2017
E ese mai le tatalo ma le suesueina o tusitusiga paia, o le a se auala e sili ona lelei e faamalosia ai la’u molimau?
October 2017

Fesili & Tali

“E ese mai le tatalo ma le suesueina o tusitusiga paia, o le a se auala e sili ona lelei e faamalosia ai la’u molimau?”

Atonu o le a le oo mai uma i le taimi e tasi lau molimau. O le a tuputupu ae e tasi le aafiaga faaleagaga i le taimi—e pei ona fai mai tusitusiga paia o, “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30). Ona tatau lea ona e faafaileleina ma faamalosia lau molimau, e pei lava o le tuputupu ae o se fatu (tagai Alema 32:28–43). Ma e pei lava ona le ola se laau itiiti i le nao le vai, e le nao le tasi foi se auala “sili ona lelei” e faamalosia ai lau molimau. E te manaomia se tuufaatasiga o auala.

O le tatalo ma le suesueina o tusitusiga paia ua mautinoa lava o auala lelei ia e faamalosi ai lau molimau. Ao e suesue i le talalelei ma tatalo ma le manatu tonu i ai ina ia iloa e moni se mea, o le a fesoasoani le Agaga Paia ia e lagona le moni o le talalelei (tagai Moronae 10:4–5).

E mafai foi ona e faamalosia lau molimau e ala i le tausia o poloaiga. A e ola i se mataupu faavae o le talalelei—e pei o le anapogi, tausia o le aso Sapati ia paia, po o le tagofia o le faamanatuga—e amata ai ona e maua se molimau i le faapefea ma le aisea e moni ai, nai lo nao le e moni. Ua fetalai mai Iesu, a e filifili e “fai lona finagalo,” o le a e “iloa le mataupu” (Ioane 7:17).

O le isi auala e faamalosia ai lau molimau e ala lea i le faasoa atu. Na saunoa mai Peresitene Boyd K. Packer (1924–2015), le Peresitene o le Korama a Aposetolo e Toasefululua, “O se molimau e tatau ona maua i le tuuina atu!” (“The Candle of the Lord,” Ensign, Ian. 1983, 54; Tambuli, July 1983, 34). E mafai ona e faasoa atu lau molimau i le lotu ma le seminare, i le aiga, ma i uo. Pe a e faia, o le a mafai ona molimau atu le Agaga Paia ia te oe e moni mea o loo e faasoaina atu.

Ao e faamalosia lau molimau i le tele o auala eseese, o le a tuputupu ae ma loloto atili ai, ma o le a e lagona le toafilemu ma le olioli.