Vāvāhi i te hōho’a « taure’are’a mātarohia »
’A ha’amo’e i tā tō te ao nei e parau. E mea nāhea tō te Metua i te Ao ra hi’ora’a mai ia ’outou ? E nehenehe tā ’outou e ora mai te au i tāna hi’ora’a i tō ’outou fāito pūai.
E rave rahi mea tā te ao e parau nei nō ni’a i te feiā ’āpī i teie mahana. ’Ua ’ite a’enei paha ’outou i te tahi mau hōho’a taipe (stéréotype) ’e ’aore rā, ’ua fa’aro’o a’enei paha ’outou i te hō’ē ta’ata tei amuamu nō ni’a i « te mau tamari’i i teie anotau ». E rave rahi ato’a tuatāpapara’a ’e te mātutura’a nō ni’a ia ’outou—tā ’outou mau peu i ni’a i te rēni ’itenati, e aha tā ’outou e ho’o, ’e te potopoto tō ’outou ferurira’a.
Terā rā, tē parau nei te peresideni Russell M. Nelson, peresideni nō te pupu nō te Tino ’Ahuru Ma Piti ’āpōsetolo ē, « ’aita [’oia] e ’āfaro roa » ’ia fa’aro’o ana’e ’oia i te feiā mā’imi ’ia tatara ana’e rātou i tā rātou mau tuatāpapara’a nō ni’a ia ’outou e te feiā ’āpī. Te nā ’o ra ’oia ē : « E parau ’āfaro noa atu vau, ’aita vau e tāu’a roa nei i te mea tā teie mau ’aivāna’a e parau nei nō ni’a ia ’outou, i tā te Fatu rā i parau mai nō ni’a ia ’outou. ».1
’Aita e faufa’a te mau tuatāpapara’a ’e ’aore rā, te mau hōho’a taipe nō te ’ite te Fatu ia ’outou. ’Aita ’oia e hi’o ra ia ’outou mai te hō’ē mātutura’a ’e ’aore rā, mai te hō’ē ta’ata tei ha’afaufa’a-’ore-hia nā roto i te fa’ata’ara’a « tō te ao » ia ’outou.
« ’Ua here ’oia ia ’outou ’eiaha noa nō tō ’outou huru ta’ata i teie mahana nō te ta’ata hanahana rā ’e te māramarama tā ’outou e nehenehe e riro mai ’e ’o tā ’outou e hia’āi nei ’ia riro », tē nā reira ra te peresideni Dieter F. Uchtdorf, tauturu piti i roto i te Peresidenira’a Mātāmua.2
’Aita te Atua e hi’o noa mai ia ’outou ; tē here nei ’oia ia ’outou.
Hina’aro ’outou e vāvāhi i te hōho’a a tō te ao ? ’A ha’amata nā roto i te hi’ora’a ia ’outou mai te au i tā te Metua i te Ao ra ’e tā tōna mau tāvini mā’itihia e hi’o nei ia ’outou. Hina’aro ’outou e tūparari i te hōho’a taipe ? Teie te taime nō te ti’a i ni’a ’e ’ia rave ! I te 12ra’a tōna matahiti, ’ua fa’aha’amana’o te Mesia i tōna nā metua tāhuti nei ē, tītauhia iāna ’ia « ha’apa’o i te ’ohipa a [tōna] Metua » (Luka 2:49).
E ’ere ’oia i te mea ’āpī roa, ’outou ato’a. Nō reira teie te uira’a i muri iho : Nāhea e ti’a ai ia ’outou ’ia ha’apa’o i te ’ohipa a tō ’outou Metua ?
Tāna « ’ohipa » ’o te fa’atupura’a ïa i te « tāhuti ’ore ’e te ora mure ’ore o te ta’ata nei » (Mose 1:39), nō reira, e nehenehe tā ’outou e ha’apa’o i te ’ohipa a tō ’outou Metua nā roto i te ’imira’a i te mau rāve’a ato’a ’ia fa’atupu i tō ’outou fāito pūai ’e nā roto i te rirora’a ’ei ta’ata ’o te tauturu ia vetahi ’ē ’ia fa’atupu ato’a i tō rātou fāito puai.
I teienei, ’ua tae i te taime nō te ravera’a i te hōpoi’a nō tō ’outou iho ananahi. E aha te ti’a ia ’outou ’ia rave i teienei nō te ha’apāpū ē, tē riro nei ’outou i te ta’ata tā te Metua i te Ao ra i ’ite ē, e nehenehe ’outou e riro mai, ’eiaha i roto noa i te mau ao a muri atu, i roto ato’a rā i teie orara’a ?
Hina’aro ānei ’outou ’ia fa’aipoipohia ’outou i roto i te hiero ? ’A faaoti i teienei ’ia riro ’ei mea vi’ivi’i ’ore i roto i te ferurira’a, te parau ’e te ’ohipa. Te hi’o ra ānei ’outou ia ’outou tē ha’api’i ra i te fare ha’api’ira’a tuatoru ? ’A fa’ahotu i te mau ’aravihi ha’api’ira’a i teienei. Hina’aro ānei ’outou e tāvini i te hō’ē misiōni ? ’A ’āmui i te ’A poro i tā’u ’evanelia i tā ’outou tuatāpapara’a ’evanelia (te pene 3 iho ā rā). Hina’aro ānei ’outou e fa’a’amu i te hō’ē ’utuāfare ? ’A ha’api’i nāhea ’ia hāmani ’e ’ia ha’apa’o i te hō’ē tāpura ha’amau’ara’a i teienei.
E nehenehe ato’a tā ’outou e hi’o i te mau mea e fa’a’oa’oa ia ’outou i teienei E mea au ānei nā ’outou te ’ohipa nūmera ? Ha’uti i te piana ? Pāpa’i i te ’ā’amu ? ’A tāmau noa i te reira ! ’A hi’o ē tē vai ra ānei te mau rāve’a nō te ha’amaita’i atu ā : te mau piha ha’api’ira’a, te mau ha’api’ira’a nā ni’a i te ’itenati, te tata’ura’a, te ha’api’ipi’ira’a ’e te vai atu ra.
Vāvāhi i te hoho’a e tūparari i te mau hōho’a taipe ! ’A ti’a’au i tō ’outou iho ananahi. E aha tā ’outou e rave nei nō te riro mai i tō ’outou huru maita’i roa a’e ? ’A fa’a’ite mai ia mātou nā roto i te rata uira i te liahona@ldschurch.org ’e ’aore rā ’a vaiiho mai i te hō’ē poro’i i ni’a i te mau ’api LDS Youth Facebook ’e ’aore rā Instagram.