Tāpe’a pāpū
Tē ora nei te ta’ata pāpa’i i Utah (Marite).
E fa’atupu te mau hoa i te ta’a-’ē-ra’a rahi i roto i te parau nō te orara’a ma te ’ōhie—’e ’aore rā, ma te fifi—i tā tātou mau faatureraa.
’Ua pa’ari au i rotopū i te mau hoa melo nō te ’Ēkālesia, ’e ’ua hina’aro ’oi’oi au ’ia bāpetizohia vau ’e ’ia riro mai ’o vau iho ’ei melo. ’A rātere ai au nō te haere i te fare ha’api’ira’a tuatoru, ’ua ha’amata vau i te fāri’i i te mau ha’api’ira’a a te mau misiōnare. Te fifi rā, nā roto i te ’umera’a a te mau hoa, ’ua riro te ha’apa’ora’a i te mau ture o te ’evanelia ’ei ’ohipa fifi. E taime rahi te pau i tō’u mau hoa nō te matahiti mātāmua i roto i te mau fa’a’oa’oara’a nō te inu i te ’ava. ’Aita ā vau i tāmata a’enei i te ’ava nā mua a’enei, terā rā, ’ua ’ume tāmau noa tō’u mau hoa ’āpī iā’u ’ia inu i te reira.
’Ua ’ite au ē, e parau mau te ’evanelia, terā rā, e mea teiaha mau ’ia pāto’i i te ’umera’a a te mau hoa.
’Ua ha’amata vau i te pure i te Metua i te Ao ra nō te ani i te pūai nō te rave i te fa’aotira’a ti’a. ’Aita vau i fa’atopa i te fāito o tā’u mau ture, terā rā, ’ua mata’u vau ’o te ’ore e roa’a iā’u te pūai nō te pāto’i i te ’ava e hōro’ahia mai i te taime i muri nei. ’Ua mihi au i tō’u mau hoa hō’ē ā ana’e tā mātou mau ture.
I te hō’ē pō mahana mā’a ’ua haere au i te hō’ē fa’a’oa’oara’a ’e te mau ta’ata nō tō’u piha ta’otora’a. ’Aita i ha’amāoro ’ua inu tō’u mau hoa tā’āto’a ma te fa’aitoito mai iā’u ’ia tāmata i te ’ava nō te taime mātāmua.
’Ua hina’aro roa vau. ’Ua rave au i te hāpaina pia e hōro’ahia maira iā’u. ’Ua ’āfa’i au i te reira i tō’u vaha, ma te au ’ore rii, ma te ’oa’oa rā i te mea ē, tē hi’o maira tō’u mau hoa. ’E ’ua tae maira ’o Nick, hō’ē tamaiti mātauhia nō te ’ohipa inu.
’Ua ui maira ’oia : « ’Aita ’oe i inu , ’oia ? »
Pāhono atura vau ē, « ’Aita ā ».
’Ua parau maira ’o Nick ē, « Mai te mea ē, e inu ’oe, e tātarahapa ’oe pauroa te mahana nō te toe’a o tō ’oe orara’a ».
’Ua māere roa vau. ’Ua ’ite ho’i au ē, ’ua tano ’oia. ’Aita vau i hina’aro e inu. ’Ua hina’aro vau ’ia tomo i roto i te ’Ēkālesia. ’Ua fa’aho’i au i te hāpaina ’e ’ua fa’aru’e au i te fa’a’oa’oara’a, ma te ’oa’oa i te mea ē, ’aita vau i rave i te fa’aotira’a ’ino.
I te po’ipo’i a’e ’ua haere au i te purera’a, ’ua fārerei i te mau misiōnare, ’e ’ua fa’ata’a i te hō’ē tai’o mahana nō tō’u bāpetizora’a. Mai taua mahana maira ’ua fa’aātea ’ē au i te mau fa’a’oa’oara’a inura’a ’ava. ’Ua roa’a tō’u mau hoa ’āpī i te fare purera’a hō’ē ā tā rātou mau peu ’e tā’u. ’Ua vai hoa noa mātou i roto i tō’u piha, terā rā, ’ua ha’apāpū maita’i au i tā’u mau ture. I tō rātou ’itera’a ē, e mea faufa’a roa nō’u tā’u mau ture, ’ua auraro rātou i te reira ’e ’ua fa’aea rātou i te ’ume iā’u. ’Ua ’ite rātou ’e ’ua auraro rātou ’ia haere au i rāpae i te piha ’a māta’ita’i ai rātou i te mau hōho’a tano ’ore ’e ’aore rā, ’a fa’aro’o ai rātou i te mau pehe tano ’ore.
’Ua pūaihia tō’u ’itera’a pāpū nā roto i teie ’ohipa, ’e e fa’aitoito vau ’eiaha e tu’u i tā’u mau ture i raro nō te ’umera’a a te mau hoa. ’Ua ’ite ato’a vau ē, te rāve’a maita’i a’e nō te fa’aruru i te mau fa’aotira’a fifi ’o te ’itera’a ïa i tā ’outou mau faatureraa ’e ’ia tāpe’a pāpū i te reira mai te ha’amatara’a.
’Ua ’ite au ē ’ua pāhono te Metua i te Ao ra i tā’u mau pure aniraa i te pūai nō te pato’i i te fa’ahemara’a. Te ’oa’oa nei au i te mea ē, ’ua fa’aitoito mai te Vārua Maita’i iā’u ’ia rave i te fa’aotira’a tano. ’Ua ’ite au ē, ’ua hōro’ahia mai te mau faatureraa a te ’Ēkālesia nō te pāruru ia tātou, ’e tē ’oa’oa nei au i te mea ē, nā te mā’itira’a e ha’apa’o i te reira i tauturu iā’u ’ia mā’iti ’ia tomo mai i roto i te ’Ēkālesia.