Te ’imira’a i te tauturu i muri a’e i te pohera’a o Nancy
Tē ora nei te ta’ata pāpa’i i Georgia (Marite).
E aha te tītauhia iā’u ’ia rave nō te fāri’i i te mana fa’aora o Iesu Mesia i roto i tō’u orara’a ?
Fa’ahōho’ara’a nā Iker Ayerstaran
I te ’āva’e fepuare 2016 ’ua pohe tā’u vahine ’o Nancy i muri a’e 11 matahiti ’arora’a i te ma’i mariri aita’ata i te tītī. E’ita e nehenehe e parau i te ’oto rahi tā’u i fa’aruru i roto i nā ’āva’e mātāmua i muri a’e i tōna pohera’a, ’o te ta’ata ana’e i fa’aruru i te reira te ’ite. Te mamae, te ahoaho, te ’oto, te māuiui,—’aita e parau e nehenehe e fa’ati’a atu. Mea teimaha roa ’ino.
Te mana fa’aora o te Fa’aora
E mea māoro tō’u ’itera’a ē, « ’ua pou mai Iesu Mesia i raro a’e i te mau mea ato’a ra » (PH&PF 88:6) ’ia ti’a ho’i iāna ’ia « fa’aora [hōro’a i te tauturu] i tōna mau ta’ata i tō rātou paruparura’a ra » (Alama 7:12). Te aura’a ra, e mana rahi atu ā tō te tāra’ehara o te Fa’aora i te hōro’a-noa-ra’a mai i te ti’afa’ahoura’a ’e te fa’aorara’a i te mau hara. Nā roto i teie mana, e nehenehe ato’a tāna e fa’aora ia tātou i roto i tō tātou mau taime māuiui ’e te nava’i ’ore. I roto i tō’u ’oto, ’ua tāmata ’oi’oi au—fātata ma te rū noa—’ia ha’api’i e aha te ’ohipa e rave nō te fa’atere i taua tuha’a ra o te mana o te Fa’aora i roto i tō’u orara’a. E rave rahi hepetoma tō’u mā’imira’a i roto i te mau pāpa’ira’a mo’a ’e te mau a’ora’a nā te mau Hui mana fa’atere rahi o te ’Ēkālesia. ’Ua ti’aturi pāpū vau ē, ma te mamae ’e te fa’atusiara’a fāito ’ore, ’ua ’ite te Fa’aora i te ’oto tā’u e fa’aruru ra. Terā rā, nāhea tōna ’itera’a i te reira i te tauturu iā’u ? Inā ’ua mamae ’oia i te reira nō’u e aha ïa tei tītauhia iā’u ’ia rave nō te fāri’i i te fa’aorara’a tāna i ’apo mai i te rāve’a nō te hōro’a mai ?
I muri a’e i te mau mā’imira’a e rave rahi, te tuatāpapara’a, te pure ’e te ha’amorira’a i roto i te hiero, ’ua ha’amata vau i te hāro’aro’a. ’A tahi roa, ’ua ha’amata vau i te ’ite pāpū a’e ē, ’ua fa’aora a’ena mai te Fatu, ’ua tāmāhanahana ’e ua pāturu ’oia i tō’u ’utuāfare, i roto iho ā rā i te mau hepetoma nā mua noa a’e i te pohera’a o Nancy. ’Ua tupu te mau ’itera’a vārua fa’ahiahia tā’u e ’ite nei i teie nei ē, e mau ha’amaita’ira’a ïa nō roto mai i te mana fa’aora ’e te ha’apūai e roa’a ia tātou nā roto i te tāra’ehara o te Fa’aora. Te ’itera’a noa ē, a’ena te Fa’aora i te aupurura’a ia mātou tāta’itahi roa, ’ua ’itehia mau ïa ’e ’ua riro ho’i ’ei tāmāhanahanara’a rahi. Mai ia Sadaraka, Meseka ’e ’o Abede-nego i muta’a ihora, ’ua vai ’oia i pīha’i iho ia mātou i roto i « te umu auahi ura ra » (Daniela 3:17) o tō mātou ’ati.
Ti’aturi i te Fatu
’Ua ha’api’i ato’a mai au ē, tē vai ra te tahi mau mea i tītauhia ia tātou nō te fāri’i i te tāmāhanahanara’a ’e te fa’aorara’a a te Fatu. Te mea faufa’a roa atu, tītauhia ia tātou ’ia ti’aturi iāna. E ’ere ïa i te ’ohipa ’ōhie. Nō te aha vau e ti’aturi ai i te Atua, inaha ’ua ti’a ho’i iāna ’ia fa’aherehere ia Nancy, e aha ’oia i ’ore ai ? Nō te pāhono i teie uira’a, ’ua feruri tāmau noa vau i te hō’ē mea tā te Fatu i parau i te peropheta Iosepha Semita :
« E ’ore roa e ti’a ia ’outou ’ia ’ite nā roto i tō ’outou mata ta’ata noa nei, nō teie taime nei, i te ’ōpuara’a nō tō ’outou Atua nō ni’a i terā ra mau mea ’o te tupu a muri atura, ’e te hanahana hoʻi o te tae mai i muri a’e i te mau ’ati e rave rahi ra » (PH&PF 58:3).
’Ua ha’amaita’ihia mātou ’ia ’ite i te mau tāpa’o e rave rahi ē, te huru ’e te taime o te pohera’a o Nancy, ’ua tupu ïa mai te au i te hina’aro o te Fatu. ’Ua roa’a te ’itera’a iā’u ē, ’ua fa’ati’a te hō’ē Metua tei ’ite i te mau mea ato’a ’e te here, ’ia mamae mātou i teie mau mea nō te mea, i roto i tāna fa’anahora’a maita’i hope nō te fa’ateiteira’a o tō mātou ’utuāfare, e tītauhia teie māuiui. Nā roto i te reira, ’ua ’ite au ē, tā’u tuha’a i roto i tāna fa’anahora’a e ’ere ïa i te fa’a’oroma’i-noa-ra’a, e « fa’a’oroma’i māite » rā (PH&PF 121:8). I te fāito e roa’a iā’u ’ia ha’amo’a i teie ’ati iāna ra, e fa’aorahia ïa vau, ’e e ha’amo’ahia ho’i. ’Ua ’ite a’enei au i te reira ’ua rau te huru.
’Ua a’o vau i tā māua mau tamari’i ’ia rave i te mea tā’u i ha’api’i mai i roto i teie ’ohipa tau maoro :
-
’A vaiiho i te māuiui o te mau mea teimaha tei tupu ’ia arata’i ia ’outou i te ti’ara’a pipi rahi a’e.
-
’A nīni’i i tō ’outou ’ā’au i roto i te pure.
-
Mai te mea tē riri ra ’outou i te Atua nō te vaiihora’a i te ’ati ’ia tupu noa, ’a tāparu iāna ’ia mono i te reira riri i te fa’aro’o ’e te fa’aha’eha’a.
-
’A fafau ē, e here ’outou iāna ’e e ha’apa’o māite ē tae noa atu i te hope’a.
-
’A inu tāmau noa i te parau nā te Atua—i roto i te mau pāpa’ira’a mo’a ’e te mau a’ora’a ’e te mau pāpa’ira’a a te mau peropheta nō teie anotau ’e a te mau ’orometua ha’api’i fa’auruhia.
-
’A haere i te hiero ma te hia’ai ’ia ha’api’ihia i te mau mea nō te tau a muri atu.
-
’A ’imi i te mau ta’ata tei riro tō rātou fifi ta’ata ’ei fifi nō te fa’aro’o, ’e ’a fa’aitoito ia rātou nā roto i tō ’outou ’itera’a pāpū nō ni’a i teie mau ha’api’ira’a tumu.
Hō’ē fa’a’itera’a nā te ’āpōsetolo
Fātata hō’ē ’āva’e i muri a’e i te pohera’a o Nancy, i te hō’ē pō, ’ua rahi roa te māuiui i ni’a iā’u. ’Ua pohe roa vau i te māuiui ’e te ’oto i taua mahana tā’āto’a ra. Ha’amana’o atura vau i te ha’api’ira’a a Elder Jeffrey R. Holland nō te pupu nō te Tino ’Ahuru Ma Piti ’āpōsetolo i te nā-’ō-ra’a ē : « Nā Getesemane… te ’ē’a o te fa’aorara’a i te haere, i te mau taime ato’a ».1 Noa atu ē, e’ita tō’u mamae e ti’a ia fa’aauhia i tō te Fa’aora, i taua pō ra, tei roto mau vau i tō’u iho « mau hora pouri ’e te maramara ».2
I muri a’e i te fa’arurura’a i te reira i tahi taime ’e te purera’a nō te tauturu, ’ua tae maira i roto i tō’u ferurira’a te hō’ē mea tā’u i tai’o ’e tā’u i tāpa’o i roto i tā’u rorouira e rave rahi matahiti a’enei. ’Ua ’imi au i taua parau ra, ’e ’ua fa’anu’u i raro i ni’a i te mea tā’u e ’imi ra. E uiuira’a ïa ’e ’o Elder Richard G. Scott nō te pupu nō te Tino ’Ahuru Ma Piti ’āpōsetolo (1928-2015) i reira ’oia i te uira’ahia nō ni’a i te mo’era’a tāna vahine, ’o Jeanene, i te ma’i mariri aita’ata i te matahiti 1995. Tē pāhono ra ’o Elder Scott ē : « Nā mua roa… ’aita vau i ’ere iāna. Tei te tahi pae mai ’oia i te pāruru. ’Ua tā’atihia māua i roto i taua ’ōro’a mo’a ra o te hiero, ’e e vai ’āmui noa māua ē a muri noa atu ».3
Fa’ahōho’ara’a nō te hiero nō Atlanta (Georgia)
I taua pō ra, ’ua tae maira taua mau parau ra ma te hō’ē pūai ’aita ā vau i ’ite nā mua a’enei. E au ïa mai te ’anapa o te hō’ē fare mori tei fa’a’amahia i roto i te hō’ē pō pōiri. ’Aita ā vau i tai’o a’enei i te hō’ē mea tei ha’aputapū puai tā’ue noa iā’u. ’Ua pe’e ’ē atura te pōiri ’e te māuiui. E au vau mai ia Alama i te taime ’aita i ti’a fa’ahou iāna « ’ia ha’amana’o ā i [tōna] ’ati » (Alama 36:19). ’Ua puta roa taua fa’a’itera’a a te ’āpōsetolo i roto roa i tō’u ’ā’au. ’Ua māere au i te mea ē, ’ua ti’a i te hō’ē parau tumu tā’u i hāro’aro’a i tō’u na’ina’ira’a ra, ’ia riro tā’ue mai ’ei parau fa’ahiahia roa. ’Ua uiui noa a’era vau i roto iā’u iho ē, nāhea pa’i i ti’a ai ia Elder Scott ’ia ’ite i te hō’ē mea mai teie te huru. ’E i taua taime ra, ’ua ’ite a’era vau ē, ’ua ’ite ato’a vau i te reira. Mai te mea ē, e ha’apa’o maita’i au, e nehenehe tā’u e fāri’i i te tā’āto’ara’a o te ti’aturira’a i mauhia e Elder Scott. Noa atu ē, mai taua taime ra, ’ua tupu mau ā te ’oto ’e te heva, ’aita roa atu rā vau i fa’aruru fa’ahou i te mau mamae rahi ’e te ’oto ’o tā’u i fa’aruru i taua ’āru’i ra.
Teie te mana tā te Fa’aora e fa’atae mai i ni’a ia tātou nō te fa’aora ia tātou i roto i tō tātou mau ’ati. ’Ua ’ite au ē, e’ita te ’oto o tō mātou ’utuāfare e mo’e hope roa, e horomi’ihia rā te reira i roto i te mea i parauhia ra ē, te mau ha’amaita’ira’a « ha’apūai » ’e te « ha’amaita’i roa » o te tāra’ehara o te Fa’aora.4 ’Ua ha’afātata atu a’e mātou i te Fa’aora, ’ua ’ite i tāna ha’apāpūra’a, ’e ’ua pāturuhia nā te niu pāpū o tā mātou mau fafaura’a.