Ko e Tokoni ki he Ngaahi Kaungāmeʻa Foʻoú

Naʻe ʻaʻahi ʻa ʻEletā Nila L. ʻEnitaseni mo hono uaifi ko Kefí, ki he Lepapulika Fakatemokalati ʻo Kongokou ʻi ʻAfiliká. Naʻe fai haʻanau fakataha ʻa e Siasí ʻi tuʻa ʻi he ngaahi tēnití. Naʻe takatakai ʻi he tēnití ha fuʻu ʻā lahi. Naʻe vakai atu ʻa ʻEletā ʻEnitaseni ki ha fānau ʻoku nau siofi mai kinaua mei he tafaʻaki ʻe taha ʻo e ʻaá. Naʻe fehuʻi ange ʻe Sisitā ʻEnitaseni, “ʻOkú ke pehē te ke lava ʻo fakaafeʻi ʻa e fānaú ke nau hū mai?” Naʻe lue atu ʻEletā ʻEnitaseni ki he tangata ʻi he maiká. Naʻá ne kole ki he tangatá ke ne fakaafeʻi ʻa e fānaú ke nau hū mai ʻo kau fakataha mo kinautolu.

Naʻe lele mai ʻa e fānaú! Naʻa nau malimali mo fiefia kotoa heʻenau kau atu ki he fakatahá.

Na‘e fai foki ʻe ʻEletā ʻEnitaseni ha talanoa ʻo ha kiʻi tamasiʻi ko hono hingoá ko Sōsiua, ʻa ia naʻá ne tokoni ki ha kii tamasiʻi ʻe taha ʻi he lotú.

ʻI he fuofua ʻalu ʻa Siosefa, ko ha kiʻi tamasiʻi mei ʻIukanitā, ki he lotú, naʻe ʻikai hano fāmili ai ke tokoni kiate ia ke ne ʻilo e feituʻu ke ʻalu ki aí. Naʻe fakafeʻiloaki ange leva ia ʻe he ongo faifekaú kia Sōsiua.

Na‘e talaange ʻe Sōsiua kia Siosefa te ne hoko ko hono kaungāmeʻa. Naʻá ne ʻoange kia Siosefa ha tohi hiva ʻa e Palaimelí, pea naʻá ne tangutu pē ʻi hono tafaʻakí. Hili iá naʻe hiva ʻe he kalasi Palaimelí ʻa e “Fānau Au ʻa e ʻOtuá” kia Siosefa. Naʻe ʻai ʻe he tokotaha kotoa ʻa Siosefa ke ne ongoʻi matuʻaki makehe, kae tautautefito ki hono kaungāmeʻa foʻou ko Sōsiuá. ʻI heʻena matuʻotuʻa angé, naʻe hoko ʻa Sōsiua mo Siosefa ko ha ongo hoa ngāue fakafaifekau!

Naʻe fakamanatu ʻe he ngaahi aʻusia ko ʻení kia ʻEletā ʻEnitaseni ʻoku fie maʻu ke tau tokoni kotoa pē ki he kakai ʻoku tau feohi mo iá ʻa ē ʻoku nau ongoʻi tuenoa pe liʻekiná.