Sara ma le [Fa‘aata] MRI
E alala le tusitala i Colorato, ISA.
Atonu e mafai ona fesoasoani le Agaga Paia ia Sara ia ona le lagona tele le fefe.
“Sa folafola e Iesu, Na te auina mai, o le Agaga Paia e fesoasoani mai”(Tusipese a Tamaiti, 56).
“E foliga mai e tatau ona fai se [fa‘aata] MRI o Sara mo lona papatua,” o le tala lea a Dr. Frank. Sa ataata atu o ia ia Sara. “O le a ou faatulagaina se fa‘aata mo taeao. Ou te toe vave mai lava.”
Na fai si umi o fai ma tiga le tua o Sara. Ina ua ala ae i le taeao lena, sa matuai tiga tele na faigata ai ona tu sao i luga, ma sa tau le mafai ona savali. Na o mai Sara ma lona tina e vaai Dr. Frank e fia iloa po o le a le mea na faaletonu.
“O se isi foi MRI?” o le fesili lea a Sara, ma tilotilo atu ia Tina. Sa fai muamua foi sana MRI i se tasi o taimi. Na te manatua lona fefe i totonu o le pa’u tele lea na pueina ata o totonu o lona tino.
“Talofa e, Sara,” o le tala lea a Tina. “Ae o ata o le a fesoasoani ia Dr. Frank e iloa ai le mea o loo faaletonu o lou papatua. Ou te iloa e te mafaia. Ma o le a ou i ai iina ma oe.” Na oomi e Tina le lima o Sara.
“Ae e le mafai ona ta o faatasi i totonu,” na fai atu ai Sara. Sa punou lona ulu, ma sa sisina ifo se loimata i lona alafau. E mafai ona la i ai faatasi ma Tina i totonu o le potu, ae o le taimi lava e alu ai Sara i totonu o le ana o le masini, o le a tuua toatasi loa nao ia.
Na fusi e Tina ia Sara. “E sa’o, ae e te iloa o ai e mafai ona i ai iina e faamafanafana ia te oe?”
Sa manatua e Sara se igoa sa faalogo i ai mo le Agaga Paia: o le Fesoasoani. Atonu e mafai ona fesoasoani le Agaga Paia ia ona le lagona tele le fefe.
“O le Agaga Paia?” Na fesili ai Sara.
Sa luelue le ulu o Tina. “E sa’o. E mafai ona e tatalo mo le Agaga Paia e fesoasoani atu ia te oe. O le a ma tatalo foi ma Tama mo oe.”
O lena mea na maua ai e Sara se manatu lelei lava. “E mafai ona ou fai ia Tama mo se faamanuiaga?”
Na ataata atu Tina. “Ioe. Ou te iloa o le a fiafia o ia e fai lena mea.”
O lena po, sa tuu ai e Tama ona lima i luga o le ulu o Sara ma tuu atu ia te ia se faamanuiaga faaleperisitua. Ina ua ia faamanuiaina Sara o le a faamafanafanaina o ia e le Agaga Paia, sa faapea ona faatumulia lona tino i se lagona mafanafana. Sa tumau ia te ia lea lagona i le po atoa.
O le aso na sosoo ai, sa taoto Sara i luga o le fata e faasee atu i totonu o le pa’u tele i le masini faata. Sa ia taulotoina i lona mafaufau upu na faaaoga e Tama i le taimi o lona faamanuiaga: O le a i ai iina le Agaga Paia e faamafanafana ia te oe. Na oomi mau e Sara le lima o Tina. Sa faasee atu o ia e le tausisoifua i totonu o le pa’u.
Sa fai e le masini fa‘aata ni leo malie ao ia pueina ata o lona papatua. Na tatau ona taoto filemu lelei Sara ina ia le nenefu ai ata. Sa popole o ia mo sina minute, ona ia toe lagonaina ai lea o lena lagona mafanafana. Sa pei lava o se tasi o opo a Tina. Po o se palanikeke mafanafana. Sa ia iloa o le a lelei mea uma. Na te toe iloa ane, ua uma le faata!
I totonu o le ofisa o Dr. Frank, sa ia faaali atu ai ia Sara ma Tina ata o le papatua o Sara. “Ese lou lelei ma lou taoto filemu,” na fai atu ai Dr. Frank ia Sara ao tootuli atu o ia i ona autafa. “O ata nei o lou papatua ua faaalia ai, o le a e manaomia se taotoga e fesoasoani e te savali lelei ai.”
Na folo faua Sara.
“Matou te mananao e fai i se taimi lata mai le taotoga,” na fai atu ai Dr. Frank, ma tilotilo ae i le tina o Sara. Ona toe liliu atu lea ia Sara. “A uma lena, atonu e alu ni nai vaiaso ona faatoa e toe oo lea i le mea sa e i ai muamua, ae o le vaaia ai o oe i le aso, o le a e maoae lava.”
Sa taumafai Sara e mafaufau i mea uma o le a ia faia pe a uma ona faalelei e Dr. Frank lona papatua. O le a mafai ona ou tamoe ma aau ma puna i totonu o se faaputuga tele o laulaau. Ua ia misia lava le faia o na mea uma. Peitai, sa sili atu le taufaafefe o le taotoga nai lo o se MRI [fa‘aata]! Ona manatua lea e Sara o ana tatalo ma lona faamanuiaga faapitoa. Na auina mai e le Tama Faalelagi le Fesoasoani ia te ia. O le a toe fesoasoani o Ia ia te ia.
Sa tilotilo atu o ia ia Dr. Frank. “Ona mafai lea ona ou puna i totonu o se faaputuga tele o laulaau?” sa ia fesili atu ai.
Sa ataata o ia. “Ona mafai lea ona e puna i totonu o se faaputuga tele o laulaau.”