Pipii Mau
E alala le tusitala i Iuta, ISA.
E faia e uo se eseesega tele i le faigofie—po o le faigata—o lo tatou ola ai i o tatou tulaga faatonuina.
Sa ou ola ae faatasi ma ni uo o e o ni tagata o le Ekalesia, ma sa matuai ou fiafia lava e papatisoina ma avea foi au ma se tagata o le ekalesia. Ina ua ou siitia atu i le isi itu o le atunuu mo le kolisi, sa amata ona fai au lesona e faifeautalai. O le mea sa faanoanoa ai, o faatosinaga mai i la’u tupulaga fou sa faigata ai ona ou mulimuli i tulaga faatonuina o le talalelei. Sa faaalu e tamaiti aoga o le matou au tausaga muamua le tele o taimi i pati e inupia ai. Ou te lei inu muamua lava i se ava malosi, ae sa tauanau soo au e au uo e inu.
Sa ou iloaina e moni le talalelei, ae sa faigata ona tetee atu i faaosoosoga mai i la’u tupulaga.
Sa amata ona ou tatalo i le Tama Faalelagi mo le malosi e fai ai filifiliga sao. Ou te lei tuuina i lalo ou tulaga faatonuina i le taimi lea, ae sa ou fefe ina nei ou le maua le malosi e teena ai le ava malosi i le isi taimi na ofoina mai ai. Sa ou misia au uo o e sa tutusa o matou tulaga faatonuina.
I le po o se tasi o Aso Toonai, sa matou o ai ma tagata o le matou au nofotumau i se pati. Sa vave ona inupia uma au uo ma uunaia au e faataitai la’u tofo muamua i le pia.
Na faaosoosoina au. Sa ou tago atu i le ipu pia sa tuuina mai ia te au. Sa ou tuuina faalatalata mai i lo’u gutu ma le le lagolelei ae sa ou fiafia i le gauai uma mai o au uo ia te au. Ona savali mai lea o Niki, o se tama sa ese le fiafia e inupia, i le matou faalapotopotoga.
“E te lei inuina le mea lena, a ea?” sa ia fesili mai ai.
“Leai, e lei inua,” sa ou tali atu ai.
“Afai e te inua,” sa fai mai ai Niki, “o le a e faanoanoa ai mo aso uma o totoe o lou olaga.”
Sa ou tei. Sa ou iloa sa sao o ia. Sa ou le fia inu Sa ou manao e auai i le Ekalesia. Sa ou toe faafoia atu le ipu ma ou aluese loa ma le pati, ma le loto faafetai ona sa ou le faia se faaiuga leaga.
O le taeao na sosoo ai, sa ou alu ai i le lotu ma maua ai faifeautalai, ma faatulaga ai loa se aso mo lo’u papatisoga. Talu mai lava lena aso, sa ou aloaloese ai lava mai pati e i ai le ava malosi. Sa ou faia ni uo fou i le lotu, o e sa tutusa o matou tulaga faatauaina ma tulaga faatonuina. Sa matou faauo pea ma tagata o le matou au nofotumau, ae sa ou faamanino atu i ai ou tulaga faatonuina. Ina ua latou iloa le taua o ou tulaga faatauaina ia te au, sa latou faaaloalo i ai ma tuu le faaosoosoina o au. Sa latou matauina ma faaaloalo [ia te au] i taimi ou te aluese ai mai le potu pe a latou matamata i ni ata tifaga pe faalogologo foi i ni musika e le talafeagai.
Sa faamalosia la’u molimau e ala i lenei aafiaga, ma o le a ou taumafai lava ia le tuuina i lalo ou tulaga faatonuina ona o faaosoosoga a le tupulaga. Ua ou iloa foi, o le auala sili ona lelei e faafetaiaia ai faaiuga faigata o le, ia iloa ou tulaga faatonuina ma pipii mau i ai mai lava i le amataga.
Ou te iloa na tali mai le Tama Faalelagi i au tatalo mo le malosi e tetee atu ai i faaosoosoga. Ou te faafetai ona sa uunaia au e le Agaga Paia e fai le faaiuga sao. Ou te iloa, ua i ai iina tulaga faatonuina o le Ekalesia ina ia puipui ai i tatou, ma ou te faafetai ona o le filifili e mulimuli ai, sa fesoasoani ou te filifili ai e auai i le Ekalesia.