Momotu le Sitaili “Masani a le Tupulaga”
Faagalo mea o loo fai mai ai le lalolagi. E faapefea ona silasila mai le Tama Faalelagi ia te oe? E mafai ona e ola e tusa ai ma Lana silasila mamao e uiga i ou gafatia.
E tele lava tala a le lalolagi e uiga i le tupulaga i aso nei. Atonu ua e iloa nisi o talitonuga masani pe ua e faalogo foi i se tasi o faitio e uiga i “tamaiti i aso nei.” Ua tele foi suesuega ma faamaumauga faafuainumera e uiga ia te outou—o a outou mausa i ala o fesootaiga faaagafesootai, o mea tou te faatauina mai, e oo lava foi i le po o le a le puupuu o le taimi tou te gauai atu ai [i se mea].
Ae fai mai Peresitene Russell M. Nelson, Peresitene o le Korama a Aposetolo e Toasefululua, e “le toafimalie” o ia pe a faalogo i tagata sailiili o faamatala a latou suesuega e faatatau i tagata talavou. “Ma o le mea moni lava,” sa ia fai mai ai, “ou te faale fiafia i mea e fai mai ai le au popoto e uiga ia te outou nai lo le mea ua tau mai e le Alii ia te au e uiga ia te outou.”1
E le manaomia e le Alii ni suesuega po o ni talitonuga taatele ina ia iloa ai outou. Na te le manatu ia te outou o se fuainumera po o se tasi ua lofituina i le ala ua taumafai “le lalolagi” e faamatala ai outou.
Na saunoa Peresitene Dieter F. Uchtdorf, Fesoasoani Lua i le Au Peresitene Sili, “E alofa o Ia ia te oe e le gata mo le tagata ua i ai oe i lenei lava aso, ae faapena foi mo le tagata o le mamalu ma le malamalama lea e te maua ai le gafatia ma le manao e avea ai.”2
E le na ona vaai le Atua ia te oe; e alofa o Ia ia te oe.
E te manao e momotu le sitaili a le lalolagi? Ia amata ona e vaai ia te oe lava i le ala o loo silafia ai oe e le Tama Faalelagi ma Ana auauna filifilia. E te manao e talepe talitonuga taatele? O le taimi lenei e tulai ai ma gaoioi loa! I le avea ai ma se tama e 12-tausaga le matua, sa faamanatu atu ai e Keriso i Ona matua faalelalolagi, sa tatau ona Ia i ai “i le fale [pisinisi] a [Lona] Tama” (Luka 2:49).
Sa lei laitiiti tele o ia, ma e faapena foi ia te outou. O le isi la fesili lenei: E mafai faapefea ona e i ai i le fale/[pisinisi] o lou Tama Faalelagi?
O Lona “fale/[pisinisi]” o le aumaia lea o “le tino ola pea ma le ola faavavau o le tagata” (Mose 1:39), e mafai la ona e i ai i le fale o lou Tama e ala i le faia o le mea sili e te mafaia ia ausia ai mea e te gafatia ma e ala i le avea ma se tasi e fesoasoani atu i isi ia ausia foi mea latou te gafatia.
O le taimi lenei e te nafa ai ma lou lava lumanai. O a ni mea e te faia i le taimi nei ia mautinoa o loo avea ai oe ma tagata ua silafia e le Tama Faalelagi e mafai ona e avea ai, e le gata i le faavavau, ae faapea foi i lenei olaga?
E te fia faaipoipo i le malumalu? Ia filifili nei ia mama [ou] mafaufauga, upu, ma aga. O e fuafua e te aoga i se iunivesite? Ia atinae i le taimi nei ni tomai suesue lelei. E te manao e auauna atu i se misiona? Faaopoopo le Tala’i La’u Talalelei i au suesuega o le talalelei (ae maise lava le mataupu e 3). E te manao e tausia se aiga? Aoao nei i auala e maua ai ma tausia se paketi.
E mafai foi ona e vaavaai i mea e te maua ai le fiafia i le taimi nei. E te fiafia i le matematika? Taina o le piano? Tusia o tala? Ia fai pea lava! Vaai pe i ai ni auala e mafai ona e alualu ai i luma: i vasega i le aoga, aoaoga i luga o le initoneti, tauvaga, aoaoga faamasani, ma isi mea faapena.
Momotu le sitaili ma talepe talitonuga masani! Ia e pulea lou lava lumanai. O le a se mea o loo e faia e avea ai oe ma tagata sili ona lelei? Faailoa mai ia i matou e ala i le imeli mai i le liahona@ldschurch.org pe tuu se savali i luga o itulau LDS Youth Facebook po o le Instagram.