Mauaina o le Fesoasoani i le mavae ai o le Maliu o Nancy
E alala le tusitala i Georgia, ISA.
O le a le mea na manaomia ona ou faia e faaaoga ai le mana faamalolo o Iesu Keriso i lo’u olaga?
Ata na tusia e Iker Ayestaran
Ia Fepuari o le 2016, na maliu ai lou toalua o Nancy i le mavae ai o se tauiviga e 11 tausaga ma le kanesa o le susu. O le tiga lofituina na ou lagonaina i uluai masina ina ua mavae lona maliu, o le a faigata ona faamatala atu i se tagata e lei oo i lenei ituaiga o faavauvau. O le faanoanoa, mafatia, le fiafia, tiga—e leai se upu o nei upu e lava [ona faamatalaina ou lagona i lena taimi]. Sa le mafai ona onosaia.
O le Mana Faamalolo a le Faaola
Ua leva ona ou malamalama na “afio ifo [Iesu Keriso] i lalo o mea uma” (MF&F 88:6) ina ia mafai ona Ia “fesoasoani [tuu mai le toomaga po o le fesoasoani] ai i ona tagata, e tusa ma o latou vaivaiga” (Alema 7:12). O le uiga o lenei mea, o le mana o le Togiola a le Faaola e faalautele i tua atu o le tuuina mai o le Toetutu ma mo le togiolaina mai agasala. E ala mai i lenei mana, e mafai ai foi ona Ia faamalolo i tatou i o tatou taimi o puapuaga ma mafatiaga. I lou tiga, sa faananati—na toeitiiti lava a popolevale—ona ou taumafai ia iloa le mea na manaomia ona ou faia e faagaee ai lenei vaega o le mana a le Faaola i lo’u olaga. Mo le tele o vaiaso, sa ou suesue ai i tusitusiga paia ma saunoaga mai le Au Pulega Aoao a le Ekalesia. Sa ou talitonu faamaoni e faapea, e ala i tiga ogaoga ma le ositaulaga mo Ia lava, sa silafia e le Faaola le tiga na ou oo i ai. Ae e faapefea e Lona silafiaina o lena mea ona fesoasoani ia te au? Talu ai sa mafatia o Ia i lenei mea mo au, o le a se mea na tatau ona ou faia ia maua ai le fesoasoani lea ua Ia silafia le auala e tuuina mai ai?
I le mavae ai o le tele o sailiiliga, suesuega, tatalo ma tapuai atu i le malumalu, sa amata loa ona ou malamalama. E muamua lava, sa amata ona manino lau vaai e faapea, ua uma lava ona fesoasoani, faamafanafana, ma lagolagoina e le Alii lo matou aiga, ae maise lava i vaiaso tonu a o lei maliu Nancy. Sa i ai ni aafiaga faaleagaga matagofie ua ou iloa nei o ni faamanuiaga na oo mai mai le mana faamalolo ma le faamalosi o loo i ai mo i tatou uma ona o le Togiola a le Faaola. Ma o le tau ina iloa sa tausia lava i matou e le Faaola i se auala sili ona patino, o le mea lava ia, sa matuai faamafanafanaina lava. E pei o Sataraka, Mesako, ma Apeteniko o anamua, sa i ai lava o Ia faatasi ma i matou i totonu o le “ogaumu aasa” (Tanielu 3:17) o o matou puapuaga.
Faalagolago i le Alii
Sa ou aoaoina foi, e i ai nisi o mea e manaomia mai ia i tatou e mafai ai ona maua le faamafanafanaga ma le faamalologa a le Alii. O le mea aupito taua lava, e tatau ona tatou faalagolago ia te Ia. O lena mea e fai lava si faigata ona fai. Aisea e tatau ai ona ou faalagolago i le Atua ae na mafai lava ona Ia taofia le maliu o Nancy ao lei tupu? I le tali i le fesili lenei, sa ou mafaufau loloto atili ai i se mea na ta‘u mai e le Alii i le Perofeta o Iosefa Samita:
“E le mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai pe a mavae puapuaga e tele” (MF&F 58:3).
Sa faamanuiaina i matou i le tele o faailo e faapea, o le auala ma le taimi o le maliu o Nancy sa tusa ai lea ma le finagalo o le Alii. Ua faapea ona ou malamalama, ua faataga e se Tama ua silafia mea uma ma agaalofa i matou e tigaina i nei mea ona, i Lana mamanu atoatoa mo le faaeaga o lo matou aiga, i se isi itu, e alagatatau ai lenei puapuaga. O le iloaina o lena mea, ua ou malamalama ai, o lo’u tulaga i Lana mamanu e le na o le talitalia ae ia “talitalia lelei” (MF&F 121:8). I le maualuga e mafai ona ou faapaia ai lenei tofotofoga ia te Ia, e le gata o le a ou maua le fesoasoani ae faapaiaina foi. Ua tele ni itu ua ou oo ai i lenei tulaga.
Ua ou fautuaina le ma fanau e fai le mea ua ou aoaoina e au lava i lenei faagasologa.
-
Ia faataga le tiga o aafiaga faigata e uunaia outou agai i le avea atili ma se soo.
-
Sasaa atu lou loto i le tatalo.
-
Afai e te lagona le ita i le Atua ona o le faatagaina o faalavelave e tutupu, aioi atu ia te Ia e suia le ita i le faatuatua ma le usiusitai.
-
Ia osifeagaiga o le a e alofa ia te Ia ma ia faamaoni e oo i le iuga.
-
Inu e le aunoa mai le afioga a le Atua—mai tusitusiga paia ma saunoaga ma tusitusiga a perofeta o ona po nei ma faiaoga musuia.
-
Alu i le malumalu ma se matelaina ina ia aoaoina i mea o le faavavau.
-
Sue ni tagata o e ua avea se faalavelave patino ma se faalavelave o le faatuatua, ma faamalosi i latou i lau molimau e uiga i nei aoaoga faavae.
O Se Molimau FaaAposetolo
Pe a ma se masina talu ona mavae le maliu o Nancy, na oo mai ai se po sa ou lagonaina ai le matuai faataumaoia o le tiga. Na alu lena aso atoa o ou i ai i le loloto o le tiga ma le faavauvau. Sa ou manatuaina le aoaoga a Elder Jeffrey R. Holland o le Korama a Aposetolo e Toasefululua e faapea, “o le ala o le faaolataga e i ai lava le ala e taitai atu ai i taimi uma … i Ketesemane.”1 E ui e le mafaatusalia ou puapuaga i puapuaga o le Faaola, ae o lena po sa ou i ai i le totonugalemu o ou lava “taimi pogisa ma oona.”2
Ina ua uma ona ou aafia i lenei mea mo se taimi ma tatalo ai mo le fesoasoani, sa oo mai i lou mafaufau se mea na ou faitauina ma faailoga i lau komepiuta i nai tausaga na muamua atu. Sa ou mauaina le [faila o le] faamatalaga ma faasolo loa i lalo i le mea sa ou sueina? Sa o se faatalanoaga ma Elder Richard G. Scott o le Korama a Aposetolo e Toasefululua (1928–2015) lea sa fesiligia ai o ia e uiga i le maliu o lona faletua o Jeanene, ona o le kanesa i le 1995. Sa tali mai Elder Scott, “O le mea muamua lava, … E leo leiloa o ia ia te au. O loo i le isi itu o le veli o ia. Ua faamauina i maua i lena sauniga paia o le malumalu, ma o le a ma faatasi e faavavau.”3
Ata o le Malumalu o Atlanta Georgia
O lena po, na oo mai ai na upu ma se mana ou te lei lagonaina lava muamua. Sa pei o le sulu o se moli o le ava ua kiina i se po pouliuli. Ou te lei faitau lava i se mea na faapea ona i ai se aafiaga vave ma le loloto ia te au. Sa te’a ese le pogisa ma le tiga. Sa pei o Alema i le taimi na ia “le toe manatuaina [ona] tiga” (Alema 36:19). O lenei molimau faaaposetolo sa matuai tuia ai lou loto. Sa ou maofa ona o se manatu sa ou malamalama i ai talu mai lo’u laitiiti ua faafuasei ona pei e matuai mataina lava. Sa oo ina ou mafaufau pe na mafai faapefea ona silafia e Elder Scott se mea faapenei. Ma i le taimi lea, sa ou iloaina ai ua ou iloa foi. Afai ou te faamaoni, e mafai ona ou maua uma le faamoemoe sa i ai ia Elder Scott. E ui sa i ai moni lava le faanoanoa ma le faavauvau talu mai lena taimi, ae ou te lei toe lagonaina lava le loloto o le tiga ma le faanoanoa lea na ou oo i ai i lena po.
O le mana lenei ua faasafua mai e le Faaola ia i tatou e fesoasoani mai ai i o tatou tofotofoga. Ou te iloa o le a le mou atoa ese atu le tiga o lo matou aiga, ae e tofatumoanaina i le mea ua ta’ua o faamanuiaga “faamalosia” ma “faaatoatoaina” o le Togiola a le Faaola.4 Ua matou latalata atili atu i le Faaola, ma lagona Ana faamautinoaga, ma ua lagolagoina e ala i le faavae mautinoa o a matou feagaiga.