Tatou te Talanoa ia Keriso
E Le O Tuai mo se Avanoa Lona Lua
E alala le tusitala i Virgina, ISA.
Sa tau atu e le tama i lona afafine, o se tasi o au tamaitiiti aoga sa tauivi ma le aoga, “E le o tuai ona e [taumafai] ia manuia lau aoga.” Ua tuu mai e le Alii ia i tatou lea lava savali e tasi.
Ata na tusia e Kelley McMorris
Sa i ai Sandra i lau vasega Igilisi e maualuga atu. Na o ni nai vaiaso talu ona amata le tausaga, ae na te lei faia lava se meaaoga mai le fale po o galuega faatino. Sa na o le sioa lava i lana kesi. Sa ia faia ni alofaga mo mafuaaga sa lei uma ai ana meaaoga, ma na te lei faaalia foi le agaga po o galuega sa manaomia mo le faamanuiaina i se vasega luitauina.
Sa tonu loa ia i ma’ua ma lana faufautua e faatulaga se fonotaga ma Sandra, lona tama, ma nisi o ana faiaoga e iloilo ai le tulaga e tatau ona ia agai i ai: pe tatau ona ia tuua vasega maualuluga atu ae ave ni ana vasega masani. O le mea aupito taua sa matou mafaufau uma i ai o le: mata matou te maua se auala e fesoasoani ai ia Sandra ia faamanuiaina?
O le talitonu ai e faapea, sa tele ni avanoa na tuuina atu ia Sandra ia manuia ai, ae sa filifili lava e toilalo, o lea na ou alu atu ai i le fonotaga ma le lagona o le lotovaivai tele. Sa faalilolilo ona ou faamoemoe o le a filifili o ia e aluese ma la’u vasega ina ia ou le toe popole ai ia te ia. Sa ou manatu, ua ou faia mea uma sa ou mafaia ma ua fai lava si tuai.
I le fonotaga, sa faaalia lava i taga a Sandra sa ia masalomia foi lona mafai ona faamanuiaina [i la’u vasega] Sa faataupupula atu o ia i le laulau ao ou faamatalaina lona le pasi i le vasega Igilisi. A o faamautu mai e lona faiaoga o talafaasolopito e faapea, sa le pasi foi Sandra i lana vasega, sa atili ai ona faamimigi o ia i lona nofoa ma na mafai ona ou iloa atu le tafe ifo o ona loimata i ona foliga.
O le lagonaina ai o le agaalofa, sa ou faamalamalama atu ai ia te ia ma lona tama e faapea, afai e fia manuia Sandra i nei vasega luitauina, e tatau la ona sui lana amio lea na ala ai ona oo i lenei lua loloto, ma o se mea o le a matuai faigata lava.
O se Savali mai Lona Tama
Ona faliu atu lea o le faufautua i le tama o Sandra, o se alii sa le tele sona aoaoina, o le sa foliga mai sa le lagolelei i le tulaga o le aoga. Sa fesili atu i ai le faufautua pe sa i ai ni ana fesili mo faiaoga. Sa fai mai o ia e leai, ma na faafetai mai mo mea na matou faia mo Sandra. Ae sa fai mai, sa i ai sana tala e fia fai atu i lona afafine.
Sa popole lo’u loto. Sa ou i ai i nisi o fonotaga a matua ma faiaoga lea na otegia ai e matua a latou fanau i luma o faiaoga ma faufautua, ma faitioina i latou ona o lo latou paie, le faalogo, ma le leai o se naunautai. Sa ou sauniuni e toe faalogo foi i ai.
Ae o le mea na ou faalogoina, sa faateia ai au. Sa liliu atu le tama lotomaualalo o Sandra i lona afafine e 16 tausaga ua tagi, o le sa matuai maualalo lava i le maasiasi ma le faanoanoa ma faapea atu ia te ia, “E le i tuai lava. E le i tuai lava mo oe le faamanuiaina. O le mea moni e le i tuai lava.”
Sa ou tuua lena fonotaga ma le agaga faafetai mo lenei tali atu ma le agaalofa peitai sa popole, faapea sa matuai leai ma sona silafia i le mea o le a manaomia mo lona afafine ia pasi ai i le taimi lea. Sa foliga mai o se mea faigata. Sa oo mulimuli mai le tala e faapea, sa tonu ia te ia e aluese mai lana vasega o le talafaasolopito ae le o la’u vasega Igilisi.
I se taimi mulimuli ane o lena aso a o ou tootuli i le tatalo, sa ou mafaufau ai i ou lava faaletonu ma ole atu i lou Tama Faalelagi mo se faamagaloga, sa ou iloaina ai le tele o se mea na ou aoaoina mai i le tama o Sandra. O le le mautonu ma lagona o le le atoatoa sa faapea ona i ai taimi o lou lava olaga sa ou mafaufau ai pe sa ou agavaa pe sa tatau ona maua se avanoa lona lua. I na taimi, sa filifili ai le Alii, e pei o le tama o Sandra, e le faitioina au ae faamautinoa mai: “E le i tuai lava, lou afafine. E le i tuai lava.”
O le Savali o le Talalelei
Pe ua faafia ona tatou talitonu i le savali a le fili e faapea, ua leai so tatou faamoemoe? Ae peitai, e ese le mea ua tau mai e perofeta ia i tatou. Ua folafola mai Isaia, “A ia foi mai ia Ieova, ona alofa mai lea o ia ia te ia; ia foi mai i lo tatou Atua, aua na te matua faamagaloina” (Isaia 55:7). Ua faaopoop mai e Mamona lana molimau, “Soo se taimi sa latou salamo ai ma saili le faamagaloga, ma le faamoemoe faamaoni,sa faamagaloina i latou” (Moronae 6:8). O le olioli o le talalelei o le, e le taitai lava ona tuai. Aua pe faafia lava ona tatou sailia le faamagaloga, o le a faataga e le togiola a le Alii i tatou e fai se amataga fou.
Faatasi ai ma se uunaiga, sa faia ai e Sandra ni suiga malie ae taua. Sa le faigofie le suiga—sa manaomia ai se taumafaiga i aso uma e faatoilalo ona mausa le lelei—ae sa ia vaaia taui o ana taumafaiga a o faasolosolo ina faaleleia ona togi.
Mai se vaaiga o le talalelei, o le tatou togi faaiu o le a le taulia ai po o le a le umi na tatou pauu ai pe o le a foi le mamao na tatou se ese ai. Nai lo o lena, o le a faamasino e le Alii o tatou olaga e faavae i le itu o loo tatou o i ai, pe na faapefea ona tatou salamo, ma po o le a le tele na tatou faalagolago ai i le Togiola a le Alii.
I lou malamalama faalelava, sa ou masalomia ai le mafai e Sandra ona faatoilalo ana mea sese i le taimi ua tuanai. O le eseesega, e le taitai alu ese le faamoemoe o lo tatou Tama atoatoa i le gafatia o Ana fanau e ausia ai le faaolataga e ala i le faaatoatoaina ia Keriso. E le afaina pe o le a le mamao ua tatou se ai; o le a Ia saili pea mo le tasi. Ua augani mai le Alii ia i tatou, ia aua le toe feoai solo e pei o ni tagata ese i le agasala ae nai lo o lena, ia saili atu ia te Ia i le faamoemoe ma fiafia i faamanuiaga o Lana Togiola e le iu. E moni, e le tuai lava.