Mai Paris haere atu i Sapporo
Tē ora nei tātou i te mau vāhi ta’a ’ē o te ao nei, terā rā, hō’ē ana’e huru tō tātou mana’o i te taime ’a patuhia ai te mau hiero i pīha’i iho iō tātou !
’O Rachel tō’u i’oa. Tē ora nei au i pīha’i iho i te hiero nō Paris (Farāni).
E mea faufa’a mau te hiero nō tō’u ’utuāfare. Hou ’a patuhia ai te hiero nō Paris, e tere tō mātou ’utuāfare i te hiero nō Frankfort i Helemani e rave rahi taime i te matahiti. 10 hora nō te tere i reira ē ho’i mai !
’Ua au roa mātou i te māta’ita’ira’a i te hiero ’āpī i te patura’ahia. Pauroa te hepetoma i muri a’e i te purera’a, e fa’atere tō mātou nā metua i te pereo’o nā reira nō te fa’a’ite ia mātou i te huru o te terera’a o te patura’a. I te ha’amatara’a ’ua vāvāhi rātou i te hō’ē fare tahito e ’ua ’ō i te hō’ē ’āpo’o rahi. ’E ’ua ha’amata rātou i te patu i te hiero haere noa i te teiteira’a. ’Aita i maoro teie mai nei te fare o te Fatu !
Tē ’oa’oa nei au ’e tō’u mau taea’e ’e tuahine ’ia haere i te hiero i te hō’ē mahana. ’O Esther tō’u tuahine pa’ari a’e, ’e nāna e rave, i te mau bāpetizora’a nā mua. Tē tīa’i rū nei mātou i tō mātou taime nō te haere ato’a. E mea au roa nā mātou te hiero e tē ’oa’oa nei mātou i te roa’ara’a hō’ē i roto i tō mātou iho ’oire !
’O Koshi tō’u i’oa. Tē ora nei au i pīha’i iho i te hiero nō Sapporo i Tāpōnē. E mea au roa nā’u e pārahi i te pae ha’amāramarama i roto i tō’u fare ’e ’ia māta’ita’i i te patura’a o te hiero.
I te taime nō te ’ōpani ’īriti, ’ua ani manihini au i tō’u hoa rahi ’ia haere mai nā muri iho ia mātou. ’Ua feruri ’oia ē, e mea nehenehe te mau mea ato’a.
E mea au nā’u ’ia feruri i te ha’amo’ara’a o te hiero ’ei mahana fānaura’a nōna. E mahana fānaura’a ato’a nō’u te reira mahana. Nō te peresideni Monson ato’a ! ’Ua tae tō’u nā metua ’ē ’o vau i te hiero i te taime ’a ha’amo’ahia ai.
E ’oa’oa rahi tō’u ’ia ora i pīha’i iho i te hiero. I te mau mahana e fifi tō’u i te fare ha’api’ira’a, e nehenehe tā’u e haere nā roto i te ’āua ’a ho’i ai au i te fare. E ’ite au i te here o te Metua i te ao ra iā’u ’ia tae ana’e au i reira. Tē tīa’i nei au i te taime e nehenehe tā’u e haere i roto nō te rave i te mau bāpetizora’a ’e i muri a’e ’ia fa’aipoipohia i reira.