Ngaahi Talanoa ʻo Sīsuú
Naʻe Faʻa Fakamolemole ʻa Sīsū
Mei he Mātiu 18:21–22; Luke 7:37–48; Luke 11:1–4; Luke 23:34
ʻI ha ʻaho ʻe taha naʻe lotu ‘a Sīsū. Naʻe fehuʻi ʻe ha taha ʻo e kau ākongá kia Sīsū, “ʻEiki, akonakiʻi ʻa kimautolu ke lotu.”
Naʻe folofola ange ʻa Sīsū ki Heʻene kau ākongá ke lotu mo kole ki he Tamai Hēvaní ke fakamolemoleʻi ʻenau ngaahi angahalá. Naʻá ne pehē ʻe fakamolemoleʻi kinautolu ‘e he Tamai Hēvaní kapau te nau fakamolemoleʻi e niʻihi kehé.
Naʻe fai ange ʻe Pita ha fehuʻi kia Sīsū pe ʻoku totonu ke tuʻo fiha ʻene fakamolemoleʻi ha taha naʻá ne fai ha meʻa ʻoku hala. “Tuʻo fitu?” Naʻe mateʻi ange ʻe Pita.
Naʻe folofola ange ʻa Sīsū, “Tuʻo fitungofulu liunga fitu.”
Naʻe akoʻi ʻe Sīsū ʻEne kau ākongá kuo pau ke tau faʻa fakamolemole maʻu pē.
Naʻe fakamolemoleʻi ʻe Sīsū ʻa e kakai naʻa nau ongoʻi fakatomala koeʻuhi ko ʻenau ngaahi angahalá. ʻI he taimi naʻá Ne fakamolemoleʻi ai ha fefine ʻe taha, naʻá ne houngaʻia moʻoni ko ia naʻá ne fufulu ai Hono vaʻé ʻaki hono loʻimatá.
Naʻe fakamolemoleʻi foki ʻe Sīsū ʻa e kakai naʻe ʻikai ke nau ʻilo naʻa nau fai ha meʻa ʻoku halá. Naʻá ne kole ki he Tamai Hēvaní ke fakamolemoleʻi ʻa e kakai naʻa nau tutuki Iá koeʻuhí naʻe ʻikai ke nau ʻilo naʻa nau fakamamahiʻi ʻa e ʻAlo ʻo e ʻOtuá.
ʻOku fakamolemoleʻi ʻe Sīsū e kakaí koeʻuhí ʻokú Ne ʻofa ʻiate kinautolu. Te u lava ʻo feinga ke hangē ko Sīsuú ʻaki ʻeku fakamolemoleʻi foki mo e niʻihi kehé!