Fa’ahotu i tā’u putu faufa’a faraoa raiti

Lordita Yagomyom

Misamis Occidental (Filipino)

’Ua hina’aro vau e tono i tā’u tamaiti i te misiōni, terā rā, ’ia ho’o vau hō’ē kilo bibingka (faraoa raiti) i te hepetoma, e’ita ïa e nava’i nō te pāturu iāna i roto i te misiōni.

’Ua tauturu tā’u tamaiti i te ’utuāfare i te pae moni, ’e ’aita ’oia e au maita’i ’ia reva ma te ha’ape’ape’a rahi nō tō mātou orara’a i te pae moni. ’Ua riro te ’imira’a i te moni ’ei tauto’ora’a tāmau nō tō mātou ’utuāfare. ’Ua ha’apeu vau nō tā’u tamaiti 25 matahiti ’e tōna hina’aro ti’a ’ia tāvini i te Fatu, terā rā, ’ua ’ite ato’a vau ē, ’ei temeio nō te fa’ariro i tōna moemoeā e tāvini i te hō’ē misiōni ’ei parau mau.

’Ua tomo vau i roto i te hō’ē pupu fa’arava’ira’a iāna iho. Nā roto i te fa’aitoitora’a ’e te fa’a’ohipara’a i tō’u fa’aro’o, ’ua ’ite au ē, e ha’amaita’ihia tō’u ’utuāfare. I roto i te hō’ē putuputura’a, ’ua tūra’ihia vau ’ia haere i te hō’ē mātete. I reira, ’ua ’ite au e rave rahi vahine e ho’o ra i te mā’a ’amu’amu o te fenua iho. ’Ua fa’aau vau ’e te hō’ē vahine. ’Ua parau vau iāna ē, e ’āfa’i mai au i tā’u mau mā’a i te po’ipo’i nāna e ho’o, ’e e haere mai au e ti’i i te ’āpī ’ia hope te mahana. E ’āpī māua to’opiti ato’a i roto i teie fa’aaura’a. ’Aita i māoro ’ua ’itehia iā’u e rave rahi atu ā mau ta’ata ho’o. ’Ua hotu tā’u putura’a faufa’a i te fāito 10 ta’ata ho’o i te taime ’a vai noa ai au i roto i te pupu fa’arava’ira’a iāna iho.

’Ua ha’api’i au ’ia fa’ata’a ’ē i tā’u iho moni i te moni ’ohipa putu faufa’a ’e ’ia ’aufau ato’a iā’u iho i te hō’ē moni ’ohipa. ’Ua ha’api’i au ’ia fa’aea i te ha’amau’a i te taime i te hāmanira’a i te mau tauha’a e’ita e riro i te ho’o ’e ’ia rōtahi i ni’a i te mea e ho’ohia. ’Ua ha’api’i ato’a vau i te fa’atianira’a nā rāve’a tūreiara’a sōtiare. ’Ua tauturu mai tō’u ’āpiti ’ohipa i roto i te pupu fa’arava’ira’a iāna iho ’ia hāmani i te hō’ē rēni Facebook. Mai reira, ’ua ha’api’i mātou nō ni’a i te ha’amaura’a i te hō’ē i’oa, te hō’ē tāpa’o ’e te pū’ohu ho’ora’a. I te hope’a ’ua rahi tā’u putura’a faufa’a i te fāito e nehenehe tā tā’u tāne e fa’aru’e i tāna ’ohipa teimaha ’e e rave i te ’ohipa i pīha’i iho iā’u.

’Aita i māoro a’enei ’ua ui mai te hō’ē ta’ata iā’u ē, e aha te huru tā’u mau ho’ora’a. ’Ua parau atu vau iāna ma te ha’apeu ē, tē ho’o nei au 12 kilo faraoa raiti i teienei.

« 12 kilo i te hepetoma, e mea maita’i roa ! », tāna ïa parau.

Nā ’ō atura vau ē : « ’Aita, te taea’e » « Tē ho’o nei au 12 kilo i te mahana ».

’Ei reira, ’ua parau mai tā’u tamaiti ē, ’ua ’oa’oa ’oia i te mea ē, e nehenehe tā’u putura’a faufa’a e pāhono i tō mātou mau hina’aro.

Nā ’ō mai nei ’oia ē : « Mai te mea ra ē, e nehenehe tā’u e tāvini i te hō’ē misiōni rave tāmau i teienei ».

Tē tāvini nei ’oia i roto i te mīsioni Philipino nō San Pablo. Tē māuruuru rahi nei au nō te fa’anahora’a fa’arava’ira’a iāna iho. E parau pāpū tā te Fatu ’a parau mai ai ’oia ē : « ’O tō’u ’ōpuara’a ïa ’ia hōro’a i te faufa’a nā tā’u feiā mo’a » (PH&PF 104:15).