O le Auala E TE Iloa ai mo Oe Lava

Saunia e Peresitene Henry B. Eyring

Fesoasoani Muamua i le Au Peresitene Sili

Mai se fuafuaga o le Faafesagaiga ia Mati 2017 faatasi ma Peresitene Henry B. Eyring ma Elder Jeffrey R. Holland.

I a matou uo talavou pele, o lo matou manao mo outou taitoatasi, ia outou iloa mo outou lava, tutoatasi mai soo se isi lava, e moni le Atua o le lagi, Na te silafia outou, ma na togiolaina Lona Alo mo agasala a le Lalolagi.

O le matou faamoemoe ia e maua mo oe lava se molimau e le maluelue e faapea, ua toefuatai mai le talalelei a Iesu Keriso i luga o le fogaeleele mo le taimi mulimuli. Sa tulaga ese lava le misiona a Iosefa Samita, peitai o lana tatalo faatauvaa o se faataitaiga aoga lea mo oe ma mo au. Sa agai atu Iosefa i le togavao e tatalo ma le faatuatua o le a tali mai se Atua agaalofa i lana tatalo ma tuumama ai lona le mautonu. Sa ia maua lena faamautinoaga e ala i le faitauina o le afioga a le Atua ma le mauaina o se molimau ua moni ia. Sa tatalo foi Iosefa ma le faamoemoe e le gata ia faalogo ae ia usitai, e tusa lava po o le a le faigata. Sa tuuto o ia e faatino soo se mea o le a tau mai e le Atua ia te ia.

I lena agaga, ou te fia tuu atu ai se luitau i le autalavou a le Ekalesia. O le luitau lenei: ia e iloa mo oe lava ia, ua moni nei mea. E mafai ona e faia lenei mea e ala i le mulimuli i le faataitaiga a Iosefa Samita: suesue i tusitusiga paia, ia oo upu i le taele o lou loto, manatunatu pea lava pea i ai, ona ole atu lea i le Atua, faatasi ma se naunautai e talia Lana taitaiga—ma le faamaoni, ia faia lava Lona finagalo.

E ui e foliga faigofie lenei valaaulia, ae ou te tautino atu e ono alu ai se taumafaiga tele. E le mafai ona ou folafola atu faapea o le a oo mai au tali i se aso se tasi pe i se vaiaso, ae e mafai ona ou folafola atu, o le a fetalai mai le Atua ia te oe i Lana lava ala ma i Lana lava taimi, pe afai e te ole atu i le faatuatua. Pe a e talia ma galue i lenei valaaulia, o le a e iloa ai, e le gata o le a oo mai tali, ae o le a e faavaeina ai se mamanu o le mauaina o le malamalama faaleagaga lea o le a faamanuia ai oe mo aso o totoe o lou olaga.