Hō’ē pāhonora’a fa’auruhia i roto i te hō’ē uiuira’a ’ohipa
Gibrair Padilha Dos Santos
São Paulo (Beresiria)
Fa’ahōho’ara’a nō roto mai i tē mau hōho’a a Guetty
I muri a’e i tō’u pi’ira’ahia ’ia fa’atere i te hō’ē tōmite fa’arava’ira’a iāna iho a te titi, ’ua ’ite a’era vau ē, ’aita i nava’i roa ta’u moni ’ohipa. Nā roto i teie ’itera’a, ’ua hina’aro a’era vau e tītau i te tōro’a ’ohipa maita’i a’e.
’Ua tupu te hō’ē hina’aro ’āpī ’ia ’imi i te hō’ē ’ohipa maita’i a’e, ’e ’ua ani au i te tauturu nō te pāpa’i i te hō’ē parau fa’ata’ara’a ta’ata tōro’a. ’Ua hāpono vau i tā’u parau fa’ata’ara’a ta’ata tōro’a ’āpī i te mau taiete putu faufa’a e rave rahi, ’e ’aita i māoro, ’ua pi’ihia mai au nō te mau uiuira’a.
I te hō’ē uiuira’a, ’ua fa’atoro te ta’ata uiui i ni’a i te hō’ē rēni o tā’u parau fa’ata’ara’a ’o te fa’a’ite ra i tā’u ’ohipa ’ei tauturu i roto i te peresidenira’a titi ’e ’ua ui maira : « E nehenehe ānei tā ’oe e fa’ata’a mai i roto noa e pae tetoni e aha te aura’a o teie ’ohipa i roto i te ’ēkālesia ? »
’Ua parau atura vau ē, ’ua ti’a na vau i roto i te fa’aterera’a o te faanahoraa ha’apa’o i te arata’ira’a ’e i te ora maita’i o te ta’ata, hau atu i te 2500 ti’ahapa. ’Ua tupu te ’ana’anatae i roto i te ta’ata uiui ’e nā ’ō maira : « Te hōro’a nei au ia ’oe hō’ē minuti nō te feruri hō’ē pāhonora’a pae tetoni i teie uira’a : nāhea ’oe i te arata’i i te reira 2500 ta’ata ? »
’Ua ’ite a’era vau ē, e riro teie taime ’ei taime faufa’a roa i roto i te uiuira’a. ’Ua pure au ma te ani i tō’u Metua i te Ao ra i te tauturu ’e ’ua ha’amana’o ’oi’oi a’era vau i te mau ha’api’ira’a tā’u i ’apo mai i roto i te pupu fa’arava’ira’a iāna iho. ’Ua tae mai te mana’o ti’aturi.
Hō’ē minuti i muri iho, ’ua ui maira te ta’ata uiui ē : « Nāhea ’oe ’ia arata’i i te reira 2500 ta’ata ? »
« E tauturu mātou ia rātou ’ia ha’amau i te mau ’ōpuaraa », tā’u ïa pāhonora’a.
’Ua ti’a a’era te ta’ata uiui i ni’a, aroha rima mai nei ia’u ’e nā ’ō mai nei ē, « ’ua tihēpuhia ’oe ».
E mea māere mau tō te Atua tāpe’ara’a i tō’u rima ’e te pāhonora’a mai i tā’u pure. Tē māuruuru nei au i tō’u Fa’aora nō tōna fa’aurura’a i tō tātou mau ti’a fa’atere ’ia fa’atupu i te fa’anahora’a fa’arava’ira’a iāna iho. ’Ua ha’amaita’ihia vau iho nā te reira, ’e ’ua ’ite au i te terera’a ’ōhie ’e te fa’auruhia o te fa’anahora’a o te fa’arava’ira’a iāna iho i te ha’amaita’ira’a e rave rahi mau ta’ata ’ē atu i roto i tā mātou titi. ’Ua ’ite pāpū roa vau i te ti’ara’a o te mau parau tumu o te fa’arava’ira’a iāna iho nō te fa’ateitei i te orara’a, nō reira, i tō’u rirora’a ’ei ti’a fa’atere i ni’a iho 15 rave ’ohipa i roto i tā’u ’ohipa ’āpī, ’ua ha’amata ihora vau i te ha’api’i ia rātou i te mau parau tumu o te fa’arava’ira’a iāna iho.
’Ua pa’ari au ’e ’ua hau atu tō’u ’aravihi i tā’u i feruri na. Tē roa’a nei iā’u i teienei hō’ē moni ’ohipa ’o tē paturu nei iā’u ’e i tō’u ’utuāfare. E tauturu teie fa’anahora’a ia tātou ’ia ha’amaita’i ia tātou i te mahana tāta’itahi nā roto i te tauturura’a ia tātou ’ia ’itehia te fa’arava’ira’a rahi a’e iāna iho.