O Se Tali Musuia i se Faatalanoaga mo se Galuega
Gibrair Padilha Dos Santos
São Paulo, Pasila
Ata mai le Getty Images
Ina ua uma ona tofia au ou te taitaia se komiti a le siteki o le ola faalagolago o le tagata ia te ia lava, sa ou malamalama ai sa le lava foi lou totogi. Faatasi ai ma lenei malamalamaaga, sa tele atu ni mea na ou manao i ai mai lo’u olaga faigaluega.
Sa ou lagonaina se naunau faafouina e sue se galuega e lelei atu, ma talosaga mo le fesoasoani i le tusiga o se talaaga faafaigaluega. Sa ou auina atu la’u talaaga fou faafaigaluega i nisi o pisinisi ma sa lei umi ae valaau mai mo ni faatalanoaga.
I se tasi o [faatalanoaga], sa faailoa mai e le fai faatalanoaga se laina mai la’u talaaga faafaigaluega lea na taua ai la’u galuega o se fesoasoani i le au peresitene o le siteki ma fesili mai, “E mafai ona e tau mai i le lima sekone po o le a le uiga o lenei auaunga faalelotu?”
Sa ou fai atu, sa ou i ai i le autaitai o se faalapotopotoga e nafa ma le taialaina ma le manuia o le silia ma le 2,500 o tagata. Sa oso le fiailoa o le fai faatalanoaga ma faapea mai, “E tasi le minute e te filifili ai pe faapefea ona e tuuina mai se tali e lima sekone i le fesili lenei: e faapefea ona e taialaina na tagata e 2,500?”
Na ou iloa o le taimi sili ona taua lenei i le faatalanoaga. Sa ou tatalo ma ole atu i lo’u Tama Faalelagi mo se fesoasoani ma manatua vave ai lesona na ou aoaoina mai le vaega o le ola-tutoatasi. Sa ou lagonaina le oso mai le mautinoa.
Ina ua uma le minute e tasi, sa fesili mai le fai faatalanoaga, “E faapefea ona e taialaina na tagata e 2,500?”
“Matou te fesoasoani ia i latou e faatutu ni sini,” sa ou tali atu ai.
Sa tulai le fai faatalanoaga, sa [ma] lulu lima, ma fai mai, “Ua e faigaluega.”
E maoae le tago mai o le Atua i loʼu lima ma tali mai i laʼu tatalo. Ou te faafetai i lo’u Faaola mo le musuia o o tatou taitai e fatufatuai le taulamua i le polokalama o le ola faalagolago o le tagata ia te ia lava. Ua faapea ona faamanuiaina patino ai au, ma ua ou vaaia le faagasologa faigofie ma le musuia o le taulamua i le polokalama o le ola faalagolago o le tagata ia te ia lava, ua manuia ai le toatele o isi o le matou siteki. Ua matuai ou talitonu lava i le mafai e mataupu faavae o le ola-tutoatasi ona siitia ai olaga, o lea ina ua avea au ma se taitai i ni tagata faigaluega e toa 15 i lau galuega fou, sa amata ona ou aoaoina i latou i mataupu faavae o le ola-tutoatasi.
Ua ou tuputupu ae ma ua tele atu ou tomai nai lo le mea na ou manatu ou te oo i ai. Ua ou maua nei se totogi e tausi ai au ma lou aiga. O lenei taimua ua fesoasoani tatou te alualu ai i luma i aso taitasi e ala i le fesoasoani ia tatou maua le ola-tutoatasi sili atu.