Opogi ma le Alofa i Latou o E Se Ese

Ia suesue ma le agaga tatalo lenei savali ma saili mo uunaiga ia iloa ai mea e faasoa atu. E faapefea e le malamalama i le faamoemoega o le Aualofa ona saunia afafine o le Atua mo faamanuiaga o le ola e faavavau?

“O le mea moni lava e leai ni aiga e atoatoa … ,” o le saunoaga lea a Peresitene Dieter F. Uchtdorf, Fesoasoani Lua i le Au Peresitene Sili. “Po o a lava ni faafitauli o loo feagai ma lou aiga, po o le a lava le mea e tatau ona e faia e foia ai, o le amataga ma le faaiuga o le vaifofo o le alofa mama, le alofa le pona o Keriso.”¹

E uiga ia i latou o e e le o auai atoatoa i le talalelei, na saunoa mai ai Linda K. Burton, o le sa avea muamua ma Peresitene Aoao o le Aualofa: “E alofa le Tama Faalelagi i Ana fanau uma. … E le afaina po o fea o i ai i latou—i luga po o fafo ma le ala—E finagalo o Ia ia latou toe o mai i le aiga.”²

Na aoao mai Peresitene Iosefa F. Samita (1838–1918), “Po o le a lava le faalogotata e i ai [lau fanau], … pe a e tautala pe talanoa atu ia i latou, ia aua le faia i le ita, aua le faia ma le saua, i se agaga o le tausalaga.” “Tautala atu ia i latou ma le agalelei.”³

Na toe taua e Elder Brent H. Nielson o le Fitugafulu le aoaoga a le Faaola ia i latou o e ua i ai tupe siliva e 10 ma na leiloa le tasi: “Ia saili seia oo ina maua. Pe a leiloa se tasi o ou atalii po o ou afafine, lou uso po o lou tuafafine, … a uma ona faia o mea uma tatou te mafaia, tatou te alolofa i lena tagata ma o tatou loto atoa. …

“Tau ina ia tatou mauaina le faaaliga ia iloa ai le auala silisili e talanoa atu ai ia i latou i o tatou olaga o e ua leiloloa ma, pe a talafeagai ai, ia maua le onosai ma le alofa o lo tatou Tama i le Lagi ma Lona Alo, o Iesu Keriso, a o tatou alolofa atu, vaavaai, ma faatalitali mo le atalii faamaumau oa.”⁴

Na saunoa Peresitene Henry B. Eyring, Fesoasoani Muamua i le Au Peresitene Sili: “Na ou tatalo ma le faatuatua ina ia saili ma lagona e se tasi ou te alofa i ai le mana o le Togiola. Na ou tatalo ma le faatuatua ina ia oo mai ni agelu tagata e fesoasoani ia i latou, ma sa latou oo mai.

“O loo i ai i le Atua se auala ua fuafuaina e laveai ai Ana fanau taitoatasi.”⁵

Mau Faaopoopo ma Faamatalaga

Mataio 18:12; Alema 31:35; 3 Nifae 13:32; MF&F 121:41–42;

reliefsociety.lds.org

Relief Society seal — Faatuatua Aiga Toomaga