ki he ʻOtuá.”2
ʻI heʻetau fakatapui kitautolu ki he taumuʻa ʻa e ʻOtuá, ʻe tupulaki ʻa ʻetau tui kia Sīsū Kalaisi pea mo ʻEne Fakaleleí. ʻI heʻetau moʻui ʻaki ha moʻui kuo fakatapuí, ʻe lava ke fakamāʻoniʻoniʻi kitauolu ʻe he ngaahi ngāue ko iá.
Naʻe pehē ʻe Kalo M. Sitiveni, ko e Tokoni ʻUluaki mālōlō ʻi he Kau Palesitenisī Lahi ʻo e Fineʻofá: “Naʻe akonaki ʻa ʻEletā Lōpeti D. Heili ʻo pehē, ʻʻI heʻetau fakahoko mo tauhi e ngaahi fuakavá, ʻoku tau mavahe ai mei he māmaní ʻo hū atu ki he puleʻanga ʻo e ʻOtuá.’”
“ʻOku tau liliu. ʻOku tau hā mo fai ha tōʻonga ʻoku kehe. ʻOku kehe ʻa e ngaahi meʻa ʻoku tau fanongo, lau mo lea ʻakí, pea ʻoku kehe ʻa e vala ʻoku tau tuí he ʻoku tau hoko ko ha ngaahi ʻofefine ʻo e ʻOtuá, ʻo tau haʻisia kiate Ia ʻi he fuakava.”3
Ko e fakatapuí ko e fuakava ia ʻa e ʻOtuá ʻokú ne fai “mo e fale ʻo ʻIsilelí; ʻo ka hili ange ʻa e ngaahi ʻaho ko iá, ʻoku pehē ʻe Sihova, Te u ʻai ʻeku fonó ki honau lotó, pea te u tohi ia ʻi honau laumālié; pea te u hoko ko honau ʻOtua, pea ʻe hoko ʻa kinautolu ko hoku kakai” (Selemaia 31:33). Ko e moʻui kuo fakatapuí ʻoku fenāpasi ia mo e palani ʻa e ʻOtuá maʻatautolú.
Ngaahi Potufolofola Kehé
Tuí Fāmilí Fakafiemālié