Foia o Feteenaiga i Lau Faaipoipoga
E alala le tusitala i Iuta, ISA.
E tafe mai faamanuiaga matagofie mai le foia o feteenaiga i se agaga o le alofa.
Ata na tusia e Sally Wern Comport
Sa tape e Mati ma Makerita (ua sui uma igoa) le televise ina ua uma le sauniga faaiu o le konafesi aoao. Sa musuia savali, ma sa la fiafia i le agaga lelei sa faatumulia ai lo latou fale i le faaiuga o lena vaiaso.
E leai se tasi na sili atu ona le fiafia nai lo Mati ma Makerita ona, e lei atoa le 24 itula mulimuli ane, ae la faia loa se finauga vevela faapea, pe sefe se ponesi sa lei mafaufauina na maua e Mati i le galuega pe faaalu i ofu aoga o tamaiti matutua. Sa lei foia le finauga, ma sa see atu Mati ma Makerita i isi galuega ma lagona le le femalamalamaai.
Ina ia fatufatuina se faaipoipoga tumau ma fiafia, e ao i ulugalii ona iloa auala e foia ai feteenaiga, ina ia lagona ai e tagata taitoatasi le malamalama o le isi ma fai ai faaiuga e aafia ai fetuutuunaiga talafeagai.
Lapataiga ma Taitaiga Faaleagaga
O tusitusiga paia ma upu a perofeta ma aposetolo ua tuuina mai ai le tele o lapataiga e uiga i finauga. I le 3 Nifae tatou te faitau ai, “O le e i ai le agaga o le finauga ua le mai ia te au o ia, ae ua mai le tiapolo ia, o le o le tamā o le finauga” (3 Nifae 11:29). Na aoao mai Elder M. Russell Ballard o le Korama a Aposetolo e Toasefululua e faapea, o Satani “e galue e sunu’i se tina o le feitagai i le va o se tama ma se tina. Na te faatosina fanau ia le usitai i o latou matua. … “E iloa e Satani o le mea e sili ona mautinoa ma sili ona aoga e faaleaga ai le galuega a le Alii, o le faaitiitia lea o le taua o le aiga ma le paia o le auaiga.”1
O le eseese o manatu, mausa, po o mea e o mai ai e le mafai ona alofia, ae ua ia i tatou le anoano o punaoa e fesoasoani tatou te iloa ai le ala e taulima ai. O aoaoga faavae ma faatonuga e aoaoina i sauniga i Aso Sa ma lomiga a le Ekalesia, e mafai ona fesoasoani ma e mafai ona faaopoopoina atu i faamatalaga faapolofesa aoga pe a manaomia ai. E mafai ai e ulugalii ona iloa auala mo le taulimaina o feteenaiga. O musumusuga e mafai ona taitai atu i le suia o loto lea e faamaluluina ai uma taitoalua ma suia ai mai totonu.
Ua lapatai mai Peresitene Thomas S. Monson: “O nisi o o tatou avanoa silisili e faaali atu ai lo tatou alolofa o le a i ai lea i totonu o puipui o o tatou lava fale. O le alofa e tatau ona i ai i le totonugalemu o le olaga faaleaiga, ae o nisi taimi e le o i ai. O loo tele naua le le onosai, tele naua le fefinauai, tele naua fetauaiga, ma tele naua loimata maligi.”2.
Pe a i ai pea lava faafitauli ma oo ai ina faatamaia ai le olaga faaleaiga, e mafai ona tele atu ni faapogai ogaoga o feteenaiga, e aofia ai le moto o le mafaufau, manatu faapito, manao ia malo i tauiviga i le fiapule, ma le faamaualuga. Na aoao mai Peresitene Gordon B. Hinckley (1910–2008), “Ua leva ona ou lagonaina, o se elemene aupito sili i se faaipoipoga fiafia o se popolega naunautai mo le manuia ma le tulaga solo lelei o lana soa. O le tele lava o mea e tutupu, o le manatu faapito o le autu lea e mafua ai feupuaiga, o teteaga, tatala o faaipoipoga, ma loto nutimomoia.”3
Na ta’ua foi e Elder Marvin J. Ashton (1915–94) o le Korama a Aposetolo e Toasefululua: “A mafaufau se tagata i lagona le lelei ma le le manaia lea e mafua mai i finauga, e sili le fesili ifo, ‘Aisea ua ou faia ai?’ …
“… E taua le iloa, tatou te filifilia a tatou amioga. O loo i le aa o lenei mataupu le faafitauli ua loa o le faamaualuga.”4
Po o le a lava le pogai, e tatau ona tatou aoaoina ni tomai fou ma faamalulu o tatou loto pe a tumau pea ona tulai mai faafitauli.
Mafuaaga o le Feteenai
E tele mafuaaga o le feteenai, e mai lava i manatu papau faaituau a le tagata lava ia e oo atu i ituaiga fesootaiga loloto ma maotua. E faaopoopo atu i le faatoilaloina o le manatu faapito ma le moto o le mafaufau, o le a fetaiai foi ulugalii ma isi pogai masani o feteenaiga e pei o vaega nei:
-
O le taumafai o ulugalii fou e faafetaui atu i sitaili a le tasi ma le isi
-
O eseesega masani i le va o alii ma tamaitai
-
O le le fiafia e uunaia e le lelava
-
O le eseese o manatu i auala sili ona lelei e tausi ai fanau pe pulea ai tupe
-
O fanau e aoao e faaaoga le faitalia
-
O le eseese o mea e fiafia ma e le fiafia ai
-
O le soona mateletele i le atuatuvale
-
O le le lava o le malamalama po o tomai i le foiaina o feteenaiga
Lapataiga e uiga i le Ita
O le tele o feteenaiga i faaipoipoga po o aiga e tulai mai ona o le le pulea o le ita. Afai tatou te le faaeteete, e mafai ona tumau pea i o tatou mafaufau i le mavae ai o se feteenaiga, le lagona na faia e o tatou taitoalua se mea sese ia i tatou. O le umi lava o le tatou teulotoina [o lena lagona], o le tele foi lea o pogai tatou te faatupuina e tauamiotonu ai o tatou manatu. O le faaauau pea ona i ai o lenei manatu le lelei, e mafai ona taofia ai i tatou mai le toafilemu, ma a toe tulai mai loa se isi mea e oso ai le ita ao lei faaleleia le faafitauli muamua, o le oso mai o lagona ma mafaufauga e mafai ona faaopoopo ai le oso o le ita.
Mo se faataitaiga, i se fonotaga faufautua, na faamatala ai e Merelini le faaosoita o le taoto i le moega ina ua uma ona la feei ma lona toalua i le tasi ma le isi. Na fai mai o ia, “Sa ou iloa sa sao au.” “Sa ou iloa o le a ia kiina le moli ma faatoese mai, ae na te lei faia lava. O le tele o lou mafaufau i ai, o le tele foi lea o lou ita. Ina ua ou faalogo atu ua amata ona taagulu o ia, sa le mafai ona ou toe tatalia—Sa ou oso ese mai le moega ma toe ee atili atu ia te ia ona ou alu loa lea i le fogafale a lalo. E te talitonu e lei faatoese mai lava o ia?” O le aafiaga a Merelini o se faataitaiga lelei lea o le auala e le tatau ona taulima ai lagona o le ita.
O mausa, e oo lava foi i mausa pupuu, e mafai ona foliga mai e faigata ona momotu. Ae e mafai e taitoalua ona aoao tomai e fesoasoani ai. O nisi nei o faiga aoga:
O Motugaafa e7 mo auala e Faato’ato’a Ai
Ia vave ona luiina [ou] mafaufauga. I le tatou faataitaiga, sa ono mafai ona faapea ifo Merelini ia te ia lava, “E pei e sao a’u, ae ua ou soona mateletele. E sili atu le taua ia te au o le ma mafutaga ma lo’u toalua nai lo o le mea o loo ma finau ai.”
Ia faatoatoa muamua ou faalogona ae e te lei taumafai e taulima se faafitauli. Faatali sei te’a le vevesi o lou mafaufau.
Sue se mea faalavefau. Filifili e mafaufau i se isi mea pe alu e savalivali.
Tusi i lalo ou manatu. Mo nisi, o lenei mea e fesoasoani e faateleina ai le nofouta o le tagata lava ia.
Faaali ou lagona i ni mea aoga. O le ee e uiga i ou lagona o le a le fesoasoani lea “e faatea ese ai mai lou loto.” O le tele lava o le faaalia o ou lagona i se agaga o le ita, o le malosi atili foi lena o ou lagona.
Faalogologo i musika toafimalie pe faitau ni tusi faagaeetia.
Toe Amata. Ia e vave taofi i le faatoa amataina o se feeseeseaiga. Ua faaalia i suesuega e faapea, o le uluai tolu i le lima minute o se talanoaga e faataoto ai le faavae mo le mea atonu e sosoo mai ai. Ia faapea, “E le lelei le itu ua agai atu i ai le mea lenei. Sei ta toe amata.”
Laasaga i le Foiaina o Feteenaiga
O leFaamalolosia o Faaipoipoga, o se tusi lesona a le Tautua mo Aiga o le AAG, ua fautuaina mai ai ni laasaga se tolu mo le foiaina o feteenaiga: (1) faaali manatu, (2) sailia o popolega, ma le (3) filifilia o vaifofo fesuiai faamalieloto.5 O nei laasaga ua faavae i se faataitaiga o se talanoaga ma fefaasoaaiga e faapea ona aofia ai le soosoo tauau ma soalaupule ai faafitauli o tagata uma e aafia ai.
1. Faaali Manatu
E faasoa atu e tagata taitoatasi ni manatu i se agaga faamaoni ae le o le osofai. O nisi taimi, o manatunatuga magafagafa e foia ai faafitauli pe a oo ina manino mai, o le feeseeseaiga sa na o se le femalamalamaai lava. Mo se faataitaiga, o se fafine e manatu o loo tauanau ma le manatu faapito lona toalua la te o i se taaloga pasiketipolo a le aoga maualuga nai lo le o e aai i se faleaiga mo le la tafaoga, atonu e ono malamalama ane, e itiiti sona fiafia i le pasiketipolo nai lo le faaali atu o lona gauai i se tagata taalo ua le toe sau i lana vasega o le Aoga Sa.
2. Sailia o Popolega
O ulugalii e sailia popolega o loo laualalo i o laua manatu. O le mea e taulai i ai o le malamalama ma le taliaina o atugaluga o le tasi. I le faaauau ai o le faataitaiga i le pasiketipolo, o le fafine, e ui ua malamalama i le atugaluga o lona toalua mo le tagata o le vasega, e ono talitonu lava o loo atinaeina e lana tane se mamanu o le faamuamua i taimi uma o manaoga o isi nai lo o manaoga o le la faaipoipoga. I le tulaga lenei, e tatau ona faia se talanoaga loloto e tofu faaali ai lagona i se agaga o le faautauta ma suia ai le feteenai i le aufaatasi.
3. Filifilia o Vaifofo Fesuiai Faamalieloto
E palepalealuga ma filifili e ulugalii ia fofo e tau fai malilie uma ai. O le taulai atu, ua i ai lea i mea e mafai ona faia e tagata taitasi e taulima ai atugaluga ae le o le, o a ni mea e mafai ona faia e o latou taitoalua. O fetuutuunaiga faapena e mafai ona tofotofo ai le matua o le mafaufau ma le onosai peitai, i le mavae ai o aso, e oo atu ai i se talitonuga e faapea, e i ai le saogalemu i le faailoaina o lagona ma le talitonuga o le a faapea ona talanoaina manaoga o tagata taitasi. E mafai ona malilie le ma’ua ulugali e faaalu faatasi se po se tasi o se Aso Faraile i se taaloga pasiketipolo, se po o se Aso Faraile se tasi e alu ai nao le tamaloa i le taaloga, ma ni po o ni Aso Faraile se lua e fai ai gaoioiga faaleulugalii. E le taua tele pe faapefea ona faaalu e le ulugalii le po o le Aso Faraile, nai lo o le faamalieina uma o i laua i le lelei o le faagasologa o le faiga o faaiuga.
Taunuuga o le Foiaina o Feteenaiga
E tafe mai faamanuiaga mataogife mai le foia o feteenaiga i se agaga o le alofa. O nei faamanuiaga e aofia ai le malu puipuia; tuputupu ae patino, lea e taitai atu ai i le filemu o le loto; faatuatua faateleina; faaleleia ai uiga faaalia; ma le amiotonu patino.
A foia feteenaiga, e mafai ona suitulaga atu i ai ni mamanu fou. Ona matala ai lea o le faitotoa mo taitoalua e faailoa atu ai manatu lelei ma faaali atu le lagolagosua. Na saunoa mai Sister Jean B. Bingham, Peresitene Aoao o le Aualofa: “Ua i ai i upu se mana e ofo ai, e faafiafia ai ma faalotovaivaia ai foi. Atonu tatou te manatuaina uma lava ni upu lē lelei na faalotovaivaia ai i tatou ma isi upu na tautalagia i le alofa na matua faagaeetia ai o tatou agaga. O le filifili e fai atu na o upu e lelei e uiga i isi—ma i—isi e siitia ma faamalosia ai i latou o siomiaina i tatou ma fesoasoani ai i isi ia mulimuli i le ala a le Faaola.”6
O ulugalii o e ua faia ni faagasologa uumi i le foiaina o feteenaiga e selesele foi i taui manaomia. Na faapea mai se tane sa i ai i se mafutaga muamua sa le lelei, “E faigata ona ou toe tepa i tua i le mea sa masani ona i ai ma talitonu ai e faapea sa mo’i lava. Na mafai faapefea ona ou faia lo’u toalua i le auala na ou faia ai? Ou te faafetai mo le faasagatonuina o au e le Agaga, ma mo le onosai ua faaalia e lo’u toalua ia te au.”
Faaiuga
O le faatoilaloina o feteenaiga e manaomia ai se taumafaiga magafagafa ma le tulitatao. O le isi mea e te fai atu ai pe faia e mafai ona amatalia ai ni mamanu lelei o fesootaiga i lau faaipoipoga. E mafai ona e selesele i fua o le Agaga e pei ona sa oo i ai Sa Nifae: “Ma sa oo ina leai se finauga i le laueleele, ona o le alofa o le Atua sa mau i loto o tagata.
“Ma sa leai se mataua, po o ni feeseeaiga, po o ni faanunununu … ; ma e moni e le mafai ona i ai o ni tagata e sili atu ona fiafia” (4 Nifae 1:15–16).