Ia Iloa Muamua ae E te le’i Alu: Papatisoga i le Malumalu

Saunia e Heather J. Johnson

Mekasini a le Ekalesia

E le manaomia ona faatali. O tagata agavaa uma o le ekalesia, e aofia ai le autalavou ma tagata fou, ua mafai nei ona auauna atu i le malumalu.

Ata

standing in front of temple doors

“Ia avea moni i tatou ma tagata toaaga ma alolofa i le malumalu,” o le saunoaga lea a Peresitene Howard W. Hunter (1907–95). “E tatau ona tatou faanatinati soo atu i le malumalu … e tusa ai ma o tatou tulaga faaletagata. E le tatau ona tatou o mo nao e ua maliliu, ae ia o foi mo faamanuiaga o le tagata lava ia mo le tapuai i le malumalu, mo le faapaiaina ma le saogalemu i totonu o na pa paia ma le mamalu” (“O Tagata Naunau I le Malumalu,” Liahona, Me. 1995, 5).

O lenei fautuaga ua faatatau lea i tagata uma o Le Ekalesia a Iesu Keriso o le Au Paia o Aso e Gata Ai—e tusa lava pe o oe o se tagata na faatoa papatisoina lata mai nei. Afai lava o loo e agavaa, e leai se mea e tau faatalitali ai ona faatoa mafai lea ona e auai atu i le malumalu. O le taimi lava e papatisoina ma faamauina ai oe, ona mafai loa lea ona e maua se pepa faataga o le malumalu e tapulaa le faaaogaina.

O lenei pepa faataga e mafai ai ona e ulu atu i le malumalu e faia sui papatisoga ma faamauga mo tuaa ua maliliu. Pe a e auauna ma tapuai atu i totonu o le malumalu, e mafai ona e faamalosia ai lau molimau o le talalelei.

E faatatau i lana uluai aafiaga i le malumalu, na fai mai ai Natalia Lorena Figueroa mai Atenitina, “I totonu o le potu o papatisoga, sa ou vaai atu ai i se tuagane na papatisoina mo lo’u tamamatua ma toeaiina o lo’u aiga (uncles). Ona papatisoina ai lea o au mo lo’u tinamatua ma tamaitai o lo’u aiga. Sa matuai tulaga ese le olioli na ou lagonaina. Sa maligi ou loimata, ma e lei i ai se isi taimi muamua na ou lagonaina ai le mu i lo’u loto.” E faapena foi faamanuiaga o loo faatalitali mai ia i latou o e agavaa mo, ma faaaoga pepa faataga o le malumalu e tapulaa le faaaogaina.

O Fesili e Fesiligia Soo

E faapefea ona ou maua se pepa faataga e faatapulaa le faaaogaina?

E tatau ona 12 ou tausaga pe matua atu, ma o se tagata agavaa o le Ekalesia. O alii e tatau ona maua le Perisitua Arona, lea e masani na mafai ona faia i totonu o se vaiaso talu ona latou papatiso.
Ina ia maua se pepa faataga, e faatalanoa oe e lou epikopo po o le peresitene o le paranesi. O le faatalanoaga e talitutusa lava ma lou faatalanoaga na fai ae e te lei papatiso. O le a oulua talanoa ai i lau molimau i le talalelei ma lou tausia o poloaiga.
O le pepa faataga e tasi le tausaga e aoga ai.

O a ni faamanuiaga o le i ai o se pepa faataga o le malumalu e faatapulaa le faaaogaina?

E mafai ona e auauna atu ai i ou tuaa ua maliliu ma isi o e ua maliliu e ala i le faia o sui papatisoga ma faamauga mo i latou.
E mafai ona e manatuaina ai a oe lava feagaiga o le papatisoga ma le faamauga na e osia.
E tusa lava pe le mafai ona e auai soo atu i le malumalu, e mafai ona e fealuai ma oe lau pepa faataga e avea o se faamanatu faifaipea o le malumalu ma lau tautinoga ia agavaa e te auai atu i ai.
O le ola agavaa mo se pepa faataga o le malumalu e tapulaa le faaaogaina, e fesoasoani e te saunia ai e maua a oe lava sauniga o le malumalu o le faaeega paia ma le faamauga.

O a ni auala e tatau ona ou fuafuaina ai se malaga i le malumalu?

Fesili i se taitai o le uarota po o le paranesi, e pei o le taitai misiona o le uarota po o le peresitene o le Aualofa, mo se fesoasoani i le fuafuaina o se malaga i le malumalu.
O loo i luga o le initioneti ia taimi faatulagaina mo papatisoga i malumalu taitasi i le temples.lds.org. E mafai foi ona e telefoni atu i le malumalu mo ni faamatalaga.
Afai o le taimi muamua lea ua e auai atu ai, e mafai ona e telefoni i le malumalu e faatulaga ai [lou] taimi atofaina. O lenei faiga, o le a latou saunia ai e faafeiloai oe ma faamatala atu mea o le a e faia i totonu o le malumalu.
Ia laei atu ou laei o le Aso Sa i le malumalu.
Sau ma aumai sou ofu laitiiti paepae e te sui ai e faaaoga. O nisi malumalu e tuuina atu ofu laiti papae, ae o nisi e leai. O le a tuuina atu e le malumalu se ofu soloatoa paepae ma se solotaele.

O a ni mea e tatau ona ou faamoemoeina pe a ou auai atu i le malumalu e fai sui papatisoga ma faamauga?

Pe a e ulufale atu i le malumalu, o le a e tau muamua atu i le laulau e siaki ai pepa faataga. O le a siaki ai e se tagata faigaluega o le malumalu lou pepa faataga.
Ona o atu lea o alii ma tamaitai i potu sui eseese e sui ai. E tuuina atu potu o le loka a le tagata lava ia e sui ai mai ou laei i se ofu soloatoa paepae e tuuina atu.
O le a faasino atu oe e le tagata faigaluega o le malumalu i le mea e te alu i ai e fai ai sui papatisoga ma faamauga.
O papatisoga ma faamauga e te aafia ai, o le a tutusa lava ma lou lava papatisoga ma le faamauga, ae o le a e fai ma sui o se tagata ua maliu.
A uma ona e auai i sauniga, o le a e toe foi atu i le potu e sui ai laei ma toe sui i ou oe lava laei.
E leai se mea e popole ai i le auai atu i le malumalu. O loo i ai tagata faigaluega o le malumalu i soo se mea e te alu i ai i totonu o le malumalu. O le a latou fesoasoani ia te oe.