Meʻa Mahuʻinga Fakatokāteline
ʻOua Naʻá ke Halaia ʻi he Fakatangá
Ko e Samēlia Leleí, tā ʻe Walter Rane
“Ne u vakai kimui ange ʻi he ngaahi fonua kehekehe he funga ʻo e māmaní, ki he kovi ʻo e filifilimānakó mo e laulanú ʻa ia naʻe fepaki mo kinautolu naʻe siofi koeʻuhí ko honau matakalí pe tupuʻangá.
“ʻOku hoko e fakatangá ʻi ha ngaahi founga lahi: fakaangá, fakamamahí, houtamakí, pe tāufehiʻa ki ha taha kehé. Kuo pau ke tau fakafepakiʻi ʻa e kovi ʻo e fakapalatahá ʻa ia ʻoku hoko kiate kinautolu ʻoku kehe ʻenau fakakaukaú. ʻOku hā ha konga ʻo e fakapalatahá ʻi he taʻeloto-fiemālie ke foaki e tauʻatāina tatau ʻo e leá. ʻOku maʻu ʻe he tokotaha kotoa pē, kau ai e kakai fakalotú, ʻa e totonu ke fakahaaʻi ʻene fakakaukaú ki he kakaí. Ka ʻoku ʻikai ha totonu ʻa ha taha ke tāufehiʻa ki he niʻihi kehé ʻi hono fakahaaʻi e ngaahi fakakaukau ko iá.
“… Naʻe akonaki e Fakamoʻuí ʻo pehē, ʻKo e meʻa kotoa pē ʻoku mou loto ke fai ʻe he kakaí kiate kimoutolú, ke mou fai ia kiate kinautolu” [Mātiu 7:12]. Kuo pau ke tau anga fakaʻapaʻapa kapau ʻoku tau fie maʻu ke fakaʻapaʻapaʻi kitautolu. ʻIkai ngata aí, ʻoku ʻomi ʻe heʻetau ului moʻoní ʻa e ʻangamaluú mo e loto-fakatōkilaló,’ ʻa ia ʻokú ne fakaafeʻi mai ʻʻa e Laumālie Māʻoniʻoní [pea fakafonu kitautolu ʻaki e] ʻofa haohaoá’ [Molonai 8:26], ko ha ʻʻofa ‘[taʻemālualoi]’ [1 Pita 1:22] ki he niʻihi kehé.”