Avea ma ni Soo Moni

Saunia e Peresitene Henry B. Eyring

Fesoasoani Muamua i le Au Peresitene Sili

I sauniga faamanatuga uma, tatou te maua ai le avanoa e tautino atu ai i le Tama Faalelagi o le a tatou manatua pea le Faaola ma tausi Ana poloaiga ina ia tatou maua Lona Agaga e faatasi ma i tatou (tagai Moronae 4:3; 5:2; MF&F 20:77, 79). O le manatuaina o Ia o le a oo mai i taimi uma ia i tatou e pei ona masani ai a o tatou tauave i o tatou luga Lona suafa. E tele auala tatou te faia ai ae maise lava pe a tatou auauna atu i isi i Lona suafa, faitau i Ana fetalaiga paia, ma tatalo ia iloa mea ua Ia finagalo tatou te faia.

Sa tupu ia te au ao ou faatinoina le papatisoga o se alii talavou. Sa ou iloa na valaauina au e auauna faauuina a le Faaola e avea o se faifeautalai e aoao atu Lana talalelei ma molimau atu e uiga ia te Ia ma Lana Ekalesia moni. Sa ma folafola atu ma lau soa faifeautalai i le alii talavou, o le a faamamaina o ia e ala i le mana o le Togiola a Iesu Keriso pe a salamo o ia ma faatuatua i le Faaola ma sa papatisoina e se tasi o Ana auauna faamaoniaina.

Ao ou aveina ae le alii talavou mai le vai o le faatanoa o le vai papatisoga, sa musumusu mai o ia i lo’u taliga, “Ua ou mama, ua ou mama.” I lena taimi, sa ou manatua ai le papatisoga o le Faaola e Ioane le Papatiso i le Vaitafe o Ioritana. E le gata i lena, sa ou manatua ai sa ou faia le galuega laveai a se Faaola toetu ma soifua—lea sa auai ai le Agaga Paia, e pei ona sa i ai Ioane.

Mo au ma mo i tatou taitoatasi, o le manatuaina o le Faaola e mafai ona sili atu nai lo o le faalagolago i se manatuaga o lo tatou malamalama ma aafiaga faatasi ma Ia. E mafai ona tatou faia i aso uma filifiliga tatou te latalata atili atu ai i le taimi nei ia te Ia.

Atonu o le filifiliga aupito faigofie lava o le faitau o tusitusiga paia. O le faia o lena mea, e mafai ona tatou maua ai lagona o le latalata atu ia te Ia. Mo au lava, o le latalata atu e masani lava ona oo mai pe a ou faitau i le Tusi a Mamona. I uluai minute ou te faitau ai i mataupu o le 2 Nifae, ou te faalogoina ai i lo’u mafaufau ia leo o Nifae ma Liae o faamatalaina le Faaola e pei sa la masani lelei ia te Ia. E oo mai se lgona o le vavalalata.

Mo outou, atonu o isi nofoaga i tusitusiga paia e faapitoa ona outou latalata atu ai ia te Ia. Ae po o fea lava ma po o le a foi le taimi e te faitau ai i le afioga a le Atua, faatasi ai ma le lotomaualalo ma le manatu tonu i ai e manatua ai le Faaola, o le a faapea ona faateleina ai lou naunau e tauave Lona suafa i ou luga i lou olaga i aso taitasi.

O lena naunau o le a suia ai le ala e te auauna ai i le Ekalesia a le Alii. O le a e tatalo i le Tama Faalelagi mo le fesoasoani i le faalauteleina [o se valaauga] e tusa lava pe foliga atu ia te oe o se valaauga faatauvaa. O le fesoasoani o le a e talosagaina o le gafatia lea e faagalo ai oe lava ae taulai atili atu i le mea e finagalo ai le Faaola mo i latou ua valaauina oe e te auauna i ai.

Na ou lagonaina Lona aao ma Lona latalata mai i lau auaunaga faatasi ma le ma fanau ina ua ou tatalo ia iloa le auala e fesoasoani ai ia i latou ia maua le filemu lea e na o le talalelei na te aumaia. I taimi faapena, sa ou le popole lava i le iloa mai o au o se matua faamanuiaina, ae sa matuai ou popole lava mo le faamanuiaina ma le manuia o lau fanau.

O le naunau e tuuina atu ia i latou tatou te auauna i ai mea o le a tuuina atu e le Faaola ia i latou, e taitai atu ai i tatalo o ni auganiga moni i le Tama Faalelagi, i le suafa o Iesu Keriso. A tatou tatalo i le ala lena—i le suafa o le Faaola, faatasi ai ma le faatuatua ia te Ia—e tali mai le Tama. Na te auina mai le Agaga Paia e taiala, faamafanafana, ma faamalosiau i tatou. Aua o le Agaga e molimau mai e le aunoa i le Faaola (tagai 3 Nifae 11:32, 36; 28:11; Eteru 12:41), e faateleina lo tatou gafatia ona alofa atu i le Alii ma o tatou loto, mafaufau, ma malosi atoa (tagai Mareko 12:30; Luka 10:27; MF&F 59:5).

O faamanuiaga o le manatuaina i aso taitasi ma le taimi nei, o le a tumau le oo malie mai a o tatou auauna atu ia te Ia, taumamafa i Ana afioga, ma tatalo atu ma le faatuatua i Lona suafa. Ma o lenei manatuaga o le a mamanu ai i tatou ia avea ma ni soo moni o le Alii o Iesu Keriso i Lona malo i lenei lalolagi—ma mulimuli ane faatasi ma Lona Tama i le lalolagi mamalu a sau.