O le Auala e Mafai ona Suia ai e se Savali o le Konafesi Lou Olaga

Saunia e Hadley Griggs

E alala le tusitala i Iuta, ISA.

E mafai moni lava ona e avea atili e faapei o Iesu Keriso. O le a fesoasoani meafaigaluega nei e te iloa ai le ala e mafai ai.

O e lagonaina ua fai si maualalo o [lou] faaleagaga? E te ono manaomia sina taitaiga faaleagaga? Ia ua e laki la, aua o le konafesi aoao o le togafiti tonu a lena! Na saunoa mai Elder Robert D. Hales o le Korama a Aposetolo e Toasefululua: “I tagata talavou o le Ekalesia, ou te folafola atu afai o le a outou faalogo [i le konafesi aoao], o le a outou lagonaina le faateleina o le Agaga i totonu o outou. O le a tau atu e le Alii ia te outou mea e finagalo o Ia ia outou faia i o outou olaga.”¹

Ma e le muta ai i le faaiuga o le vaiaso o le konafesi—e mafai foi ona faaauau pea ona e lagona le Agaga e ala i le suesue i tautalaga pe a uma!

E tele auala e fesoasoani ai le konafesi ia i tatou. Atonu o le mea aupito taua, e mafai ai ona tatou latalata atili atu i le Faaola e ala i le aoaoina o i tatou i auala e avea atili ai e pei o Ia. O se auala sili ona lelei e aoao ai ni mea se tele mai le konafesi o le, uai faapitoa atu i aoaoga e uiga i uiga auaumama faaKeriso—po o le taimi o le faasalalauga pe ao e suesue mulimuli ane i tautalaga. A o e faalogo pe faitau ma mafaufau i ni uiga auaumama patino faaKeriso, o le a mafai ona fesoasoani upu ma le Agaga e te iloa ai le ala e avea atili ai e pei o Keriso.

E mafai ona e faia le suega puupuu lenei e vaai ai po o le fea le uiga auaumama po ni [uiga auaumama] se lua e te manao e uai atu i ai ao e suesue i savali o le konafesi. (Mo se suega puupuu e loloto atu, tagai i le New Era Oketopa 2016 po o le mataupu e 6 o le Tala’i La’u Talalelei.)

Mo uiga auaumama faaKeriso taitasi e iva o loo i lalo, filifili le faamatalaga e sili ona faamatala ai oe.

1. Faatuatua:

   1. Ou te le mautinoa pe o Iesu Keriso o lo’u Faaola.

   2. Ou te talitonu ia Iesu Keriso ma talia o Ia o lo’u Faaola.

   3. Ou te faamoemoe o Iesu Keriso o lo’u Faaola.

2. Faamoemoe:

   

   1. Ou te lagona le toafilemu ma le talitonu o le a lelei mea uma o le lumanai.

   2. Ou te matuai fefe lava i le lumanai!

   3. O le mea masani ou te le ano i le lumanai—afai ou te le mafaufau i ai, ou te le popole foi i ai.

3. Alofa Mama ma le Alofa:

   1. Ou te taumafai e alofa i isi tagata, ae e i ai a nisi o tagata e pei ua fai ma faasoesa ia te au.

   2. Ou te pisi tele i le taumafaiga e faaleleia lo’u lava olaga e faigata ai ona ou mafaufau i se isi lava tagata.

   3. Ou te naunau i le soifua manuia e faavavau ma le fiafia o isi tagata.

4. Mama:

   1. “O le mama i mafaufauga ma amioga.” E le foliga manaia lena mea!

   2. Ou te mama ma loto mama.

   3. E faigata ona ou mama ma ia le pona.

5. Malamalama:

   

   1. Ua tele naua au mea e fai e le mafai ai ona ou maua se taimi e sue ai tali o au fesili.

   2. Aue. Suesue? O nisi taimi e pei e ’iva le taumafai e aoao ni mea.

   3. Ou te saili faatauanau ia malamalama i upumoni ma sue tali i au fesili.

6. Onosai:

   1. E mafai ona ou faatali mo ni mea e aunoa ma le oso o le ita po o le le fiafia.

   2. E matea e mafai ona ou faatali mo ni mea, ae e pei e oso ai lou ita.

   3. O le mea e sili ona leaga o le faatali mo ni mea. Ou te manao i mea uma i le taimi nei lava.

7. Lotomaualalo:

   1. Ou te fia mautinoa e mafai ona ou faia e au lava ia mea uma.

   2. Ou te faalagolago i le Alii mo se fesoasoani.

   3. Pe a ou faia se mea, e masani ona galo ia te au e mafai ona ou ole atu i le Tama Faalelagi mo se fesoasoani.

8. Filigā:

   1. Ou te faaaluina uma lou taimi i le matamata televise, eva ma au uo, ma aloese mai tiutetauave!

   2. E masani ona faigata ona ou taulai atu i mea taua i lou olaga, ae ou te taumafai lava.

   3. E faaalu lou taimi ma le malosi i mea e aupito sili ona taua.

9. Usiusitai:

   1. Ou te mulimuli ma le lotomalie i fautuaga a ou taitai ma matua.

   2. O le mea masani, ou te pule lava ia te au—E masani ona faigata ona ou faalogo i se isi lava tagata.

   3. Ou te mulimuli i fautuaga a ou taitai ma matua, ae o nisi taimi ou te faitio i ai.

Ia tagai i au tali. O le fea o uiga auaumama e te manao e galue i ai? Ina ia iloa le auala e atiina ae ai, e mafai ona e filifilia se [uiga auaumama] se tasi pe lua ma uai atu i ai ma le totoa ao e faalogo i le konafesi.

Ma afai na e tali o loo e lelei i le faia o mea uma, ia aveaveai ai pea! E mafai lava pea ona e filifilia se uiga auaumama se tasi pe lua na tumatilatila mai i le taimi o le suega puupuu ma taulai atu i ai i le taimi o au suesuega o le konafesi. Po o fea lava o e i ai i lau malaga o le avea e faapei o Keriso, e mafai lava ona e liliu atu i taimi uma i aoaoga a o tatou taitai, e fesoasoani atu ia te oe i lau faigamalaga.

Afai e le o mafai ona e filifilia se uiga auaumama i le taimi nei, aua le popole! E mafai lava ona e faalogo i le konafesi ma vaai ai po o le a se mea o tumatilatila atu i lena taimi.

O le taimi lava e te filifilia ai se uiga auaumama e te manao e taulai atu i ai, atonu e te manao e tusi i lalo ina ia e saunia e maua faaaliga e uiga i ai a o e faalogo i le konafesi pe ao e suesue mulimuli ane i tautalaga. Ao e faalogo ma suesue, ia faataga le Agaga e taiala oe i nisi o auala fitoitonu e mafai ona e galue ai i le uiga auaumama. Vaai foi laia le faataitaiga lea o loo i lalo!

Faamatalaga

1. Robert D. Hales, “Konafesi Aoao: Faamalosia o le Faatuatua ma le Molimau,” Liahona, Nov. 2013, 6.

Alofa i ni Uo Fou se Toalima

I le aoga e i ai se vaega toalaiti o tamaiti e manatu le toatele o isi tamaiti aoga o le “au le taulia” ona e ese i latou. Sa le masani ona ou talanoa ia i latou. Sa ou le agaleaga, ae sa ou le amiolelei foi.

Ina ua ou faalogo i le lauga a Peresitene Dieter F. Uchtdorf, Fesoasoani Lua i le Au Peresitene Sili, “O Le e Alofa Atu e Alofaina Mai” (konafesi aoao ia Aperila 2012), sa i ai se mea na suia. Sa saunoa o ia, e i ai se mea e tasi e tatau ona tatou faia pe a oo i le faamasino atu: “Tuu loa!” Sa fesoasoani lana lauga ou te iloa ai, nai lo o le faamasino o nei tamaiti i le aoga, e tatau ona ou suia ou mafaufauga ma lagona leaga i se “loto ua tumu i le alofa mo le Atua ma Lana fanau.”

O le Aso Gafua lena ina ua ou alu i le aoga, nai lo o le faatasi ma au uo masani, sa ou alu i le mea sa i ai le vaega lea sa manatu i ai tagata o le “au le taulia.” Sa amata ona matou talanoa ma ou iloa ai, o nei tagata sa leai se mea na ese ai mai se isi lava tagata. A o faaalu lou taimi ma i latou, sa ou atiina ae ai se sootaga malosi ma i latou. Ua ou maua ni uo fou se toalima.

Na ou iloa ai o au uo fou sa le o ni “au le taulia”—na taulia i latou i taimi uma i le Atua. Ua ou fiafia lava ua ou aoao atili e uiga i le alofa o le Atua mo Ana fanau.

Holly H., 19 tausaga, Kalefonia, ISA.

Atinaega o le Alofa Mama i le Vasega Faili

I le konafesi aoao ia Oketopa 2015, sa tumatilatila mai ai ia te au se tasi o tautalaga faapitoa. Na tuuina mai ai e Elder Dale G. Renlund o le Korama a Aposetolo e Toasefululua se tautalaga na faaautuina “E Ala i Fofoga o le Atua.” Sa ia saunoa mai i le taua o le vaaia o isi tagata e ala i fofoga o ni matua agaalofa. Ina ua ou faalogo i lena lauga, sa ou lagonaina na manaomia ona ou faia se taumafaiga atili e alofa atu ia i latou e siomia au.

I se tasi o taeao ina ua uma le konafesi, sa ou mataituina ai lava se taimi lelei e faafiafia ai se tagata. Sa ou alu i lau vasega faili ma vaaia ai se tama sa masani ona ou le ano tele i ai. Sa mafai ona ou iloa sa i ai se mea sa le fiafia ai o ia, o lea na ou alu atu ai ma fesili pe na a mai lona aso. Sa le tautala soo o ia, o lea na ou fesili atu ai pe na fiafia i le vasega faili. Sa fai mai o ia, na te tau le iloa lelei le musika ma sa popole i le konaseti. Sa ou ofo atu ma te toe faataitaia faatasi, ma sa ma taina faatasi le pese. Sa manaia i le faalogo! Ina ua uma lena, sa amata ona ma talanoa e uiga i a ma’ua mea faifaili. Ua sili atu ona ma vavalalata, ma ua ou fiafia lava ona sa ou faaavanoa le taimi e talanoa ai ia te ia.

Christa M., 12 tausaga, Texas, ISA