Seia Tatou Toe Feiloai
Fesoasoani i se Tasi i le Aso
Saunia e Peresitene Thomas S. Monson
Mai le “O Le a se Mea Ua Ou Faia mo Se Tasi i le Aso?” Liahona, Nov. 2009, 84–87.
O i tatou o aao o le Alii. O loo faalagolago mai o Ia ia i tatou.
FAAMATALAGA MAI LE KERISO O LOO FAAMALOLOINA E MAMAI I PETESA, SAUNIA E Carl Heinrich Bloch, FAAALOALOGA A LE FALE MATAAGA O FAATUFUGAGA A LE IUNIVESITE O POLIKA IAGA.
Ou te talitonu o le faamoemoe o tagata taitoatasi o le Ekalesia o le auauna atu lea ma ia fesoasoani ia i latou e puapuagatia. I le papatisoga na tatou osifeagaiga ai e “tauave avega a le tasi, ina ia māmā” [Mosaea 18:8]. Na faafia ona tuia lou loto ina ua e molimauina le tulaga manaomia o se tasi? E faafia ona e faamoemoe ia avea oe ma tagata e fesoasoani atu? Ae faafia ona faalavelavea le olaga i lea aso ma lea aso, ma e tuua ai i isi e fesoasoani atu, ma lou manatu e faapea, “oi e mautinoa lava o le a i ai se tasi e taulimaina lena manaoga.”
Ua faapea ona tatou popole i le pisi tele o o tatou olaga. Ae peitai, na tatau ona tatou tutu ma vaavaai lelei lava i mea o loo tatou faia, ma atonu e iloa ai … ua faatele ona faaalu le tele o o tatou taimi, e fai ai mea e matua le aoga lava i le fuafuaga autu o le olaga, ma ua faatuatuanai ai mea aupito sili ona taua. …
Ua siomia i tatou e i latou e manaomia lo tatou gauai atu, la tatou faamalosiau atu, la tatou lagolago, la tatou faamafanafana, lo tatou agalelei—pe o nisi o le aiga, uo, paaga, po o ni tagata ese. O i tatou o lima o le Alii i luga o le fogaeleele, ua i ai le tiutetauave e auauna atu ai ma siitia Ana fanau. O loo faalagolago mai o Ia ia i tatou taitoatasi. …
Talosia ia tuia o tatou loto i upu o se viiga masani … :
Ua ou faia ea se lelei i le aso?
Ua ou fesoasoani ea?
Ua ou faafiafia ea, i se ua faanoanoa?
A leai, ua le aoga.
Ua ou faamama i se ua mafatia
Ma faamafanafana i ai?
O e ua mama’i, ua ou tausia ea?
Ma faainu ma fafaga i ai?
[“Ua Ou Faia ‘Ea se Lelei?” Viiga, nu. 136].
… Talosia ia tatou fesili ifo ia i tatou lava i le fesili … : “O Le a Se Mea Ua Ou Faia mo se Tasi i le Aso?” O la’u fautuaga i tagata o le ekalesia i le lalolagi atoa o le, ia sue se tasi o loo feagai ma se taimi faigata po o gasegase po o tuua toatasi, ma fai se mea mo ia i le aso.