Tē ha’apa’o mai nei te Metua i te Ao ra i tā’u ’ohipa putura’a faufa’a

Buyisile Zuma

KwaZulu-Natal, ’Afirika ’Apato’a

’Ei metua vahine ’ōtahi nō nā tamari’i e pae, ’ua ’ite au i te hōpoi’a teimaha o te fa’a’amura’a i tō’u ’utuāfare. E tāvini fare tā’u ’ohipa, ’aita rā tā’u ’ohipa e nava’i nō te fa’a’amu i tō’u ’utuāfare. ’Ua ’āmui atu vau i roto i te hō’ē pupu fa’arava’ira’a iāna iho ’ia nehenehe iā’u ’ia ha’api’i nāhea e ha’amaita’i atu i tō’u orara’a.

’Ua fa’auru te pupu « ha’amata e fa’arahi i tā’u ’ohipa putu faufa’a » iā’u ’e ’ua fa’aoti au e nehenehe tā’u e nira ’e e hoo i te mau pūtē māhanahana nō te pāni mā’a. E nira vau i te mau pūtē i te pō i muri a’e i tā’u ’ohipa i te ao.

I te hō’ē maorora’a pō, tē rave ra vau i te ’ohipa nō te hō’ē ho’ora’a nō po’ipo’i a’e, ’aita tā’u matini i tere fa’ahou. ’Ahuru mā piti i te pō i taua taime ra, ’aita e ta’ata hāmani nō te tauturu mai. Tē vai ra te hō’ē fa’ari’i tauiha’a tātā’i mātini, terā rā, ’aita ā vau i tātā’i a’enei i te hō’ē mātini nira ’ahu. ’Aita roa atu vau i ’ite e nāhea i te ha’amata.

Ha’amana’o a’era vau i te ha’api’ira’a i roto i te buka Tō’u Niu « Fa’a’ohipa i te fa’aro’o ia Iesu Mesia ». ’Ite a’era vau ē, tītauhia iā’u ’ia tu’u i tō’u ti’aturira’a i roto i te Fatu. ’Ua topa a’era vau i ni’a i tō’u nā turi ’e ’ua tāparu atura : « E te Metua i te Ao ra, tauturu mai ’oe iā’u ’ia tātā’i i teie mātini ’ia ti’a iā’u ’ia fa’aoti i teie ho’ora’a ’ia haere mai te hōani e ti’i i te po’ipo’i. E te Metua i te Ao ra, tauturu mai iā’u ! »

I muri iho, ’ua tae mai te ’umera’a pāpū e rave i te hō’ē tāviri farero i roto i te vaira’a tauiha’a ’e e fa’a’ohipa nō te tūra’i i ni’a i te hō’ē vāhi ta’a ’ē o te mātini nira ’ahu. ’Ua rave au i te reira ma te tūru’i hope roa i ni’a i tō’u fa’aro’o. ’Ua tāpe’a vau i tō’u aho ’a fa’a’ama fa’ahou ai au i te mātini. ’Ua tere !

’Ua ti’a a’era iā’u ’ia fa’aoti i teie ’ohipa nō te taime i fa’ata’ahia. ’Ua ’ite a’era vau ē, e aha mau te huru ’ia fa’ariro i te Metua i te Ao ra ’e ia Iesu Mesia ’ei nā ’āpiti i roto i te ’ohipa putu faufa’a. ’Ua ’ite au ē, e ha’amaita’i-noa-hia vau mai te mea ē, e ’imi au i te mau rāve’a nō te fa’a’ohipa i te mau mea tā’u i ha’api’i mai i roto i te pupu fa’arava’ira’a iāna iho.