Mauaina o le Taua o le Tagata Lava Ia e ala i le Ola-Tutoatasi

José Alberto Navas (e pei ona faamatalaina atu ia Miriam Sweeney)

San José, Costa Rica

Sa ou faaipoipo ma na i ai sa’u fanau e toatolu, ae sa ou le faigaluega. O le leai o ni galuega sa ou lagonaina ai le leai o se faamoemoe. Sa ou popole mo le saogalemu o lo’u aiga, ma sa faapea ona ou le toe talitonu ai ia te au lava.

Sa uunaia au e lo’u toalua o Carla, ou te auai i se vaega o le ola faalagolago o le tagata ia te ia lava. Sa ou matamuli e faapea atu sa leai sa’u galuega, ae sa ia faamalosiau mai ou te auai i le vaega ia mafai ai ona ou tausia lo matou aiga.

Sa ou taumafai lava i ai ma le faatautau. Ao ou auai i le vaega, sa ou iloa ai o ou tomai i le Igilisi e mafai ona avea ma se aseta taua i le lalolagi faigaluega. Sa ou aoaoina le Igilisi i la’u misiona, ae sa nao mea e faatatau i le lotu sa ou iloa tautala ai. Sa ou lesitala loa i vasega Igilisi sa ofoina mai e le Ekalesia e faaleleia atili ai la’u vaogagana Ou te foi mai mai le vasega Igilisi i se tasi o aso, ae tuu mai e Carla le telefoni ia te au.

“O ai lea? Sa ou fesili ai.

Sa ia tali mai, “Ou te le iloa.” “O loo tautatala faaPeretania.”

O se sui o punaoa mo tagata faigaluega mai se tasi o kamupani aupito tele i Costa Rica sa fesili mai e faatalanoa au. Sa ou tei, ae sa matuai manaia le aluga o le faatalanoaga. Sa ou iloa mulimuli ane o Carla na faatulagaina le faatalanoaga.

Sa ou maua le galuega, ma sa ou manatua auala na fesoasoani ai ia te au la’u vaega o le ola faalagolago o le tagata ia te ia lava. Ona ou mafaufau lea pe faapefea ona ou faaaogaina lelei mea na ou aoaoina. Sa amata ona ou sailia se galuega sa sili atu foi le lelei, ma sa ou mauaina. Ona ou galue lea agai i le amataina o la’u lava pisinisi kamuta.

Ou te le iloa po o fea se mea semanu o matou i ai ma lo’u aiga pe ana le aunoa le amataga lea na matou maua mai i le polokalama taimua o le ola-tutoatasi. Sa ou aoao ai ia lotomaualalo ma ia ole atu i le Alii mo le fesoasoani. Sa ou aoao ai foi e faataga i latou o e sa mananao e fesoasoani mai e faamanuia ai lo’u olaga. Ua matou maua le tele o faamanuiaga. Ua ou maua nei le lagona o le taua o le tagata lava ia, ma mafai ona ou faamanuiaina lo’u aiga i tupe ou te maua. Ou te iloa e faamanuia i tatou e le Agaga pe a tatou lotomaualalo.