Ko e Mana ʻa Sisitā Selatoní
Ko Sisitā Selatoni ʻa e palesiteni Palaimeli lelei tahá! ʻOkú ne longomoʻui mo fakaoli. ʻI he taimi ʻokú ne tuʻu ai ke fakahoko e taimi feʻinasiʻakí, ʻoku mau pehē kotoa, “Ko e taimi feʻinasiʻaki eni ʻa Selatoní” pea taʻataʻalo homau nimá mo malimali. ʻOkú ne fiefia ai!
Kimuʻa ʻi he 2015 naʻe ʻilo ai ʻe Sisitā Selatoni ʻokú ne toe maʻu e kanisaá, ko hono tuʻo nimá ia! Naʻá ne fakamatala mai kiate kimautolu kotoa ʻa e ʻuhinga ʻo e kanisaá mo e meʻa ʻokú ne fakahokó. Naʻá ne talamai mahalo naʻa faʻa liʻaki lotu he taimi ʻe niʻihi pea mahalo ʻe iku ngangana hono laʻi ʻulú. Naʻá ne kole mai ke mau ʻaukai mo lotu ke tokoni ke mole atu e kanisaá.
Lolotonga e taimi ko ʻení, naʻe kei fakahoko ʻe heʻemau Palaimelí ʻa e tukupā ʻo e nima tokoní, ʻa ia naʻa mau kosi ha ngaahi laʻi pepa louhiʻi nima pea mau tohi ai ha ngāue tokoni naʻa mau fakahoko. Naʻe ʻi ai ha fakakaukau ʻa Sisitā ʻAsepi, ke mau ngaohi ha monomono nima tokoni maʻa Sisitā Selatoni. Naʻa mau loto kotoa ke ne ʻiloʻi ʻoku mau ʻofa ʻiate ia, pea naʻe kau kotoa e Palaimelí ki hono tā homau ngaahi laʻi nimá mo e hātí, pea naʻe fakaʻaongaʻi ʻe he tamaiki fefiné ʻa e ʻaho ʻekitivitií ke tuitui ha monomono. Naʻa mau tuitui, haiane, pea tuku homau lotó mo ʻemau ʻofá kotoa ki ai. Naʻe ʻi ai hamau niʻihi naʻe takai ʻaki ha ngaahi afo homau nimá ke manatuʻi ‘a Sisitā Selatoni.
Naʻa mau foaki e monomonó kia Sisitā Selatoni. Naʻá ne ʻalu mo ia ʻi heʻene ngaahi taimi faitoʻó pea ongoʻi ʻemau ʻofá.
Ko e meʻa lelei tahá ʻa e taimi naʻe fai ai ʻe Sisitā Selatoni ʻene fakamoʻoni ki he Palaimelí kotoa. Naʻá ne talamai ʻoku mau makehe kiate ia pea naʻá ne ʻofa ʻiate kimautolu. Naʻá ne ʻiloʻi naʻa mau hoko ko ha konga lahi ʻo e ʻuhinga naʻá ne lavaʻi ai ʻene ngaahi faitoʻó. Neongo naʻá ku manavasiʻi naʻa ʻikai ke ne lavaʻi ia, ka naʻá ku ʻiloʻi pē te ne lava ia. ʻI he ʻahó ni ʻoku ʻikai ke toe maʻu ʻa Sisitā Selatoni ʻe he kanisaá!